សហរដ្ឋអាមេរិកបាននិយាយកាលពីថ្ងៃពុធម្សិលមិញថាខ្លួនជិតសម្រេចបានកិច្ចព្រមព្រៀងមួយអំពីរ៉ែកម្ររបស់អ៊ុយក្រែនដែលប្រើប្រាស់សម្រាប់ការផលិតផលិតផល
បច្ចេកវិទ្យានិងជាការសងរដ្ឋាភិបាលក្រុងវ៉ាស៊ីនតោនចំពោះតម្លៃគ្រាប់រំសេវដែលមានតម្លៃជាង ១រយពាន់លានដុល្លារដែលអាមេរិកបានបញ្ជូនទៅឱ្យរដ្ឋាភិបាលក្រុងកៀវដើម្បីការពារខ្លួនប្រឆាំងនឹងសង្គ្រាមឈ្លានពានរយៈពេល៣ឆ្នាំរបស់រុស្ស៊ី។
អ្នកស្រី Karoline Leavitt អ្នកនាំពាក្យសេតវិមានបាននិយាយថា«យើងខិតកាន់តែជិតសម្រេចបានកិច្ចព្រមព្រៀងគ្នាហើយ»។
នៅក្នុងរដ្ឋធានីកៀវ ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅឯសន្និសីទកាសែតថាកិច្ចព្រមព្រៀងក្របខណ្ឌសេដ្ឋកិច្ចបានត្រូវធ្វើរួចហើយ ក៏ប៉ុន្តែគឺថាការធានាសន្តិសុខរបស់សហរដ្ឋអាមេរិកដល់អ៊ុយក្រែនដែលរដ្ឋាភិ បាលក្រុងកៀវចាត់ទុកជាការសំខាន់នៅមិនទាន់បានព្រមព្រៀងគ្នានៅឡើយទេ។
លោក Zelenskyy ត្រូវគេរំពឹងថានឹងបំពេញទស្សនកិច្ចនៅរដ្ឋធានីវ៉ាស៊ីនតោននៅថ្ងៃសុក្រស្អែកនេះដើម្បីចរចាជាមួយលោកប្រធានាធិបតី Donald Trump ដែលបានសម្តែងនូវការមន្ទិលសង្ស័យអំពីការបន្តជួយឧបត្ថម្ភខាងយោធារបស់សហរដ្ឋអាមេរិកដល់អ៊ុយ ក្រែន។ ក្នុងប៉ុន្មានសប្តាហ៍ថ្មីៗនេះ លោកបានបដិសេធពុំនិយាយថាតើលោកចង់ឱ្យអ៊ុយក្រែនឈ្នះសង្គ្រាមនេះឬទេហើយបានផ្តួចផ្តើមការចរចាជាមួយប្រធានាធិបតីរុស្ស៊ីលោក Vladimir Putinដោយគ្មានការចូលរួមរបស់រដ្ឋាភិបាលក្រុងកៀវដើម្បីដោះស្រាយជម្លោះនេះដែលបានចាប់ផ្តើមដោយការឈ្លានពានរបស់រុស្ស៊ីកាលពី៣ឆ្នាំមុននៅសប្តាហ៍នេះ។
លោកប្រធានាធិបតី Trump បាននិយាយអំពីលោកប្រធានាធិបតី Zelenskyy កាលពីថ្ងៃអង្គារថា«ជាការពិត វាមិនមានបញ្ហាអ្វីជាមួយខ្ញុំទេ ប្រសិនបើលោក Zelenskyy ចង់បំពេញទស្សនកិច្ចនៅសេតវិមាន។ លោកចង់ចុះហត្ថលេខាលើកិច្ចព្រមព្រៀងសេដ្ឋ កិច្ចជាមួយខ្ញុំ។ ខ្ញុំយល់ថាវាជាកិច្ចព្រមព្រៀងដ៏ធំមួយ»។
មេដឹកនាំសហរដ្ឋអាមេរិកបាននិយាយថាលោកមានការមួរម៉ៅដែលលោក Joe Biden អតីតប្រធានាធិបតី បានយល់ព្រមឧបត្ថម្ភខាងយោធាដល់អ៊ុយក្រែនដោយមិនមានបទបញ្ញត្តិដែលថាអ៊ុយក្រែននឹងសងប្រាក់វិញ។ លោក Biden បានដឹកនាំក្រុមចម្រុះសម្ពន្ធមិត្តលោកខាងលិចនៅក្នុងការផ្តល់ជំនួយយោធាជាមធ្យោបាយមួយដើម្បីប្រយុទ្ធការឈ្លានពានរបស់រុស្ស៊ីដោយមិនបញ្ជូនកងទ័ពរបស់ខ្លួនឯងផ្ទាល់ដើម្បីប្រយុទ្ធប្រកៀកស្មាគ្នាជាមួយកងទ័ពអ៊ុយក្រែន។ លោក Zelenskyy និយាយថាជំនួយយោធាសហរដ្ឋអាមេរិកជាជំនួយឥតសំណងហើយមិនមែនជាប្រាក់កម្ចីដែលចាំបាច់ត្រូវតែសងវិញទេ។
លោក Zelenskyy បាននិយាយថាលោករំពឹងថានឹងមានការពិភាក្សាធំទូលាយជាមួយលោកប្រធានាធិបតី Trump៕