អ្នកនិពន្ធល្ខោននិយាយផ្ដោតលើបញ្ហាសង្គម
លោក សួង សុភ័ក្ត្រ អាយុ ៤១ឆ្នាំ គឺជាអ្នកនិពន្ធនិងដឹកនាំល្ខោននិយាយដ៏កម្រមួយរូប ដែលនៅតែបន្តខិតខំរក្សាទម្រង់សិល្បៈចំណាស់របស់កម្ពុជាគឺ «ល្ខោននិយាយ» នេះ ឲ្យនៅរស់រាន។ មានដើមកំណើតនៅខេត្តកណ្ដាល លោក សួង សុភ័ក្ត្រ បានមកសិក្សាថ្នាក់បរិញ្ញាបត្រផ្នែកល្ខោននិយាយនៅរាជធានីភ្នំពេញក្នុងឆ្នាំ១៩៩៦។ សព្វថ្ងៃនេះ ក្នុងនាមជាស្ថាបនិកនិងជានាយកនៃអង្គការសកម្មភាពសិល្បៈខ្មែរ លោក សួង សុភ័ក្ត្រ សរសេរនិងដឹកនាំការសម្ដែងល្ខោននិយាយនិងផលិតខ្សែភាពយន្តខ្លីៗដើម្បីបង្ហាញពីបញ្ហាសង្គមនានានៅកម្ពុជា។ កាលពីខែឧសភា លោក សួង សុភ័ក្ត្រ ត្រូវបានអញ្ជើញឲ្យមកធ្វើបទបង្ហាញក្នុងសន្និសីទសិល្បៈមួយ រៀបចំដោយដេប៉ាតឺម៉ង់សិល្បៈសម្ដែងសកលនិងនយោបាយ នៅឯសាកលវិទ្យាល័យ Georgetown ក្នុងរដ្ឋធានីវ៉ាស៊ីនតោន សហរដ្ឋអាមេរិក។ ក្នុងដំណើរចូលរួមសន្និសីទដែលបានអញ្ជើញសិល្បករជាង២០០រូបមកពីជាង៤០ប្រទេសនេះ លោក សួង សុភ័ក្ត្រ បានឆ្លៀតពេលចូលមកកាន់បន្ទប់ផ្សាយរបស់ VOA ដើម្បីផ្ដល់បទសម្ភាសន៍អំពីវិស័យល្ខោននិយាយនៅកម្ពុជា ដំណើរអាជីពជាអ្នកដឹកនាំល្ខោន និងសារៈសំខាន់នៃភាពច្នៃប្រឌិតក្នុងការអភិវឌ្ឍវប្បធម៌។