ក្រុមអ្នកវិភាគនិយាយថា សេដ្ឋកិច្ចវៀតណាមនឹងទទួលបានផលប្រយោជន៍ខ្លាំងពីកិច្ចព្រមព្រៀងពាណិជ្ជកម្មរវាងប្រទេសចំនួន១២ ដែលត្រូវបានហៅថា កិច្ចព្រមព្រៀងឆ្លងមហាសមុទ្រប៉ាស៊ីហ្វិក (TPP) ដែលនាពេលបច្ចុប្បន្ន កិច្ចព្រមព្រៀងនេះកំពុងស្ថិតនៅក្រោមការពិចារណាដើម្បីអនុម័តដោយសមាជិកសភានៅក្នុងបណ្តាប្រទេសសមាជិកនីមួយៗ។ ប្រទេសនេះមានទីផ្សារគូរឲ្យទាក់ទាញសម្រាប់ការវិនិយោគនិងពាណិជ្ជកម្មបរទេស ក៏ដូចជាកំណើនសេដ្ឋកិច្ចដ៏ឆាប់រហ័សជាងគេមួយនៅតំបន់អាស៊ី។ វៀតណាមត្រូវបានរាយការណ៍ថា ត្រៀមនឹងក្លាយជាគូប្រជែងមួយរបស់ចិន។
លោក Sandeep Mahajan អ្នកសេដ្ឋកិច្ចធនាគារពិភពលោកប្រចាំទីក្រុងហាណូយ បាននិយាយថា វៀតណាមដែលជាប្រទេសមានចំណូលមធ្យមមួយ មានភាពលេចធ្លោជាងគេនៅក្នុងចំណោមបណ្តាប្រទេសជាសមាជិកកិច្ចព្រមព្រៀង TPP ដែលប្រទេសទាំងអស់នេះរួមគ្នា មាន៤០ភាគរយនៃទិន្នផលសរុបនៅលើពិភពលោក។
«សំណួរគឺថា តើពួកគេ (វៀតណាម) នឹងទទួលបានប្រយោជន៍ប៉ុន្មានពីកិច្ចព្រមព្រៀង TPP នេះ មិនមែនថាតើពួកគេអាចទទួលផលប្រយោជន៍ឬអត់នោះទេ។ យើងមានការប៉ាន់ប្រមាណ ដែលនឹងបង្ហាញជារួមថា នៅត្រឹមឆ្នាំ២០៣០ កិច្ចព្រមព្រៀងនេះនឹងជួយបន្ថែមប្រាំបីភាគរយទៅលើផលិតផលក្នុងស្រុកសរុបរបស់វៀតណាម តាមរយៈការចូលរួមរបស់ប្រទេសនេះនៅក្នុងកិច្ចព្រមពៀង TPP»។
នៅក្នុងចំណោមឧស្សាហកម្មសំខាន់ៗ ដែលនឹងទទួលបានផលប្រយោជន៍ពីកិច្ចព្រមព្រៀង TPP រួមមានវិស័យវាយនភណ្ឌ និងកាត់ដេររបស់វៀតណាម ក៏ដូចជាក្រុមហ៊ុនប្រតិបត្តិការនៅក្នុងខ្សែចង្វាក់ផ្គត់ផ្គង់ពិភពលោក ដូចជានៅក្នុងវិស័យទូរគមនាគមន៍ជាដើម ដែលវិស័យទាំងនេះអាចធ្វើឲ្យវៀតណាមឈានជិតស្មើរទៅនឹងចិនដែលជាមហាសេដ្ឋកិច្ចក្នុងតំបន់។
ក៏ប៉ុន្តែ ក្រុមអ្នកអត្ថាធិប្បាយវៀតណាមបង្ហាញការព្រួយបារម្ភទៅលើវិស័យសេដ្ឋកិច្ចដទៃៗទៀតដូចជាវិស័យកសិកម្ម ដែលពួកគេយល់ថា មានភាពងាយរងគ្រោះពីការប្រកួតប្រជែងពីសំណាក់ប្រទេសនាំចេញទិន្នផលកសិកម្មក្នុងទ្រង់ទ្រាយធំដូចជា អូស្រា្តលី។
