ជា​ច្រើន​ទសវត្សរ៍​មក​ហើយ ការ​ជជែក​ដេញ​ដោល​របស់​បេក្ខជន​ប្រធានាធិបតី ត្រូវ​បាន​គេ​រៀប​ចំ​ឡើង​នៅ​​ក្នុង​បរិវេណ​សាកលវិទ្យាល័យ​ រួម​ទាំង​ការ​ជជែក​ដេញ​ដោល​របស់​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​​នៅ​រដ្ឋ New Hampshire កាល​ពី​ថ្ងៃ​ទី​៧ ខែ​កុម្ភៈ​ផង។ មូលហេតុ​គឺ​ដោយ​សារ​សាកលវិទ្យាល័យ​​នានា​តែង​មាន​សាលប្រជុំ​ធំ ទី​ធ្លា​ធំ​ទូលាយ​សម្រាប់​​ចត​រថយន្ត និង​មាន​បន្ទប់​​សម្រាប់​អ្នក​សារព័ត៌មាន​អាច​ធ្វើការ​​ក្នុង​ពិធី​ធំៗ​ស្រាប់។ ប៉ុន្តែ​ព្រឹត្តិការណ៍​ជជែក​ដេញ​ដោល​នេះ​ក៏​ផ្តល់​ដល់​និស្សិត​នូវ​ឱកាស​អាច​ចូលរួម​ផ្ទាល់​ក្នុង​សន្ទនា​នយោបាយ​ថ្នាក់​ជាតិ​បាន។ អ្នកស្រី Esha Sarai នៃ​វីអូអេ​បាន​ធ្វើ​ដំណើរ​ទៅ​កាន់​មហាវិទ្យាល័យ​ St. Anselm នៅ​ទី​ក្រុង Manchester​ រដ្ឋ New Hampshire ដើម្បី​ស្វែង​យល់​ពី​បទពិសោធន៍​ដែល​និស្សិត​ទទួល​បាន។ លោក សឹង សុផាត ជូន​សេចក្តី​ប្រែ​សម្រួល។