លោក Jeff Sessions រដ្ឋមន្ត្រីក្រសួងយុត្តិធម៌សហរដ្ឋអាមេរិក បានប្រាប់សភាកាលពីថ្ងៃសៅរ៍ម្សិលមិញថា លោកនឹងផ្ដល់សក្ខីកម្មនៅពីមុខគណៈកម្មាធិការស៊ើបការណ៍សម្ងាត់របស់ព្រឹទ្ធសភា ដែលកំពុងធ្វើការស៊ើបអង្កេតករណីការជ្រៀតជ្រែករបស់ប្រទេសរុស្ស៊ីនៅក្នុងការបោះឆ្នោតប្រធានាធិបតីសហរដ្ឋអាមេរិក កាលពីឆ្នាំមុន។
លោក Sessions បាននិយាយថា លោកចង់បង្ហាញខ្លួននៅពីមុខគណៈកម្មាធិការព្រឹទ្ធសភានេះ ដើម្បីឆ្លើយទៅនឹងសំណួរអំពីរូបលោក ដែលបានលេចឡើងកាលពីសប្ដាហ៍មុន នៅក្នុងអំឡុងពេលការផ្ដល់សក្ខីកម្មរបស់លោក James Comey អតីតនាយកទីភ្នាក់ងារ FBI។
លោក Sessions បញ្ជាក់ថា លោកនឹងផ្ដល់សក្ខីកម្មនៅពីមុខគណៈកម្មាធិការព្រឹទ្ធសភានេះ នៅថ្ងៃអង្គារខានស្អែក ដែលការផ្ដល់សក្ខីកម្មរបស់លោកនឹងធ្វើឡើងដោយមានការស្បថស្បែផងដែរ។ លោកមិនបានបញ្ជាក់ថា តើការផ្ដល់សក្ខីកម្មរបស់លោកនឹងធ្វើឡើងជាសាធារណៈ ឬក៏ក្នុងលក្ខណៈបិទទ្វារនោះទេ។
ក្រសួងយុត្តិធម៌ ដែលដឹកនាំដោយលោក Sessions កន្លងមកបានធ្វើការស៊ើបអង្កេតអំពីទំនាក់ទំនងរវាងរដ្ឋាភិបាលរុស្ស៊ី និងអង្គការយុទ្ធនាការឃោសនាបោះឆ្នោតរបស់លោកប្រធានាធិបតី Donald Trump នៅមុនការបោះឆ្នោតប្រធានាធិបតីកាលពីខែវិច្ឆិកា ឆ្នាំមុន ដែលនៅពេលនោះ លោក Trump នៅជាបេក្ខជនប្រធានាធិបតីមកពីគណបក្សសាធារណរដ្ឋនៅឡើយ។
លោក Sessions បានដកខ្លួនលោកចេញពីករណីស៊ើបអង្កេតរបស់ក្រសួងយុត្តិធម៌នេះ នៅក្នុងអំឡុងពេលប៉ុន្មានថ្ងៃដំបូងនៃការឡើងកាន់តំណែងជាប្រធានាធិបតីរបស់លោក Trump ដោយសារតែលោកជាមន្ត្រីយុទ្ធនាការឃោសនាបោះឆ្នោតមួយរូប ដែលធ្លាប់បានជួបជាមួយនឹងអគ្គរដ្ឋទូតរុស្ស៊ីប្រចាំសហរដ្ឋអាមេរិក មុនពេលការបោះឆ្នោត៕