រដ្ឋាភិបាលកម្ពុជាយល់ព្រមអនុញ្ញាតិឲ្យអង្គការសហប្រជាជាតិ ចុះជួបនិងពិនិត្យក្រុមជនជាតិដើមភាគតិចតំបន់ភ្នំវៀតណាម។ ប៉ុន្តែ នៅមិនទាន់មានការកំណត់ពេលវេលាជាក់លាក់សម្រាប់ការចុះត្រួតពិនិត្យនេះនៅឡើយ។ លោកស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានយល់ព្រមឲ្យអង្គការសហប្រជាជាតិ ចុះពិនិត្យនិងសិក្សាស្ថានភាពជនជាតិដើមតំបន់ភ្នំវៀតណាមចំនួន ១៣នាក់ ដែលបានភៀសខ្លួនមកសុំសិទ្ធិជ្រកកោនក្នុងព្រៃនៃខេត្តរតនគីរី នេះបើយោងតាមមន្រ្តីជាន់ខ្ពស់អង្គការសហប្រជាជាតិនិងមន្ត្រីផ្លូវការកម្ពុជានៅថ្ងៃពុធនេះ។ ការចុះត្រួតពិនិត្យដោយមានកិច្ចសហការពីមន្ត្រីកម្ពុជា។
លោកស្រី វីវាន តាន់ ( Vivian Tan) អ្នកនាំពាក្យឧត្តមស្នងការអង្គការសហប្រជាជាតិសម្រាប់ជនភៀសខ្លួន (UNHCR) ប្រចាំតំបន់មានប្រសាសន៍តាមសារអេឡិកត្រូនិក(អ៊ីម៉ែល) នៅថ្ងៃនេះថា៖
«អាជ្ញាធរកម្ពុជា ការិយាល័យឧត្តមស្នងការសហប្រជាជាតិសម្រាប់សិទ្ធិមនុស្ស និងឧត្តមស្នងការអង្គការសហប្រជាជាតិសម្រាប់ជនភៀសខ្លួនបានព្រមព្រៀងគ្នាដើម្បីដឹកនាំបេសកកម្មរួមគ្នាទៅកាន់ខេត្តរតនគីរីនៅក្នុងពេលឆាប់ៗនេះ»។
មន្ត្រីអង្គការសហប្រជាជាតិដដែលបញ្ជាក់ថានៅមិនទាន់មានការកំណត់ពីកាលបរិច្ឆេទនៅឡើយ។
លោកស្រីវីវាន តាន់ អះអាងថា៖
«ជនជាតិតំបន់ភ្នំម៉ុងតាញ៉ាដែលត្រូវរកឃើញនឹងត្រូវដឹកជញ្ជូនមកកាន់ទីក្រុងភ្នំពេញដើម្បីធ្វើពាក្យសុំសិទ្ធិជាជនភៀសខ្លួន»។
នៅក្នុងសេចក្តីថ្លែងការណ៍នៅថ្ងៃពុធនេះ លោកនាយឧត្តមេសនីយ ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងថា លោកស ខេង បានបញ្ជាក់ប្រាប់ឯកអគ្គរដ្ឋទូតសហគមន៍អឺរ៉ុបប្រចាំកម្ពុជាលោក Jean-François Cautain ថា លោក«ស្វាគមន៍សំណើរ»ឲ្យមានមន្ត្រីនគរបាលចូលរួមជាមួយក្រុមរបស់អង្គការសហប្រជាជាតិឬក៏អនុញ្ញាតឲ្យអង្គការសហប្រជាជាតិ«ទាក់ទង»ជាមួយក្រុមជនជាតិដើមភាគតិចតាមសំណើររបស់លោកJean-François Cautain។
