មន្រ្តីអង្គការសុខភាពពិភពលោក (WHO) ប្រចាំនៅកម្ពុជានៅថ្ងៃច័ន្ទនេះ បានអំពាវនាវឲ្យរដ្ឋាភិបាលកម្ពុជាចាំបាច់ត្រៀមសម្រាប់ការឆ្លងទ្រង់ទ្រាយធំ ប្រសិនបើវីរុសកូរ៉ូណានេះរាតត្បាត និងឆ្លងដល់សហគមន៍ ខណៈក្រសួងសុខាភិបាលកម្ពុជាបញ្ជាក់ថា ករណីឆ្លងនៅភ្នំពេញប៉ុន្មានថ្ងៃចុងក្រោយនេះអាចជាការឆ្លងទៅសហគមន៍ទ្រង់ទ្រាយតូច។
ក្នុងសន្និសីទសារព័ត៌មានមួយនៅថ្ងៃច័ន្ទនេះ ដែលរៀបចំដោយក្រសួងសុខាភិបាលកម្ពុជា ក្រោយមានការបញ្ជាពីលោកនាយករដ្ឋមន្រ្តី ហ៊ុន សែន លោកស្រី Li Ailan តំណាងអង្គការសុខភាពពិភពលោក (WHO) ប្រចាំនៅកម្ពុជា មានប្រសាសន៍ថា អាជ្ញាធរកម្ពុជាបានបំពេញការងារល្អមកដល់ពេលនេះ តាមការណែនាំរបស់អង្គការសុខភាពពិភពលោក ប៉ុន្តែលោកស្រីថាមានការងារច្រើនត្រូវបំពេញបន្ថែម ដើម្បីត្រៀមខ្លួនជាស្រេចសម្រាប់ការចម្លងទៅសហគមន៍ទ្រង់ទ្រាយធំ ក្នុងនោះមានការបង្កើនសម្ភារៈការពារខ្លួន [PPE] ឧបករណ៍ជំនួយផ្លូវដង្ហើម [Ventilator] និងគ្រូពេទ្យជំនាញជាដើម។
លោកស្រីបានថ្លែងថា៖ «ជាឧទាហរណ៍ថាតើយើងមានគ្រែមន្ទីរពេទ្យគ្រប់គ្រាន់ហើយ ឬនៅសម្រាប់ពិនិត្យព្យាបាលអ្នកជំងឺធ្ងន់ធ្ងរ? ខ្ញុំសប្បាយចិត្តដែលយើងបានត្រៀមសម្រាប់ចំណុចនេះថាតើយើងមានឧបករណ៍ជំនួយផ្លូវដង្ហើម (Ventilator) គ្រប់គ្រាន់ឬនៅ? តើយើងមានសម្ភារៈការពារខ្លួន (PPE) គ្រប់គ្រាន់ហើយឬនៅ ដោយសារប្រទេសជាច្រើនមានបទពិសោធន៍ខ្វះសម្ភារៈការពារខ្លួន។ហើយថាតើយើងមានសណ្ឋាគារឬក៏កន្លែងផ្សេងៗសម្រាប់ករណីស្រាលហើយឬនៅ? ហើយអ្វីជាសំខាន់ គឺថាពេទ្យព្យាបាល ឬក្រុមឆ្លើយតបបន្ទាន់ត្រូវតែពង្រីក ដើម្បីឆ្លើយតបនឹងការឆ្លងទ្រង់ទ្រាយធំ។ សម្រាប់ចំណុចនេះអង្គការសុខភាពពិភពលោកបានធ្វើការជាមួយក្រសួងសុខាភិបាល និងផ្នែកផ្សេងទៀត ដើម្បីធានាថា យើងបានត្រៀមល្អប្រសើរ»។
លោកស្រីបន្ថែមថា៖ «អាទិភាពចម្បង គឺត្រៀមខ្លួនរួចរាល់សម្រាប់ការចម្លងទ្រង់ទ្រាយធំ ពីព្រោះកម្ពុជាប្រហែលនឹងប្រឈមការចម្លងតាមសហគមន៍។ ទោះមិនមែនពេលនេះ តែយើងត្រូវតែត្រៀមសម្រាប់អនាគត»។
តំណាងអង្គការសុខភាពពិភពលោករូបនោះមានប្រសាសន៍ថា ប្រទេសកម្ពុជានៅតែជាការព្រួយបារម្ភខ្ពស់នៃការចម្លងទ្រង់ទ្រាយធំ ទោះរហូតមកដល់ពេលនេះករណីឆ្លងវីរុសកូរ៉ូណាមានចំនួនតែជាង ១២០ករណីក៏ដោយ។
នៅក្នុងសន្និសីទសារព័ត៌មាននោះដែរ រដ្ឋមន្រ្តីក្រសួងសុខាភិបាលលោក ម៉ម ប៊ុនហេង បានថ្លែងថា លទ្ធផលតេស្តបង្ហាញថា មិនមានករណីឆ្លងថ្មីទេនៅថ្ងៃច័ន្ទនេះ ហើយករណីសរុបមានចំនួន ១២២ដដែល។ លោកបន្តថា ការឆ្លងប៉ុន្មានថ្ងៃចុងក្រោយនៅភ្នំពេញ អាចជាការជាឆ្លងសហគមន៍ទ្រង់ទ្រាយតូច ប្រសិនបើក្រសួងរកមិនឃើញប្រភពច្បាស់លាស់នៃការឆ្លងនេះ។
