កាលពីព្រឹកថ្ងៃសុក្រនេះ នាង ឯក សុជាតា ឬសាសា ពិធីការិនីទូរស្សន៍ក្នុងស្រុកមួយ បានចូលបំភ្លឺចំពោះចៅក្រមស៊ើបសួរនៅតុលាការសាលាដំបូងក្រុងភ្នំពេញ លើករណីហិង្សាដ៏ព្រៃផ្សៃមកលើខ្លួន ខណៈពេលដែលជនល្មើស គឺឧកញ៉ា សុខ ប៊ុន កំពុងនិរទិសខ្លួននៅក្រៅប្រទេស។
អំពើហិង្សាលើនាង ឯក សុជាតា នាដើមខែកក្កដានេះមានចំណាប់អារម្មណ៍ពីសំណាក់សាធារណជន សង្គមស៊ីវិល និងមន្ត្រីរដ្ឋាភិបាល រួមទាំងលោក ហ៊ុន សែន និងភរិយាផងដែរ បន្ទាប់ពីវីដេអូនៃអំពើហិង្សាដ៏ព្រៃផ្សៃនេះ បានសាយភាយតាមបណ្តាញសង្គមហ្វេសប៊ុកនោះ។
វីដេអូបានពីកាមេរ៉ាសុវត្ថិភាពបានបង្ហាញថា លោកសុខ ប៊ុន ដែលគេស្គាល់ថា ជាឧកញ៉ា និងជាប្រធានក្រុមហ៊ុនអចលនទ្រព្យ ហើយនិង អង្គរក្សរបស់ខ្លួន បានធ្វើការវ៉ាយ ទាត់ធាក់លើនាងឯក សុជាតា ឬសាសា មុខពេលសម្រាតខោអាវ ខណៈពេលដែលតារារូបនេះព្យាយាមខាឃាំងមិនឲ្យលោកសុខ ប៊ុននាំយកស្ត្រីផ្សេងទៀតទៅជាមួយ។ ស្ត្រីរូបនោះស្ថិតក្នុងភាពស្រវឹងជោគជាំ។
បន្ទាប់ពីបានបំភ្លឺនឹងរៀបរាប់ហេតុការណ៍ចំពោះមុខចៅក្រមស៊ើបសួរ នាងឯក សុជាតាបានប្រាប់អ្នកសារព័ត៌មានដែលរង់ចាំនៅខាងក្រៅតុលាការក្រុងថា បន្ទាប់ពីមានការជំរុញពីសាធារណជន និងមន្ត្រីកម្ពុជា នាងបានសម្រេចប្តឹងលោកសុខ ប៊ុនទៅតុលាការក្រុងភ្នំពេញ ហើយចង់ឲ្យតុលាការកម្ពុជារកយុត្តិធម៌សម្រាប់ខ្លួន ដោយមិនទាន់គិតពីសំណងរដ្ឋប្បវេណីនៅឡើយ។
«ទី១ ទាក់ទងនឹងរឿងទារសំណងគឺសូមសំណូមពរ បងប្អូនទាំងអស់ក៏ដូចជាអ្នកសារព័ត៌មាន គឺគ្រួសារខ្ញុំអត់ទាន់ដែលនិយាយរឿងសំណងនៅឡើយនោះទេ។ កុំថា ឡើយរាប់ខ្ទង់លាន គឺអត់ដែលនិយាយទេ។ សូម្បីតែឥឡូវនេះ ចូលមកបំភ្លឺនេះគឺនាងខ្ញុំសូមឲ្យគាត់ចេញមកបំភ្លឺនៅមុខច្បាប់»។
បើទោះជាយ៉ាងនេះក៏ដោយ នាងសាសាបានបញ្ជាក់ថា នាងនៅតែមានសង្ឃឹមថា តុលាការនឹងអាចរកយុត្តិធម៌សម្រាប់នាង ហើយចង់ឲ្យជនលើសគឺលោកសុខ ប៊ុនចេញមុខមកតទល់ក្នុងតុលាការនោះ។