ចម្លើយនេះដែលលោក ស ខេង ធ្វើទៅកាន់ឯកអគ្គរដ្ឋទូតសហគមន៍អឺរ៉ុបកាលពីថ្ងៃទី៥ខែធ្នូ។ កាលពីថ្ងៃទី២ខែធ្នូឧត្តមស្នងការអង្គការសហប្រជាជាតិសម្រាប់ជនភៀសខ្លួន (UNHCR) បានសំដែងការព្រួយបារម្ភជាខ្លាំងចំពោះសេចក្តីរាយការណ៍ដែលថាអជ្ញាធររបស់ប្រទេសកម្ពុជាកំពុងស្វែងរកចាប់ខ្លួននិងបញ្ជូនជនជាតិដើមភាគតិចតំបន់ភ្នំទៅឲ្យរដ្ឋាភិបាលវៀតណាមវិញ។
ដំណាលគ្នានោះស្ថាប័នកំពូលក៏បានស្នើឲ្យមានបេសកកម្មរួមមួយរវាងអង្គការសហប្រជាជាតិនិងរដ្ឋាភិបាលទៅកាន់តំបន់ព្រំដែនដើម្បីយល់ពីស្ថានភាពនិងផ្តល់ភាពងាយស្រួលដល់ជនភៀសខ្លួន។
អង្គការសហប្រជាជាតិទទួលបន្ទុកផ្នែកជនភៀសខ្លួននេះព្រមានថា ការបញ្ជូនខ្លួនជនជាតិដើមភាគតិចចារ៉ាយទៅកាន់ប្រទេសវៀតណាមវិញដោយមិនគោរពតាមគោលការណ៍ស្មគ្រ័ចិត្ត គឺជាការរំលោភភារកិច្ចផ្លូវច្បាប់អន្តរជាតិ។
លោក Jean-François Cautain ឯកអគ្គរដ្ឋទូតសហគមន៍អឺរ៉ុបបានថ្លែងក្នុងសន្និសិទកាសែតមួយនៅល្ងាចនេះក្នុងទីក្រុងភ្នំពេញថាលោកបានផ្ញើលិខិតមួយទៅកាន់លោកស ខេង ហើយបានលើកអំពីកង្វល់របស់សហគមអឺរ៉ុបនិងរំលឹកប្រទេសកម្ពុជាអំពីកាតព្វកិច្ចរបស់កម្ពុជាក្នុងការគោរពសិទ្ធិជនភៀសខ្លួន។
«បើសិនជាជនជាតិដើមភាគតិចតំបន់ភ្នំម៉ុងតាញ៉ាត្រូវបានរកឃើញថា កំពុងស្វែងរកសិទ្ធិជ្រកកោន ពួកគេគួរតែមានឱកាសទៅកាន់អង្គការសហប្រជាជាតិនិងរដ្ឋាភិបាលដើម្បីកំណត់អំពីលក្ខខណ្ឌរបស់ពួកគេថា តើពួកគេជាជនភៀសខ្លួនឬជាពលករអន្តោប្រវេសន្ត»។
ជនជាតិដើមភាគតិចទាំង១៣នាក់នេះត្រូវគេរាយការណ៍ថាបានគេចខ្លួនពីការធ្វើទុក្ខបុកម្នេញរបស់អជ្ញាធរវៀតណាមផ្នែកសេរីភាពសាសនា សេរីភាពក្នុងការប្រើប្រាស់អ៊ីនធើណែតនិងសិទ្ធិដីធ្លី។ហើយពួកគេបានភៀសខ្លួនចូលក្នុងព្រៃនៃខេត្តរតនគីរីចាប់តាំងពីចុងខែតុលាមកម្ល៉េះដើម្បីស្វែងរកសិទ្ធិជ្រកកោននៅប្រទេសទី៣។
ក្នុងចំណោមជនភៀសខ្លួនទាំងនោះមានស្ត្រីម្នាក់ផងដែលទើបនឹងចេញពីពន្ធនាគាររបស់រដ្ឋាភិបាលក្រុងហាណូយ៕