លោកមានប្រសាសន៍ថា៖ «ក្រសួងសុខាភិបាលសូមធ្វើការកត់សម្គាល់ថា ការរកឃើញអ្នកមានវីរុសកូវីដ១៩ នៅរាជធានីភ្នំពេញ ក្នុងរយៈពេលប៉ុន្មានថ្ងៃចុងក្រោយនេះ នឹងអាចចូលជាករណីដែលចម្លងនៅក្នុងសហគមន៍ក្នុងទ្រង់ទ្រាយតូច»។
កាលពីប៉ុន្មានថ្ងៃកន្លងទៅ ក្រសួងសុខាភិបាលបានប្រកាសរកឃើញជនបរទេស ៤នាក់ ដែលស្នាក់នៅភ្នំពេញ ហើយឆ្លងវីរុសនេះ ក្នុងនោះមានជនជាតិចិន១នាក់ វៀតណាម២នាក់ និងកាណាដា១នាក់។ ចំនួនករណីកូវីដសរុប ដែលរកឃើញនៅភ្នំពេញ មានចំនួន ៣៧ រហូតមកដល់ពេលនេះ។ករណីជាសះស្បើយនៅទូទាំងប្រទេស មានចំនួន ៧៧ករណី និងជាសះស្បើយហើយឈឺមកវិញមាន ១ករណី។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ថ្លែងក្នុងសន្និសីទសារព័ត៌មាន ស្តីពីស្ថានភាពជំងឺកូវីដ១៩នៅកម្ពុជា ថ្ងៃច័ន្ទ ទី១៣ ខែមេសា ឆ្នាំ២០២០។ (ស៊ុន ណារិន/VOA)
បើតាមរដ្ឋមន្រ្តីសុខាភិបាល កម្ពុជាមានឧបករណ៍ជំនួយផ្លូវដង្ហើមប្រមាណ ២០០គ្រឿង ដែលត្រៀមសម្រាប់អ្នកជំងឺធ្ងន់ធ្ងរ។
លោក ម៉ម ប៊ុន ហេង មានប្រសាសន៍ថា៖ «យើងសង្ឃឹមថា យើងនឹងអាចឆ្លើយតបទៅនឹងតម្រូវការរបស់ប្រជាពលរដ្ឋយើងបាន ពីព្រោះថាអាហ្នឹងសម្រាប់តែអ្នកធ្ងន់។ ក្នុងចំណោមអ្នកធ្ងន់ប្រហែលជា១ទៅ២ភាគរយដែលប៉ះពាល់ដល់សួត»។
បើតាមរដ្ឋមន្រ្តី កម្ពុជាមានគ្រូពេទ្យជំនាញក្នុងការថែទាំព្យាបាលជំងឺកូវីដ១៩ ប្រមាណ ៦៧០នាក់។លោកបញ្ជាក់ថា កម្ពុជាអាចធ្វើតេស្តវត្ថុសំណាកទៅដល់ ៦០០សំណាកក្នុងមួយថ្ងៃ ដែលក្នុងនោះវិទ្យាស្ថានប៉ាស្ទ័រអាចធ្វើតេស្តចំនួន ៥០០ និងវិទ្យាស្ថានសុខភាពសាធារណៈអាចធ្វើតេស្តបានទៅដល់ ១០០។
បើតាមសេចក្តីប្រកាសព័ត៌មាន ដែលអានដោយរដ្ឋមន្រ្តីក្រសួងសុខាភិបាលនៅថ្ងៃច័ន្ទនេះ ចំនួនវត្ថុសំណាកដែលបានធ្វើវិភាគសរុបមាន ៨.៩០៩សំណាក ដែលចំនួននេះបើគិតក្នុងចំណោមប្រជាជន១ លាននាក់ គឺមានទៅដល់ ៥៥៦សំណាក ដែលធ្វើវិភាគ។ លោករដ្ឋមន្រ្តីមានប្រសាសន៍ថា ចំនួននេះច្រើនជាងប្រទេសក្នុងតំបន់ ក្នុងនោះមានមីយ៉ាន់ម៉ា ឡាវ ឥណ្ឌូនេស៊ី និងហ្វីលីពីន។
បើតាមលោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យរបស់ក្រសួងសុខាភិបាល ក្នុងចំណោមអ្នកធ្វើតេស្តទាំងអស់ជិត ៩ពាន់នោះ មានប្រជាជនកម្ពុជាប្រមាណ ៩០ភាគរយក្រៅ ពីនោះជាជនបរទេសមកប្រទេសកម្ពុជា ហើយកាលពីថ្ងៃអាទិត្យ ក្រសួងបានធ្វើតេស្តប្រជាជនប្រមាណ២០០នាក់។
