រដ្ឋាភិបាលសហរដ្ឋអាមេរិក បានអបអរសាទរចំពោះកម្ពុជា ក្នុងពេលដែលកម្ពុជា រៀបចំបុណ្យខួបលើកទី៦៥ ដែលជាថ្ងៃឯករាជ្យជាតិ ដែលកម្ពុជាក្រោមការដឹកនាំ របស់សម្តេចឳសម្តេចព្រះនរោត្តម សីហនុ បានដណ្តើមពីបារាំង។
នៅក្នុងសេចក្តីប្រកាសព័ត៌មានរបស់លោករដ្ឋមន្ត្រីក្រសួងការបរទេសអាមេរិក ម៉ៃខល បុំប៉េអូ (Michael Pompeo) បានសរសេរថា៖
«ក្នុងនាមរដ្ឋាភិបាលសហរដ្ឋអាមេរិក ខ្ញុំសូមអបអរសាទរជាមួយពលរដ្ឋកម្ពុជានៅ ថ្ងៃបុណ្យខួបលើកទី៦៥ នៃទិវាឯករាជ្យជាតិថ្ងៃទី៩ វិច្ឆិកា។ ទំនាក់ទំនងរឹងមាំរវាង សហរដ្ឋអាមេរិក និងប្រជាជនកម្ពុជា ផ្តល់ផលប្រយោជន៍ដល់ប្រទេសយើងទាំងពីរ»។
សេចក្តីប្រកាសព័ត៌មានបញ្ជាក់ដូច្នេះ គឺដោយយោងថា មានទេសចរណ៍អាមេរិកាំងជាង ១៧០ ០០០ នាក់ (១សែន៧ម៉ឺននាក់) ក្នុងមួយឆ្នាំៗ បានធ្វើដំណើរទៅកាន់ប្រទេសកម្ពុជា ក្នុងពេលសហរដ្ឋអាមេរិករីករាយជាមួយការចូលរួមចំណែកដោយភាពចម្រុះ និងសម្បូណ៍បែបពីពលរដ្ឋខ្មែរ ក្នុងសហគមន៍នានានៃសង្គមអាមេរិកាំង។
«យើងសូមចូលរួមក្នុងក្តីសង្ឃឹមចំពោះការអភិវឌ្ឍន៍សង្គមដែលមានសេរីភាព ការរីកចម្រើន មានប្រជាធិបតេយ្យ និងយុត្តិធម៌»។
សហរដ្ឋអាមេរិក មានទំនាក់ទំនងល្អ និងល្អក់កករខ្លះដោយសារតែបញ្ហប្រជធិបតេយ្យ និងសិទ្ធិមនុស្សកម្ពុជាជាពិសេសចុងក្រោយនេះ ដែលគណបក្សជំទាស់ត្រូវតុលាការរំលាយ ហើយមិនបានចូលរួមការបោះឆ្នោតដែលផ្តល់ជ័យជន្នះទាំងស្រុង ទៅដល់គណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន។
លោកនាយករដ្ឋមន្ត្រី ហ៊ុន សែន នៃប្រទេសកម្ពុជា បានថ្លែងប្រាប់ពីការប្រុងប្រៀបធ្វើពិធីបុណ្យឯករាជ្យជាតិនៅថ្ងៃទី៩ វិច្ឆិកាខាងមុខ និង ការអរគុណដល់សម្តេចឳដែល បានដណ្តើមឯករាជ្យកាលពីឆ្នាំ១៩៥៣ ពីបារាំង។
«យើងពិតជាមានការដឹងគុណ អរព្រះគុណចំពោះសម្តេចព្រះបិតាជាតិរបស់យើង ដែលព្រះអង្គបានប្រឹងប្រែងតស៊ូដើម្បីនាំមកនូវឯករាជ្យសម្រាប់កម្ពុជារបស់យើង ហើយដែលនៅថ្ងៃសុក្រខាងមុខនេះក៏ជាថ្ងៃដែលប្រជាជនកម្ពុជានៅទូទាំងប្រទេស ទទួលការអបអរសាទរនូវខួបថ្ងៃឯករាជ្យជាតិរបស់កម្ពុជាដែលដណ្តើមយកមកដោយ លំបាកក្រោមព្រះរាជកិច្ចដឹកនាំរបស់សម្តេចព្រះបិតាជាតិ ព្រះបាទព្រះនរោត្តម សីហនុ ព្រះបរមរតនកោដ»។
លោកនាយករដ្ឋមន្ត្រីបានបង្ហាញឲ្យដឹងអំពីការបំផ្លាញឯករាជ្យនិងសន្តិភាពរបស់ កម្ពុជាកាលពីឆ្នាំ១៩៧០ ដែលមានរដ្ឋប្រហារទម្លាក់សម្តេចឳ ហើយនឹងការដែល កម្ពុជាត្រៀមរៀបចំខួបលើកទី២០ឆ្នាំនៅចុងឆ្នាំនេះ ដែលកម្ពុជាទទួលបានសន្តិភាព និងបញ្ចប់សង្គ្រាមពេញលេញសម្រាប់ការអភិវឌ្ឍន៍ប្រទេសផងដែរ៕