អ្នកចិញ្ចឹមឃ្មុំប៉ូឡូញព្រួយបារម្ភដោយសាររដ្ឋាភិបាលបើកឲ្យប្រើប្រាស់សារធាតុគីមីដែលគេហាមឃាត់
សត្វឃ្មុំមានសារៈសំខាន់ណាស់ចំពោះការផ្គត់ផ្គង់អាហាររបស់យើង។ ប៉ុន្តែ ហ្វូងឃ្មុំនៅជុំវិញពិភពលោក កំពុងធ្លាក់ចុះក្នុងកម្រិតមួយគួរអោយព្រួយបារម្ភ។ នេះជារឿងមិនល្អនៅទ្វីបអឺរ៉ុប ដែលដំណាំគ្រប់មុខប្រមាណ ៨០ភាគរយ ពឹងផ្អែកលើការក្រេបនិងរោយលំអងដោយសត្វល្អិត។ ហេតុផលធំមួយនៃការធ្លាក់ចុះចំនួនសត្វឃ្មុំ គឺការប្រើប្រាស់ថ្នាំសម្លាប់សត្វល្អិតដែលផ្ទុកសារធាតុគីមីម្យ៉ាងហៅថា «neonicotinoids» ដែលមានជាតិពុលខ្ពស់សម្រាប់សត្វឃ្មុំ។ ខណៈពេលដែលសារធាតុគីមី «neonicotinoids» នេះ ត្រូវបានហាមឃាត់នៅក្នុងសហភាពអឺរ៉ុប ប្រទេសជាសមាជិកនីមួយៗ អាចចេញករណីលើកលែង បើកឲ្យប្រើប្រាស់វាបាន។ ក្រសួងកសិកម្មប្រទេសប៉ូឡូញ បានអនុម័តជាបណ្ដោះអាសន្ន បើកឲ្យប្រើប្រាស់សារធាតុគីមី «neonicotinoids» នេះ ទៅលើដំណាំ rapeseed ដែលយកទៅចម្រាញ់ជាប្រេងឆា។នេះជាការព្រួយបារម្ភយ៉ាងខ្លាំង ចំពោះអ្នកចិញ្ចឹមឃ្មុំនៅប្រទេសប៉ូឡូញ។ អ្នកស្រី Julie Taboh នៃ VOA រាយការណ៍ពីរឿងនេះ។ លោក ចាប ចិត្រា ជូនសេចក្ដីប្រែសម្រួល៕
