ក្រុមផ្ទេរតំណែងប្រធានាធិបតីជាប់ឆ្នោតអាមេរិកលោក Donald Trump កំពុងផ្តល់អនុសាសន៍ឲ្យផ្លាស់ប្តូរខ្លាំងក្លាដោយកាត់ផ្តាច់ការគាំទ្ររថយន្តអគ្គិសនីនិងស្ថានីយសាកអាគុយរថយន្ត និងពង្រឹងវិធានការទប់ស្កាត់ការនាំចូលរថយន្ត គ្រឿងបន្លាស់ និងអាគុយរថយន្តពីចិន។ នេះបើយោងតាមទីភ្នាក់ងារសារព័ត៌មាន Reuters ដែលបានរាយការណ៍កាលពីថ្ងៃចន្ទដោយផ្អែកលើឯកសារមួយដែលខ្លួនបានឃើញ។
អនុសាសន៍ទាំងនោះបានធ្វើឡើងនៅពេលដែលការវិវត្តទៅប្រើរថយន្តអគ្គិសនីនៅសហរដ្ឋអាមេរិកនៅជាប់គាំង ហើយឧស្សាហកម្មរថយន្តអគ្គិសនីដែលមានរដ្ឋឧបត្ថម្ភធនដ៏សម្បើមរបស់ចិនបន្តកើនឡើង។
ក្រុមផ្ទេរតំណែងលោក Trump ក៏បានផ្តល់អនុសាសន៍ផងដែរឲ្យដាក់ពន្ធគយលើទំនិញអាគុយគ្រប់ប្រភេទទូទាំងសាកលលោកដើម្បីជំរុញផលិតកម្មរបស់អាមេរិក ហើយបន្ទាប់មកចរចាលើកលែងពន្ធដល់ប្រទេសសម្ព័ន្ធមិត្តនីមួយៗ។ នេះបើតាមឯកសារនោះ។
ជារួម អនុសាសន៍ទាំងនោះគឺជាការធ្វើផ្ទុយពីគោលនយោបាយរបស់រដ្ឋបាលប្រធានាធិបតីអាមេរិកលោក Joe Biden ដែលស្វះស្វែងធ្វើឲ្យមានតុល្យភាពដោយការលើកទឹកចិត្តសង្វាក់ផ្គត់ផ្គង់អាគុយក្នុងប្រទេសផ្ដាច់ចេញពីចិនតាមរយៈការវិវត្តទៅប្រើរថយន្តអគ្គិសនីយ៉ាងឆាប់រហ័ស។
ផែនការរបស់ក្រុមផ្ទេរតំណែងលោក Trump នេះនឹងបង្វែរថវិកាដែលនៅពេលបច្ចុប្បន្ននេះត្រូវបានប្រើប្រាស់សម្រាប់ការសាងសង់ស្ថានីយសាកអាគុយនិងការធ្វើឲ្យរថយន្តអគ្គិសនីមានតម្លៃសមរម្យទៅក្នុងអាទិភាពការពារជាតិវិញ ដែលរួមមានទាំងការសម្រេចឲ្យបាននូវការផ្គត់ផ្គង់អាគុយនិងធាតុផ្សំសំខាន់ៗដើម្បីផលិតអាគុយទាំងនេះមិនពាក់ព័ន្ធនឹងចិនផងដែរ។
សំណើនេះចេញមកពីក្រុមផ្ទេរតំណែងរបស់លោក Trump ដែលមានភារកិច្ចធ្វើសេចក្តីព្រាងយុទ្ធសាស្ត្រសម្រាប់អនុវត្តភ្លាមៗនូវគោលនយោបាយថ្មីស្តីពីរថយន្ត។ គោលនយោបាយថ្មីនេះអាចប៉ះពាល់ដល់ការលក់និងការផលិតរថយន្តអគ្គិសនីរបស់អាមេរិក នៅចំពេលដែលក្រុមហ៊ុនផលិតរថយន្តម៉ាកល្បីៗដូចជា General Motors និង Hyundai ជាដើមបានចេញលក់រថយន្តអគ្គិសនីរបស់ខ្លួនក្នុងទីផ្សារអាមេរិកកាលពីពេលថ្មីៗនេះ៕