«បន្ទាប់ពីបានដាក់ពាក្យបណ្តឹង គឺគាត់បានធ្វើការតាមដំណាក់ការ។ អញ្ចឹងយុត្តិធម៌នៅតែមានក្នុងស្រុកយើង។ អញ្ចឹងមិនទាន់អស់សង្ឃឹម យើងរង់ចាំមើលបន្តទៀត។ កុំទាន់អាលធ្វើការវាយតម្លៃថា មិនមានយុត្តិធម៌ ឬដំណោះស្រាយ ហើយថា វាយូរអី គឺធ្វើការតាមលំដាប់»។
តាមការឲ្យដឹងពីលោកពុធ ធាវី មេធារីការពារក្តីរបស់ពិធីការិនីរូបនេះបានឲ្យដឹងថា កូនក្តីរបស់លោកបានចូលខ្លួនទៅរៀបរាប់ហេតុការណ៍នាយប់ថ្ងៃទី១ខែកក្កដានោះ។ លោកបានបន្តថា ការឆ្លើយបំភ្លឺនេះគឺធ្វើឡើងបន្ទាប់ពីព្រះរាជអាជ្ញាក្រុងភ្នំពេញចោទលោកសុខ ប៊ុនពីបទប្រើអំពើហិង្សាដោយចេតនា ហើយចោទអង្គរក្សរបស់លោកពីបទប្រើប្រាស់អាវុធ ដោយគ្មានការបញ្ជា និងប៉ុនប៉ងសម្លាប់។
លោកពុធ ធាវីបានក៏បានបញ្ជាក់ប្រាប់ VOAផងដែរថា សំណុំរឿងនេះនឹងអាចបើកសវនាការក្នុងពេលឆាប់ៗ។
ការបំភ្លឺរបស់តារារូបនេះគឺធ្វើឡើងមួយថ្ងៃប៉ុណ្ណោះ បន្ទាប់ពីលោកនាយករដ្ឋមន្ត្រីហ៊ុន សែនប្រកាសឲ្យជនល្មើសគឺលោកសុខ ប៊ុនចូលបង្ហាញខ្លួនចំពោះមុខតុលាការ។
កាលពីថ្ងៃព្រហស្បតិ៍ម្សិលមិញនេះ លោកនាយករដ្ឋមន្ត្រីហ៊ុន សែនបានហៅអំពើហិង្សាចំពោះនាងសាសានោះថា ជាអំពើសាហាវ យង់ឃ្នង ហើយលោកបានប្រាប់ឲ្យអាជ្ញាធរបស់ចាត់វិធានការតាម ច្បាប់ព្រហ្មទណ្ឌ។
«បើទោះបីជាក្មួយស្រីសាសាមិនប្តឹង ក៏ផ្នែករដ្ឋ ផ្នែកតុលាការត្រូវតែធ្វើសកម្មភាពដែរ។ ហើយបើទោះជាក្មួយស្រីសាសាធ្វើការសម្រុះសម្រួលជាមួយលោកសុខ ប៊ុន ក៏ផ្លូវតុលាការមិនអនុញ្ញាតឲ្យសំណុំរឿងនេះរួចដែរ ព្រោះវាជាសំណុំរឿងព្រហ្មទណ្ឌ ។ ដែលហៅថា រឿងព្រហ្មទណ្ឌហើយ ទោះបីជាសម្រួលគ្នាក្រៅតុលាការ ប៉ុន្តែឲ្យរលត់បណ្តឹងអាជ្ញាគឺអត់ទៅរួចទេ»។
គួរបញ្ជាក់ផងដែរថា លោកសុខ ប៊ុនបានរត់ភៀសខ្លួនចេញក្រៅប្រទេស បន្ទាប់ពីផ្ទុះរឿងហិង្សានេះ។ លោកធ្លាប់បានចេញលិខិតចំហ ជាច្រើន រួមទាំងសុំទោសជាសធារណៈ និងទទួលខុសត្រូវចំពោះមុខច្បាប់។
VOA មិនអាចទំនាក់ទំនងសុំការអធិប្បាយពីមេធាវីរបស់លោកសុខ ប៊ុនបានទេ៕