ប្រធានាធិបតីអាមេរិក លោក ដូណាល់ ត្រាំ បានបង្កើតឲ្យមានប្រវត្តិសាស្ត្រកាលពីពេលថ្មីៗនេះ ប៉ុន្តែមិនមែនជាប្រវត្តិសាស្ត្រដែលលោកចង់ឲ្យកើតមាននោះទេ។ ឥឡូវនេះ លោក ត្រាំ ក្លាយជាប្រធានាធិបតីអាមេរិកទី៤ ដែលត្រូវគេបើកការស៊ើបអង្កេតចោទប្រកាន់ទម្លាក់ពីតំណែង។ ការស៊ើបអង្កេតចោទប្រកាន់ទម្លាក់ពីតំណែងនេះ គឺជានីតិវិធីរបស់រដ្ឋធម្មនុញ្ញអាមេរិក ដែលសភាអាចដកប្រធានាធិបតីចេញពីតំណែងបាន។ ប្រវត្តិសាស្ត្របង្ហាញថា នយោបាយនៃការស៊ើបអង្កេតចោទប្រកាន់ទម្លាក់ពីតំណែងនេះ មានភាពស្មុគស្មាញ និងមានលក្ខណៈប្រថុយប្រថានខ្លាំង ហើយលទ្ធផលចុងក្រោយនិងផលប៉ះពាល់ជាញឹកញយមានការលំបាកក្នុងការទស្សន៍ទាយ។ លោក Jim Malone អ្នកឆ្លងឆ្លើយព័ត៌មានជាតិរបស់វីអូអេ រាយការណ៍លម្អិតពីរដ្ឋធានីវ៉ាស៊ីនតោន ហើយអ្នកស្រី ហុង ចិន្តា ជូនសេចក្តីប្រែសម្រួល៕