អគ្គលេខាធិការអង្គការសហប្រជាជាតិ លោក Antonio Guterres ផ្ញើសាររំលែកទុក្ខជាមួយរដ្ឋាភិបាលកម្ពុជា និងក្រុមគ្រួសារសពទាហានមួកខៀវ៤រូប ដែលបានពលីជីវិតក្នុងបេសកកម្មរបស់អង្គការសហប្រជាជាតិ (អ.ស.ប.) នៅសាធារណរដ្ឋអាហ្វ្រិកកណ្ដាល កាលពីដើមខែឧសភា។
សាររំលែកទុក្ខរបស់អគ្គលេខាធិការ អ.ស.ប.នេះ ធ្វើឡើងតាមរយៈលិខិតផ្ញើជូនឯកអគ្គរាជទូតតំណាងអចិន្ត្រៃយ៍របស់កម្ពុជាប្រចាំអង្គការសហប្រជាជាតិ កាលពីថ្ងៃទី១៧ ខែឧសភា។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ដែលបានចេញផ្សាយនៅថ្ងៃអង្គារនេះ បានឱ្យដឹងថា នៅក្នុងលិខិតរំលែកទុក្ខនោះ លោក Antonio Guterres បានសម្ដែងការសោកស្ដាយក្រៃលែង នៅពេលលោកទទួលបានដំណឹងថា ទាហានមួកខៀវរបស់កម្ពុជាចំនួន៤រូប បានពលីជីវិតក្នុងពេលបំពេញការងារនៅសាធារណរដ្ឋអាហ្វ្រិកកណ្ដាល។
នៅក្នុងលិខិតដដែលនោះ លោក Antonio Guterres ក៏បានថ្លែងអំណរគុណចំពោះការរួមចំណែករបស់កម្លាំងរក្សាសន្តិភាពកម្ពុជាទាំង៤រូប ក្នុងការរក្សាសន្តិភាពនៅសាធារណរដ្ឋអាហ្វ្រិកកណ្ដាល។
កន្លងទៅ ស្ថានទូតមួយចំនួននៅក្នុងប្រទេសកម្ពុជាដូចជាស្ថានទូតសហរដ្ឋអាមេរិក ក៏បានចូលរួមរំលែកទុក្ខចំពោះការបាត់បង់យុទ្ធជនរបស់កម្ពុជាទាំង៤រូបផងដែរ។យុទ្ធជនពលីទាំងបួនរូបរួមមានលោក ម៉ៅ អេង លោក ស៊ាង នរិន្ទ លោក អ៊ឹម សំ និងលោក មុំ តុលា។ អ្នកទាំង៤បានបាត់បង់ជីវិតនៅក្នុងការវាយប្រហារមួយ ដោយពួកឧទ្ទាមនៅក្នុងសាធារណរដ្ឋអាហ្វ្រិកកាលពីថ្ងៃទី៨ ខែឧសភា។
សពរបស់អ្នកទាំង៤ ត្រូវបានដឹកមកដល់ប្រទេសកម្ពុជាកាលពីយប់ថ្ងៃអាទិត្យ ហើយត្រូវបានបញ្ជូនទៅឲ្យសាច់ញាតិដើម្បីធ្វើបុណ្យតាមប្រពៃណីខ្មែរ៕