ការកម្សាន្តពេលរាត្រីនៅក្នុងប្រទេសថៃជាយូរយារណាស់មកហើយមានជាប់ពាក់ព័ន្ធនឹងសកម្មភាពស្របច្បាប់តិចតួចបំផុត។
ក្នុងពន្លឺភ្លើងដ៏សន្ធោសន្ធៅនៅក្នុងបានីយដ្ឋាន Go-Go ក្នុងទីក្រុងបាងកកដែលពួកអ្នករាំនិងអ្នករកស៊ីផ្លូវភេទស្លៀកសម្លៀកបំពាក់ខ្លីៗ បានប្រកបមុខរបររបស់ខ្លួនដោយចំហរ។
ពួកទេសចរនិងជនបរទេស បានទទួលទានភេសជ្ជៈរបស់ខ្លួនយ៉ាងស្ងប់ស្ងៀម ដោយគ្មានការខ្វល់ខ្វាយពីមុខមនុស្សនៅជុំវិញខ្លួនដែលពួកគេខ្លះជាអ្នកជួញដូរថ្នាំញៀននិងឃាតករដែលគេចង់ចាប់ខ្លួនបំផុតនៅក្នុងតំបន់។
ក៏ប៉ុន្តែ ពួកអ្នកគេចខ្លួនខ្លះមិនអង្គុយនៅបានីយដ្ឋានទេ។ រូបថតរបស់ពួកគេបានស្ថិតនៅលើ ប្រដាប់ដាក់ដបស្រាបៀរ គ្រឿងជិះរំអិលលេងនិងប្រអប់ឈើគូសដែលអតិថិជនប្រើប្រាស់។
អាជ្ញាធរប្រឆាំងគ្រឿងញៀនសហរដ្ឋអាមេរិកនិងអាជ្ញាធរថៃ និយាយថា ប្រហែលមានពួកឧក្រិដ្ឋជនដែលត្រូវចាប់ខ្លួនបំផុតកំពុងលាក់ខ្លួននៅក្នុងសហគមន៍នានានៅប្រទេសថៃ។
ហើយ ដើម្បីតាមចាប់ពួកឧក្រិដ្ឋជន ពួកគេកំពុងអនុវត្តវិធីថ្មីៗដូចជាដាក់បង្ហាញមុខមាត់ឧក្រិដ្ឋជនដែលត្រូវចាប់ខ្លួនបំផុតនៅលើឧបករណ៍ប្រើប្រាស់នៅបានីយដ្ឋាន ទាក់ទាញរកការគាំទ្រពីម្ចាស់បានីយដ្ឋានដូចជាអ្នកស្រីសាម៉ាង អេដវឺដ (Samang Edwards)។
អ្នកស្រីសំណាងបានលើកប៊ិចដែលពួកអាជ្ញាធរចែកឲ្យហើយបានលាតត្រដាងប័ណ្ណប្រកាសជនដែលចង់ចាប់ខ្លួនបំផុត។
«ខ្ញុំចង់ជួយចាប់ប្រភេទមនុស្សបែបនេះ។ ខ្ញុំមិនចូលចិត្តពីរបៀបដែលពួកគេជួញដូរថ្នាំញៀនឬធ្វើអ្វីៗទៀតនោះទេ។ វាជាការអាក្រក់មួយសម្រាប់ប្រជាពលរដ្ឋ»។
អ្នកស្រីសំណាងនិយាយថារូបភាពរបស់ពួកឧក្រិដ្ឋជនដែលចង់ចាប់ខ្លួនបំផុត មិនរំខានអតិថិជនរបស់អ្នកស្រី ដែលហាក់ដូចជាគាប់ចិត្តនឹងភាពថ្មីប្លែក។
ពួកភ្ញៀវដែលបានស្រវឹងតិចៗ អះអាងថាបានឃើញឧក្រិដ្ឋជនខ្លះដែលត្រូវចាប់ខ្លួនបំផុតនោះ។
ក៏ប៉ុន្តែ លោក នីកូឡៃ ខេឡេត(Nicolai Kehlet) ជនបរទេសជាតិហុល្លង់ បង្ហាញពីរូបភាពមនុស្សដែលចង់ចាប់ខ្លួនបំផុតនៅលើប្រដាប់ដាក់ដបស្រាបៀរដែលធ្វើឲ្យស្រាបៀរលោកត្រជាក់ ដែលរូបថតនោះរាងចាស់បន្តិច។
«ខ្ញុំមិនដឹងទេ។ ខ្ញុំចង់និយាយថា អ្វីៗដែលជួយចាប់ពួកឧក្រិដ្ឋជនទាំងនោះ នឹងមិនមានការខុសប្លែកទេ។ ដូចខ្ញុំ និយាយអញ្ចឹងវាជាការពិបាកដើម្បីវិនិច្ឆ័យផ្អែកលើរូបភាពទាំងនោះ។ ប្រសិនបើ អស់លោកអ្នកពិនិត្យមើលជុំវិញខ្លួនអស់លោកអ្នកឃើញមុខមនុស្សគ្រប់បែបយ៉ាង។ ហើយការទស្សន៍ទាយរបស់ខ្ញុំគឺថាពួកនោះបានផ្លាស់ប្តូរបន្តិចចាប់តាំងពីពេលនោះមក» ។