ការធ្វើតេស្តរកវីរុសកូរ៉ូណាក្នុងតំបន់អាស៊ីអាគេ្នយ៍ក្នុងនោះមានប្រទេសកម្ពុជាផងដែរត្រូវបានអ្នកជំនាញសុខាភិបាលក្នុងតំបន់សង្ស័យថាការធ្វើតេស្តមានកម្រិតទាបនេះប្រហែលជាមិនអាចបង្ហាញអំពីអត្រាពិតប្រាកដនៃអ្នកឆ្លងជំងឺកូវីដ១៩បានទេ។ ក្រុមអ្នកជំនាញបារម្ភថាបើសិនជាការបង្ហាញចំនួនមិនពិតប្រាកដនៃអ្នកឆ្លងជំងឺកូវីដ១៩បង្កឲ្យមានភាពមិនសូវខ្វាយខ្វល់ នោះវាអាចធ្វើឲ្យវីរុសនេះកាន់តែរីករាលដាល។
លោកស្រីLaurence Barilនាយកវិទ្យាស្ថានប៉ាស្ទ័រកម្ពុជាបានថ្លែងថាមិនមានការលំបាកសម្រាប់ការធ្វើតេស្តរកវីរុសកូរ៉ូណានោះទេ ហើយវិទ្យាស្ថានបានត្រៀមខ្លួនរួចរាល់ហើយប្រសិនបើចាំបាច់ត្រូវការធ្វើតេស្តបន្ថែមទៀត។
លោកស្រីមានប្រសាសន៍ថា៖«ខ្ញុំគិតថាយើងមិនអាចនិយាយអំពីការលំបាកអ្វីទេនៅពេលនេះ។ សមត្ថភាពរបស់យើងគឺយើងអាចបង្កើន[ការធ្វើតេស្ត] ប្រសិនបើត្រូវការ។ អ្វីដែលសំខាន់បំផុតដែលខ្ញុំចង់និយាយ យើងមានកិច្ចសហប្រតិបត្តិការយ៉ាងជិតស្និទ្ធជាមួយដៃគូបច្ចេកទេសទាំងអស់ ហើយអ្វីដែលយើងកំពុងធ្វើ គឺរបៀបរៀបចំការពិសោធភាពមិនច្បាស់លាស់ណាមួយ[នៃជំងឺ] ប្រសិនបើចាំបាច់។ ឥឡូវនេះ យើងធ្វើការងារតាមសមត្ថភាព។ យើងស្ថិតនៅលើផ្លូវត្រូវសម្រាប់វិទ្យាស្ថានប៉ាស្ទ័រ»។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលមានប្រសាសន៍ថា រហូតមកដល់ពេលនេះមិនទាន់មានរូបមន្តព្យាបាលជំងឺកូវីដ១៩នេះ ដែលត្រូវបានទទួលស្គាល់ដោយអង្គការសុខភាពពិភពលោកនៅឡើយទេ។ លោកបញ្ជាក់ថា ការព្យាបាលរបស់គ្រូពេទ្យនៅពេលនេះ គឺជាការប្រតិបត្តិការងារជាក់ស្តែងរបស់គ្រូពេទ្យនៅកម្ពុជា ដោយពួកគេបានប្រើប្រាស់បញ្ញាទៅតាមរោគសញ្ញានីមួយៗ។
លោកមានប្រសាសន៍ថា៖ «ដូច្នេះខ្ញុំសូមបញ្ជាក់ម្តងទៀត មិនមានរូបមន្តព្យាបាលណាដែលទទួលស្គាល់ថាជានិយាមរបស់អង្គការសុខភាពពិភពលោក ដែលថាជានោះទេ»។
កន្លងទៅលោកនាយករដ្ឋមន្រ្តី ហ៊ុន សែន បានថ្លែងថា រដ្ឋាភិបាលបានរៀបចំគ្រែប្រមាណ ៣ពាន់នៅទូទាំងប្រទេស ដើម្បីត្រៀមសម្រាប់ដាក់ប្រជាជនដែលឆ្លងវីរុសកូរ៉ូណា។ គ្រែទាំងនោះ គឺជាការរៀបចំនៅតាមសាលារៀនទូទាំងប្រទេស ក្រោយរដ្ឋាភិបាលបានផ្អាកការសិក្សាជាបណ្តោះអាសន្នដោយមិនទាន់កំណត់ថ្ងៃចូលវិញ។
កាលពីសប្តាហ៍មុន លោក ហ៊ុន សែន បានសម្រេចលុបចោលការឈប់សម្រាកថ្ងៃចូលឆ្នាំខ្មែរសម្រាប់អ្នកធ្វើការរដ្ឋ និងឯកជន ក្នុងនោះមានកម្មកររោងចក្ររាប់ម៉ឺននាក់ផងដែរ ដើម្បីបញ្ចៀសការធ្វើដំណើរទៅស្រុកកំណើត និងការជួបជុំគ្នា ដែលអាចនាំមកនូវហានិភ័យនៃការឆ្លងវីរុសកូរ៉ូណា៕