បទសម្ភាសន៍ VOA៖ យុវតីខ្មែរមកពីជនបទ កញ្ញា ថាន់ រីដា មានឱកាសធ្វើទស្សនកិច្ចសិក្សាលើកដំបូងនៅអាមេរិក
ជាយុវតីម្នាក់មកពីខេត្តសៀមរាប កញ្ញា ថាន់ រីដា បានមកធ្វើទស្សនកិច្ចសិក្សានៅរដ្ឋធានីវ៉ាស៊ីនតោន សហរដ្ឋអាមេរិកជាលើកដំបូង ក្រោមកម្មវិធីអាហារូបករណ៍របស់អង្គការជឿជាក់លើសិស្សជនបទកម្ពុជា (Cambodia Rural Students Trust)។ កញ្ញា រីដា ដែលជានិស្សិតឆ្នាំទី៣ ជំនាញទំនាក់ទំនងអន្តរជាតិនៃសាកលវិទ្យាល័យបញ្ញាសាស្ត្រក្នុងខេត្តសៀមរាប បានមកកាន់សហរដ្ឋអាមេរិកកាលពីពាក់កណ្ដាលខែតុលាកន្លងទៅនេះ ក្នុងទស្សនកិច្ចសិក្សាដែលមានរយៈពេល ១០ ថ្ងៃ។ កញ្ញា រីដា បានអញ្ជើញមកកាន់បន្ទប់ផ្សាយរបស់វីអូអេនិងបានផ្ដល់បទសម្ភាសន៍ដល់អ្នកស្រី ហុង ចិន្ដា នៃវីអូអេអំពីបទពិសោធន៍ទស្សនកិច្ចសិក្សារបស់កញ្ញានៅក្នុងសហរដ្ឋអាមេរិកនេះ។ កញ្ញា រីដា បានផ្ដាំផ្ញើដល់យុវជនកម្ពុជាឱ្យមានក្ដីស្រមៃធំនិងតាមចាប់យកក្ដីស្រមៃរបស់ខ្លួន ជាពិសេសខិតខំប្រឹងប្រែងរៀនសូត្រ៕