កម្មវិធីវិទ្យុ
ព័ត៌មានពេលព្រឹក
ព័ត៌មានអំពីកម្ពុជាមានដូចជា ក្រុមកម្មករសំណង់រំឭកឡើងវិញនូវហេតុការណ៍បាក់អគារក្នុងខេត្តព្រះសីហនុកាលពីឆ្នាំមុន។ សហជីពកម្មករស្នើក្រសួងការងារជំរុញថៅកែឲ្យបន្តបើកប្រាក់ដំណាច់អតីតភាពការងារឲ្យកម្មករ។ កម្ពុជានិងចិនគ្រោងចុះហត្ថលេខាលើ«មូលនិធិពិសេស»ស្តីពីកិច្ចព្រមព្រៀងមេគង្គ-ឡានឆាង។ ព័ត៌មានអន្តរជាតិវិញមាន ទីផ្សារភាគហ៊ុនជុំវិញពិភពលោកធ្លាក់ចុះក្រោយព័ត៌មាននៃការឆ្លងកូវីដ១៩ច្រើនជាងបំផុតក្នុងមួយថ្ងៃ។ អង្គការសហប្រជាជាតិព្រមានថា វិធានការទប់ស្កាត់កូវីដ១៩អាចធ្វើឲ្យប៉ះពាល់ដល់ការផលិតនិងចែកចាយថ្នាំ antiretroviral ដែលគេប្រើសម្រាប់ព្យាបាលជំងឺអេដស៍។ សភាអាមេរិកនឹងបោះឆ្នោតលើសេចក្តីព្រាងច្បាប់កំណែទម្រង់ស្ថាប័នប៉ូលិសក្នុងសប្តាហ៍នេះ។ កូរ៉េខាងត្បូងថាសៀវភៅលោក John Bolton បំភ្លៃការពិតអំពីជំនួបរវាងលោកត្រាំនិងមេដឹកនាំកូរ៉េខាងជើង។ នៅពេលមានការបិទសាលារៀនដោយសារការរាតត្បាតជាសាកលនៃជំងឺកូវីដ១៩ ក្មេងស្រីៗនាំគ្នារៀបការដោយសង្ឃឹមថាចេញផុតពីភាពក្រីក្រ៕
ព័ត៌មានពេលរាត្រី
ព័ត៌មានអំពីកម្ពុជាមានដូចជា ស្រ្តីម្នាក់បដិសេធមិនមានទំនាក់ទំនងសេ្នហាជាមួយព្រះអង្គ លួន សុវ៉ាត ដូចឃ្លីបវីដេអូបង្ហោះលើហ្វេសប៊ុកនោះទេ។ កម្ពុជារកឃើញជំងឺកូវីដ១៩មួយករណីទៀតលើបុរសខ្មែរអាមេរិកាំងទើបមកពីអាមេរិក។ សិស្សថ្នាក់ទី១២បង្ហាញក្តីកង្វល់ចំពោះការប្រឡងបាក់ឌុបនាពេលខាងមុខ។ ព័ត៌មានអន្តរជាតិវិញមានដូចជា ក្រុមមន្រ្តីសុខាភិបាលសហរដ្ឋអាមេរិកផ្តល់សក្ខីកម្មអំពីការឆ្លើយតបរបស់សេតវិមានទៅលើវីរុសកូរ៉ូណា ខណៈសេតវិមានហាក់ចាត់ទុកអត្រាកើនឡើងនៃការឆ្លងជំងឺកូវីដ១៩ នៅសហរដ្ឋអាមេរិក ថាមិនសូវសំខាន់។ រដ្ឋបាលរបស់លោកប្រធានាធិបតី ដូណាល់ ត្រាំ ផ្អាកផ្តល់ទិដ្ឋាការអន្តោប្រវេសន៍ដល់ជនបរទេសសម្រាប់ធ្វើការស្របច្បាប់ក្នុងសហរដ្ឋអាមេរិករហូតដល់ចុងឆ្នាំនេះ។ វ៉ាក់សាំងរបេង កញ្ជ្រឹល និងស្វិតដៃជើង ប្រហែលជាអាចទប់ទល់នឹងជំងឺកូវីដ១៩ បាន។ ចិនគំរាមតបតនឹងសហរដ្ឋអាមេរិក រឿងបង្ក្រាបលើប្រព័ន្ធផ្សព្វផ្សាយ។ ចិន និងឥណ្ឌាឯកភាពគ្នាកាត់បន្ថយភាពតានតឹងនៅព្រំដែន ក្រោយពីមានការប្រយុទ្ធគ្នាដ៏ប្រល័យ និងព័ត៌មានអន្តរជាតិសំខាន់ៗមួយចំនួនទៀត៕
