នៅមុនថ្ងៃប្រកាសសាលក្រមលើសកម្មជនសង្គមជំនាញកសិកម្មលោក នី ណាក់ អ្នកស្រី សុខ ស៊ីណែត ដែលជាភរិយា ស្នើតុលាការដោះលែងស្វាមីឱ្យនៅក្រៅឃុំ ដោយអះអាងថា ស្វាមីអ្នកស្រីមានបញ្ហាសុខភាព និងស្រកទម្ងន់ ១៥ គីឡូ។
លោក នី ណាក់ ត្រូវបានចាប់ខ្លួនកាលពីថ្ងៃទី ៥ ខែមករា ឆ្នាំ ២០២៤ ក្រោមបទចោទ «ការមិនរាងចាលក្នុងបទមជ្ឈិម បន្ទាប់ពីការផ្តន្ទាទោសបទមជ្ឈិមបរិហារកេរ្តិ៍ជាសាធារណៈ និងញុះញង់ឱ្យមានការរើសអើង» ដែលប្តឹងដោយរដ្ឋមន្រ្តីក្រសួងការងារ លោក ហេង សួរ ពាក់ព័ន្ធនឹងការបង្ហោះសារនៅលើហ្វេសប៊ុករបស់លោក។
សាលាដំបូងរាជធានីភ្នំពេញនឹងប្រកាសសាលក្រមលើសំណុំរឿងរបស់លោក នៅព្រឹកថ្ងៃទី ២១ ខែវិច្ឆិកា ឆ្នាំ២០២៤ ខាងមុខនេះ បន្ទាប់ពីបានពន្យារពេលតាំងពីថ្ងៃទី ២២ ខែសីហា ឆ្នាំ ២០២៤។ នេះបើតាមភរិយាលោក នី ណាក់ និងមេធាវី។
អ្នកស្រី សុខ ស៊ីណែត ភរិយារបស់លោក នី ណាក់ ប្រាប់វីអូអេនៅថ្ងៃអង្គារថា ក្រោយស្វាមីជាប់ឃុំក្នុងពន្ធនាគារមណ្ឌលកែប្រែទី៣ ខេត្តត្បូងឃ្មុំ រយៈពេលជិតមួយឆ្នាំមកនេះ ស្វាមីរបស់ខ្លួនស្រកគីឡូពី ៨៣គីឡូ មកនៅត្រឹមតែ ៦៩គីឡូ។ អ្នកស្រីថា មូលហេតុនៃការស្រកគីឡូ ដោយសារតែការហូបចុកមិនគ្រប់គ្រាន់ សម្រាកមិនសូវបាន និងនោមញឹក។
ខណៈថ្ងៃប្រកាសសាលក្រមកាន់តែខិតជិតមកដល់ អ្នកស្រី សុខ ស៊ីណែត ស្នើសុំឱ្យតុលាការដោះលែងស្វាមីឱ្យនៅក្រៅឃុំ ដើម្បីវិលត្រឡប់មកប្រករបរកសិកម្មវិញ។
អ្នកស្រីថ្លែងថា៖ «សំណូមពរឱ្យតុលាការដោះលែងគាត់ឱ្យបាននៅក្រៅឃុំ ឱ្យគាត់បានបន្តកិច្ចការរបស់គាត់ដូចជាចំណេះជំនាញផ្នែកសិកម្មរបស់គាត់។ បើបន្តដាក់ឃុំគាត់នៅក្នុងហាក់ដូចជា ចំណេះជំនាញដែលគាត់ធ្លាប់ជួយប្រជាកសិករកន្លងមកហ្នឹងវាដូចជាកប់ទៅតាមគាត់នៅក្នុងគុក។ វាអត់មានផលអីចំណេញដល់សង្គមជាតិទេ។ បើដោះលែងគាត់ទៅ ឱ្យគាត់បាននៅក្រៅឃុំបន្តកិច្ចការរបស់ជួយសង្គមជាតិផ្នែកកសិកម្ម ជួយផ្តល់ចំណេះជំនាញដល់កសិករ ដែលតែងតែស្រឡាញ់រាប់អានគាត់ ដែលទទួលបានចំណេះដឹងពីគាត់កន្លងមក។ សង្ឃឹមថាអ៊ីចឹង»។
មេធាវីការពារក្តីឱ្យលោក នី ណាក់ លោក ជូង ជូងី សុំមិនធ្វើអត្ថាធិប្បាយ ដោយប្រាប់ឱ្យរងចាំលទ្ធផលនៃការប្រកាសសាលក្រមនាថ្ងៃទី ២១ ខែវិច្ឆិកា ខាងមុខនេះ។