នៅលើគេបំផុតក្នុងបញ្ជីចង់ចាប់ខ្លួនរបស់ទីភ្នាក់ងារប្រឆាំងគ្រឿងញៀន (DEA) គឺវ៉េ ស្វេ កាង (Wei Hsueh Kang) មន្រ្តីជាន់ខ្ពស់មួយរូបរបស់កងទ័ពសហភាពរដ្ឋវ៉ា ជាក្រុមឧទ្ទាមជួញដូរថ្នាំញៀនដែលត្រួតត្រាមួយផ្នែកធំនៅតំបន់ភាគឥសាន្តប្រទេសភូមា។
លោកថូម៉ាស ប៉ាស្ការ៉េលឡូ (Thomas Pasquarello)នាយកទទួលបន្ទុកតំបន់អាស៊ីខាងកើតនៃទីភ្នាក់ងារប្រឆាំងគ្រឿងញៀននិយាយថាអាជ្ញាធរសហរដ្ឋអាមេរិក បានប្រម៉ាញ់រកលោក វ៉េ ចាប់តាំងពីទសវត្សរ៍១៩៩០ហើយកំពុងផ្តល់រង្វាន់រហូតដល់២លានដុល្លារចំពោះព័ត៌មាននាំឲ្យមានការចាប់ខ្លួនជននោះ។
«ពួកគេទទួលខុសត្រូវចំពោះថ្នាំញៀនរាប់តោនក៏ដូចជាថ្នាំម៉េតំហ្វេតាមីន (Methamphetamine) ដែរ។ អង្គការនោះ មានសមត្ថភាពផលិតគ្រឿងញៀនខុសច្បាប់រាប់ពាន់គីឡូក្រាម។ ហើយ លោកវ៉េ ស្វេកាងជាអ្នកនៅពីខាងក្រោយពិតប្រាកដដែលផ្គត់ផ្គង់ហិរញ្ញវត្ថុហើយជាមេក្លោងយ៉ាងធំ របស់អង្គការឧក្រិដ្ឋកម្មនោះ»។
ទោះជាប្រទេសថៃជាកន្លែងយកចិត្តទុកដាក់បំផុត ប្រទេសផ្សេងៗទៀត ចំនួន ៨នៅអាស៊ី ក៏កំពុងចូលរួមក្នុងកម្មវិធីនេះ ដែលជាប្រភេទកម្មវិធីបែបនេះលើក ដំបូងរបស់ខ្លួន។ ចាប់តាំងពីខែសីហាមក គេហទំព័ររបស់កម្មវិធីនោះមានអ្នក មើលជាង៧ម៉ឺននាក់ហើយធ្វើឲ្យមានតម្រុយចំនួន១២០ដែលកំពុងធ្វើការ ស៊ើបអង្កេត។ ទោះបី កម្មវិធីនោះមិនទាន់បានចាប់ឧក្រិដ្ឋជននៅឡើយ ក៏ដោយ លោកប៉ាស្ការ៉េលឡូ និយាយថាមានសញ្ញាថាកម្មវិធីនោះមានឥទ្ធិពលវិជ្ជមាន៖
«យើងបានទទួលសេចក្តីរាយការណ៍ពីមនុស្សកំពូលៗរបស់អង្គការទាំងនោះថាពួកគេមិនសប្បាយរីករាយជាមួយកម្មវិធីនេះទេ។ ពួកគេមិនសប្បាយរីករាយជាមួយការផ្សាយជាសាធារណៈទេ។ ហើយជាថ្មីម្តងទៀតចំពោះពួកសមាសភាពឧក្រិដ្ឋជន ពួកគេចង់ធ្វើការលួចលាក់ជៀសពីការតាមដានពីមន្រ្តីប្រតិបត្តិច្បាប់។ ហើយអ្វីដែលកម្មវិធីនេះធ្វើគឺលាតត្រដាងប្រតិបត្តិការរបស់ពួកគេហើយនឹងបញ្ចេញមុខបណ្តាញរបស់ពួកគេ។ ដូច្នេះ វាមានផលប៉ះពាល់លើប្រតិបត្តិការរបស់ពួកគេ»។
លោកប៉ាស្ការ៉េលឡូ និយាយថាពួកគេ នឹងវាយតម្លៃជោគជ័យរបស់កម្មវិធីនោះតាមរយៈព៌ត័មានដែលសាធារណជនផ្តល់ត្រឡប់មកវិញហើយនឹងការខ្សឹបប្រាប់ដ៏មានប្រយោជន៍ដែលបញ្ជូនមកវិញ៕
ប្រែសម្រួលដោយ ជឹង ប៉ូជីន