បេសកកម្មជំនួយអ.ស.បនៅក្នុងប្រទេសអាហ្វហ្គានីស្ថាន ដែលហៅកាត់ថា UNAMA បានថ្កោលទោសការបំផ្ទុះគ្រាប់បែកអត្តឃាតមួយនៅថ្ងៃសៅរ៍នេះដែលបានបណ្តាលឲ្យមនុស្ស៣៥នាក់ស្លាប់ និងបានធ្វើឲ្យមនុស្សជាង១០០នាក់ទៀតត្រូវរបួស។
នៅក្នុងសេចក្តីថ្លែងការណ៍មួយ បេសកកម្ម UNAMA បាននិយាយថា ការបន្តការប្រើប្រាស់ការវាយប្រហារអត្តឃាតនៅក្នុងតំបន់មានមនុស្សរស់នៅកុះករអាចសន្មត់បានថា ជាឧក្រិដ្ឋកម្មសង្គ្រាម។សេចក្តីថ្លែងការណ៍នេះបានអំពាវនាវឲ្យក្រុមអ្នកធ្វើការវាយប្រហារនេះមានការទទួលខុសត្រូវជាបន្ទាន់។
លោក Fazal Ahmad Shirzad មេប៉ូលិសខេត្ត Nangarhar បាននិយាយប្រាប់ក្រុមអ្នកកាសែតថាការវាយប្រហារនេះបានកើតមានទ្បើងនៅថ្ងៃសៅរ៍នេះនៅខាងក្រៅធនាគារមួយនៅក្នុងក្រុង Jalalabad នាប៉ែកខាងកើតប្រទេសដែលនៅទីនោះក្រុមបុគ្គលិករដ្ឋាភិបាលបានទៅបើកប្រាក់ខែ។
អ្នកស្រុកក្រុង Jalalabad ម្នាក់បាននិយាយថា «ខ្ញុំឈ្មោះ Njibullah ខ្ញុំជាអ្នកស្រុកម្នាក់នៃក្រុង Jalalabad។ ខ្ញុំទើបតែមកពីក្រុងកាប៊ុល ខ្ញុំចុះចេញពីទ្បាននៅពេលមានការផ្ទុះមួយហើយបន្ទាប់មកមានការផ្ទុះមួយទៀត។នៅពេលខ្ញុំមកដល់ទីនេះខ្ញុំបានឃើញមនុស្សស្លាប់និងត្រូវរបួសច្រើននាក់ ហើយខ្ញុំបានជួយពួកគេ។ នេះជាអ្វីដែលខ្ញុំអាចធ្វើបានសម្រាប់បងប្អូនរួមជាតិខ្ញុំ»។
ក្រុមតាលីបង់បានបដិសេធថា ពួកគេគ្មានការទទួលខុសត្រូវដល់ការវាយប្រហារនេះទេ ហើយបានហៅការវាយប្រហារនេះថាជា «សកម្មភាពអាក្រក់គ្មានសីលធម៌»៕