វីអូអេមិនអាចសុំការអត្ថាប្បាយពី លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញបាននៅឡើយទេ។
លោក កត្តា អ៊ន អ្នកនាំពាក្យក្រសួងការងារ ប្រាប់វីអូអេនៅថ្ងៃអង្គារថា តុលាការមានចំណាត់ការដោយអនុលោមតាមអង្គហេតុ និងអង្គច្បាប់។ លោកបន្តថា ការសម្រេចបែបណា គឺជាឆន្ទានុសិទ្ធិរបស់ចៅក្រម។
លោកក៏ធ្លាប់ប្រាប់វីអូអេកាលពីកន្លងទៅថា លោក នី ណាក់ បានផ្សព្វផ្សាយ«ព័ត៌មានមិនពិត មានចេតនាទុច្ចរិតក្នុងការញុះញង់» បណ្តាលឱ្យប៉ះពាល់កិត្តិយសសេចក្តីថ្លៃថ្នូររបស់លោក ហេង សួរ ពាក់ព័ន្ធនឹងការចោទថាមានការកាត់ដីចំនួន ១០០ ហិកតានៅខេត្តកំពត ផ្តល់ទៅឈ្មោះ ហេង សួរ ដែលឈ្មោះនេះ មិនមែនជារដ្ឋមន្រ្តីក្រសួងការងារនោះទេ។
លោក នី ណាក់ ជាម្ចាស់គណនីសង្គមហ្វេសប៊ុកឈ្មោះ IMan-KH ដែលមានជំនាញក្នុងវិស័យកសិកម្ម និងតែងតែរិះគន់ចំណុចអវិជ្ជមាននានាក្នុងសង្គម ជាពិសេសពាក់ព័ន្ធនឹងវិស័យកសិកម្ម។
លោក នី សុខា ប្រធានសមាគមការពារសិទ្ធិមនុស្សអាដហុក យល់ថា ការឃុំខ្លួនលើអ្នកបញ្ចេញមតិមិនចំណេញសម្រាប់រដ្ឋាភិបាលទេ។ លោកថា ការបញ្ចេញមតិក្នុងសង្គមប្រជាធិបតេយ្យមានការបើកទូលាយសម្រាប់ប្រជាពលរដ្ឋដើម្បីចូលរួមឆ្លុះបញ្ចាំងភាពខ្វះខាតទៅរដ្ឋាភិបាល។
លោកប្រាប់វីអូអេនៅថ្ងៃអង្គារថា៖ «យើងនៅតែមានការទទួចស្នើទៅឱ្យរដ្ឋាភិបាល ពិសេសគឺតុលាការធ្វើយ៉ាងណា ធ្វើការដោះលែងអ្នកដែលជាប់ចោទ អ្នកដែលជាប់ឃុំដោយសារការប្រើប្រាស់សេរីភាពក្នុងបញ្ចេញមតិឱ្យមានសេរីភាពឡើងវិញ ដើម្បីឱ្យគាត់ចូលរួមចំណែកក្នុងការអភិវឌ្ឍសង្គមជាមួយគ្នាបន្តទៀត។ សម្រាប់បញ្ហាលោក នី ណាក់ ក៏មិនខុសគ្នាដែរ។ ខ្ញុំគិតថា ការឃុំខ្លួនលោក នី ណាក់ មិនមានអីចំណេញសម្រាប់រដ្ឋាភិបាលទេ»។
លោក នី ណាក់ ធ្លាប់ជាប់ពន្ធនាគារ ១៨ ខែ ពីបទ «ជេរប្រមាថជាសាធារណៈ និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍» កាលពីចុងឆ្នាំ ២០២០ ពាក់ព័ន្ធនឹងការបង្ហោះសារលើបណ្តាញទំនាក់ទំនងសង្គមហ្វេសប៊ុកក្នុងលក្ខណៈកំប្លែង រឿងទិញម៉ាស់ពាក់ឱ្យមាន់ អំឡុងពេលមានការឆ្លងរាតត្បាតជំងឺកូវីដ១៩៕