ព័ត៌មានអំពីកម្ពុជាមានចំនួនបីគឺ អង្គការសុខភាពពិភពលោក (WHO) បានជំរុញឲ្យកម្ពុជារឹតបន្តឹងវិធានការនៅតាមច្រកចូលប្រទេសឲ្យបានហ្មត់ចត់ ដើម្បីបញ្ចៀសការនាំចូលជំងឺកូវីដ១៩ ក្រោយកម្ពុជាដកចេញនូវបម្រាមធ្វើដំណើរចំពោះប្រទេសចំនួន៦។ សេចក្ដីរាយការណ៍ទីពីរទាក់ទងនឹងបញ្ហាចម្រូងចម្រាសរវាងក្រុមហ៊ុនវៀតណាមហ័ងអាញ់ យ៉ាឡាយ(HAGL)ដែលទទួលបានដីសម្បទានពីរដ្ឋាភិបាលកម្ពុជា និងសហគមន៍ជនជាតិដើមភាគតិចក្នុងស្រុកអណ្តូងមាស ខេត្តរតនគិរី ដែលបាត់បង់ដីធ្លី នៅមិនទាន់ដោះស្រាយចេញនៅឡើយ។ សេចក្ដីរាយការណ៍ទីបីគឺជំងឺកូវីដ១៩បង្កផលប៉ះពាល់ដល់សង្វាក់ផ្គត់ផ្គង់សម្លៀកបំពាក់និងកម្មករនៅតំបន់អាស៊ី ដែលធ្វើឲ្យកម្មករត្រូវបាត់បង់ការងារ។ ព័ត៌មានអន្តរជាតិមានដូចជា សហរដ្ឋអាមេរិកចាប់ផ្ដើមបិទមិនឲ្យអ្នកដំណើរមកប្រទេសប្រេហ្ស៊ីលចូលក្នុងប្រទេស ក្រោយប្រទេសនេះមានករណីឆ្លងវីរុសកូរ៉ូណាច្រើនលំដាប់ទីពីរ បន្ទាប់ពីសហរដ្ឋអាមេរិក។ កប៉ាល់ដឹកប្រេងរបស់អ៊ីរ៉ង់ ដែលចតនៅក្នុងប្រទេសវ៉េណេហ្ស៊ុយអេឡាបំពានដល់ការដាក់ទណ្ឌកម្មរបស់សហរដ្ឋអាមេរិក។ ផ្សារភាគហ៊ុននៅតំបន់អាស៊ីនិងនៅសហរដ្ឋអាមេរិកចាប់ផ្ដើមឡើងថ្លៃ ដែលបង្ហាញពីការរើបឡើងវិញនូវសេដ្ឋកិច្ច។ រដ្ឋអាជ្ញារុស្ស៊ីចង់ឲ្យតុលាការដាក់ទោសជាប់ពន្ធនាគារយូរឆ្នាំដល់ពលរដ្ឋអាមេរិកាំងដែលជាប់ចោទពីបទចារកម្ម និងព័ត៌មានអន្តរជាតិផ្សេងៗទៀត៕