ក្រុមអ្នកវិភាគបាននិយាយថា ផលចំណេញពីកិច្ចព្រមព្រៀង TPP នឹងផ្តល់ផលវិជ្ជមានបន្ថែមទៅទស្សនវិស័យសេដ្ឋកិច្ចដែលមានភាពវិជ្ជមានជាទូទៅរួចទៅហើយ។
ក្រុមហ៊ុនប្រឹក្សាសេដ្ឋកិច្ចឯករាជ្យ Capital Economics បានហៅវៀតណាមថាជា«ទីតាំងប្រកបដោយពន្លឺមួយក្នុងចំណោមទីតាំងមួយចំនួនតូចដែលកំពុងបញ្ចេញពន្លឺ» នៅអាស៊ី និងជាទីដែលកំណើនសេដ្ឋកិច្ចបានកើនឡើងរហូតដល់ប្រាំមួយភាគរយ នៅក្នុងរយៈពេលប៉ុន្មានឆ្នាំថ្មីៗនេះ។
វិនិយោគបរទេសថ្មីៗ ទៅក្នុងវៀតណាមក៏បានដើរតួយ៉ាងសំខាន់ផងដែរ ជាពិសេសក្រុមផលិតករដែលស្វែងរកជម្រើសថ្មីជំនួសឲ្យកំណើននៃចំណាយថ្លៃដើមនៅក្នុងប្រទេសចិន ដែលស្ថិតនៅជិតខាង។
លោក Daniel Martin អ្នកសេដ្ឋកិច្ចជាន់ខ្ពស់ផ្នែកតំបន់អាស៊ីរបស់ក្រុមហ៊ុន Capital Economics នៅប្រទេសសិង្ហបុរី បាននិយាយថា ឥឡូវនេះ កំណើននៃការនាំចេញដ៏ខ្លាំងក្លា និងមូលនិធិបរទេសជាកត្តាជំរុញដ៏សំខាន់ទៅលើសេដ្ឋកិច្ច។
«តាមពិតទៅ បើប្រៀបជាមួយនឹងប្រទេសដទៃទៀតនៅលើពិភពលោក ការនាំចេញរបស់វៀតណាមកំពុងតែមានដំណើរការយ៉ាងល្អប្រសើរ។ ហើយប្រសិនបើអ្នកសម្លឹងមើលផលិតករក្នុងស្រុក និងបរទេសវិញ អ្នកនឹងឃើញថា សឹងតែគ្រប់កំណើនទាំងអស់នៅក្នុងរយៈពេលប៉ុន្មានឆ្នាំចុងក្រោយនេះ ត្រូវបានជំរុញដោយផលិតករបរទេស»។
លោក Martins និយាយថា ការរួមបញ្ចូលគ្នារវាងបរិយាកាសពាណិជ្ជកម្មដែលមិនសូវមានបទបញ្ជារឹតបន្តឹងខ្លាំងក្លានៅវៀតណាម ជាមួយនឹងច្បាប់ពលកម្មប្រកបដោយភាពបត់បែនជាងមុន បានជំរុញឲ្យមានការគាំទ្រពីសំណាក់វិនិយោគិនបរទេស។
ធនាគារអភិវឌ្ឍន៍អាស៊ី (ADB) បាននិយាយថា ការវិនិយោគផ្ទាល់ពីបរទេស (FDI) នៅក្នុងឆ្នាំ២០១៤ បានកើនឡើងដល់១៥,៦ពាន់លានដុល្លារ ដោយមាន៤,៦ពាន់លានដុល្លារ ត្រូវបានផ្គត់ផ្គង់ទៅក្នុងគម្រោងឧបត្ថម្ភពីបរទេសដែលកំពុងមានដំណើរការនាពេលបច្ចុប្បន្ន។
ធនាគារអភិវឌ្ឍន៍អាស៊ី បានព្យាករណ៍រួចទៅហើយថា វៀតណាមនឹងបង្ហាញរបាយការណ៍ពីអត្រាកំណើនសេដ្ឋកិច្ចដែលមានលើសពីប្រាំមួយភាគរយនៅឆ្នាំ២០១៦ ដែលការកើនឡើងនេះនឹងធ្វើឲ្យប្រទេសនេះក្លាយជាអ្នកឈានមុខគេផ្នែកសេដ្ឋកិច្ចនៅក្នុងតំបន់អាស៊ីប៉ាស៊ីហ្វិក៕
ប្រែសម្រួលដោយ ណឹម សុភ័ក្រ្តបញ្ញា