ប៉ុន្មានម៉ោងមុនសេចក្តីថ្លែងការណ៍របស់លោក មូបារ៉ាក់ លោក ចន ឃើរ៍រី (John Kerry) ប្រធានគណៈកម្មាធិការកិច្ចការបរទេសព្រឹទ្ធសភាថ្លែងថា ប្រជាពលរដ្ឋអេហ្ស៊ីប បានឈានហួស ប្រធានាធិបតីរបស់ខ្លួនទៅទៀត។ សមាជិកគណបក្សប្រជាធិបតេយពីរដ្ឋម៉ាស្សាជូស្ស៊ែតស៍ (Massachusetts) រូបនេះ បានថ្លែងថា ការដកខ្លួនថយពីការឈរឈ្មោះបោះឆ្នោតឡើងវិញ គឺជាជំហានទីមួយ ដែលប្រធានាធិបតីអេហ្ស៊ីបត្រូវធ្វើ។ លោកមានប្រសាសន៍ថា៖
«ត្រូវធ្វើឲ្យលើសពីនេះ គឺត្រូវរៀបចំឲ្យមានរដ្ឋាភិបាលចាំផ្ទះមួយក្នុងប៉ុន្មានខែខាងមុខនេះ ដើម្បីជៀសឲ្យមានអំពើហិង្សា និងជួយធ្វើឲ្យមានអន្តរកាលមួយដើម្បីរៀបចំប្រទេសអេហ្ស៊ីបឆ្ពោះទៅ រក អនាគតដែលប្រជាពលរដ្ឋអេហ្ស៊ីបប្រាថ្នានិងសមទទួលបាន»។
លោកលីនដ៍ស៊ី ហ្ក្រាហាម (Lyndsey Graham) សមាជិកព្រឹទ្ធសភាពីរដ្ឋសោធ ខារោឡាយណា (South Carolina) បានយល់ស្របនឹងការបង្កើតឲ្យមានរដ្ឋាភិបាលចាំផ្ទះមួយ ហើយជំរុញ ឲ្យរដ្ឋាភិបាលសរអាបន្តការចូលរួមរបស់ខ្លួន ក្នុងកិច្ចការអេហ្ស៊ីប។ លោកមានប្រសាសន៍ថា៖
«ខ្ញុំគិតថា ជាការប្រកបដោយគតិបណ្ឌិតសម្រាប់អាមេរិកក្នុងការចូលរួមជ្រោមជ្រែងឲ្យមានការផ្ទេរអំណាចមួយជាជាង មានគោលនយោបាយមិនរវល់សោះពីអេហ្ស៊ីបនោះ»។
រដ្ឋបាលអូបាម៉ាបានសរសើរការអំពាវនាវរបស់ប្រទេសអេហ្ស៊ីបឲ្យមានការផ្លាស់ប្តូរ តែនិយាយថា ប្រជាពលរដ្ឋអេហ្ស៊ីបត្រូវតែសម្រេចពីអនាគតរបស់ប្រទេសខ្លួនដោយខ្លួនឯង។ រាប់ទសវត្សរ៍មកហើយ ប្រទេសអេហ្សីបដែលជាប្រទេសមួយធំជាងគេ ទទួលជំនួយពីសរអាសរុបជាប្រាក់ទាំងអស់១ពាន់៥០០លានដុល្លារក្នុងមួយឆ្នាំនៅក្នុង១០ឆ្នាំកន្លងទៅនេះ។
លោក ដ្យូសេហ្វ លីប៊័រមែន (Joseph Lieberman) ជាសមាជិកព្រឹទ្ធសភាឯករាជ្យ មួយរូប នៃរដ្ឋ ខូននិកទីខាត់ (Connecticut) ថ្លែងថា ជំនួយទាំងនោះ ជាប្រាក់ដែលចាយទៅបានផលល្អ។ លោកបន្តថា៖
«ខ្ញុំបានគាំទ្ររដ្ឋាភិបាលមួយដែលក្នុងប៉ុន្មានឆ្នាំ កន្លងមាន តួនាទី សំខាន់ក្នុងការរក្សាឲ្យស្ថិរភាពនៅមជ្ឈឹមបូព៌ា។ ទីពីរគឺយើងបានផ្តល់ប្រាក់យ៉ាងច្រើនទៅឲ្យយោធាអេហ្ស៊ីប ហើយខ្ញុំគិតថា សូម្បីតែក្នុងពេលមានវិបត្តិនេះក្តី ក៏យើងឃើញថា យោធាអេហ្ស៊ីបបានដើរតួ នាទីសំខាន់ក្នុងការបង្រួបបង្រួមប្រទេសដែរ»។
លោក លីប៊័រមែន ថ្លែងថា ពេលនេះមិនមែនជាពេលសម្រាប់គំរាមកាត់បន្ថយជំនួយរបស់អាមេរិកដល់ប្រជាពលរដ្ឋអេហ្ស៊ីប ឬ យោធារបស់ប្រទេសនេះទេ។
សមាជិកព្រឹទ្ធសភា លីប៊័រមែន ថ្លែងទៀតថា លោកមិនមែនសន្មតស្មានៗថាថ្នាក់ដឹកនាំថ្មីនៅ អេហ្ស៊ីប នឹងទៅជាអ្នករករឿងជាមួយសរអាឬ ប្រទេសអ៊ីស្រាអែលនោះទេ។ តែលោកបន្ថែមថា ប្រធានាធិបតី មូបារ៉ាក អាចជួយធានាឲ្យមាន លទ្ធផលប្រសើរចេញពីវិបត្តិនេះ។ លោកថ្លែងថា៖
«លោកជាអ្នកស្នេហាជាតិ ជាអ្នកជាតិនិយមមួយរូប។ ហើយភាពដ៏វិសេសនៃការសាកល្បងចំពោះអ្នកមេដឹកនាំនោះ គឺថា តើអ្នកដឹកនាំនោះអាចបញ្ចប់ភាពដឹកនាំរបស់គេ និងផ្ទេរអំណាចទៅឲ្យអ្នកដឹកនាំថ្មីតាម របៀបណា។ យើងសង្ឃឹមថា នោះជាមធ្យោបាយមួយដែលល្អប្រសើរសម្រាប់ប្រទេសរបស់គេ។ ជាក់ស្តែងណាស់ប្រជាពលរដ្ឋអេហ្ស៊ីបបានសុំឲ្យមានការផ្លាស់ប្តូរ»។
សមាជិកព្រឹទ្ធសភាសរអាបានគាំទ្រជាសាធារណៈនូវការផ្លាស់ប្តូរនេះ ហើយជាទូទៅគេហាក់ដូចជាបង្ហាញឲ្យឃើញនូវសុទិដ្ឋិនិយមយ៉ាងប្រយ័ត្នប្រយែងរបស់គេទៅលើអ្វីដែលជាលទ្ធផលកើតចេញពីការផ្លាស់ប្តូរនោះ។
ប្រែសម្រួលដោយ នៅ សារីម