ព័ត៌មានអំពីកម្ពុជាមានដូចជា សង្គមស៊ីវិលបារម្ភការរឹតត្បិតសេរីភាព ក្រោយអ្នកយកព័ត៌មានម្នាក់ត្រូវហាមឃាត់មិនឲ្យថតវីដេអូទាក់ទងនឹងការបណ្តេញពលរដ្ឋចេញពីផ្ទះបណ្តែតទឹក។ ក្រុមសិទ្ធិមនុស្សព្រួយបារម្ភបន្ថែមទៀតអំពីសិទ្ធិសេរីភាពក្នុងការបញ្ចេញមតិ ក្រោយចាប់ខ្លួនសកម្មជនបរិស្ថានវ័យក្មេង៣នាក់។ រដ្ឋមន្រ្តីការបរទេសអង់គ្លេសនឹងមកបំពេញទស្សនកិច្ចនៅកម្ពុជា ដើម្បីពង្រឹងចំណងទាក់ទង។ នៅក្នុងកម្មវិធី Hello VOA មានកិច្ចពិភាក្សាអំពី «យុទ្ធនាការលើកស្ទួយការអប់រំរបស់យើង»។ រីឯព័ត៌មានអន្តរជាតិវិញមានដូចជា សហរដ្ឋអាមេរិកបញ្ជូនវ៉ាក់សាំងកូវីដ១៩ ចំនួន ២លាន ៥សែនដូសទៅឲ្យកោះតៃវ៉ាន់។ ប្រធានឧត្តមស្នងការជាន់ខ្ពស់អង្គការសហប្រជាជាតិសម្រាប់ជនភៀសខ្លួនពេញចិត្តនឹងការផ្លាស់ប្តូរកម្មវិធីតាំងទីលំនៅថ្មីរបស់ជនភៀសខ្លួនក្នុងសហរដ្ឋអាមេរិក។ អ្នកតំណាងសហរដ្ឋអាមេរិកស្នើជួបភាគីកូរ៉េខាងជើងនៅទីកន្លែងណាក៏បាន។ សហរដ្ឋអាមេរិកថា ការសម្រេចចិត្តលើបញ្ហានុយក្លេអ៊ែរអ៊ីរ៉ង់ គឺស្ថិតនៅលើលោក Khamenei ជាអ្នកសម្រេច។ អតីតប្រធានាធិបតីអាហ្វហ្គានីស្ថាន ប្រាប់សារព័ត៌មាន AP ថា សហរដ្ឋអាមេរិកបរាជ័យក្នុងប្រទេសអាហ្វហ្គានីស្ថាន៕
