រដ្ឋមន្រ្តីក្រសួងមហាផ្ទៃ លោក ស ខេង រដ្ឋមន្ត្រីក្រសួងអប់រំ លោក ហង់ ជួនណារ៉ុន រដ្ឋមន្ត្រីក្រសួងបរិស្ថាន លោក សាយ សំអាល់ និងរដ្ឋមន្ត្រីក្រសួងសុខាភិបាលលោក ម៉ម ប៊ុនហេង នឹងចេញដំណើរទៅបំពេញទស្សនកិច្ចជាផ្លូវការរយៈពេលមួយសប្តាហ៍ នៅប្រទេសអាល្លឺម៉ង់ នាចុងខែកញ្ញាខាងមុខ។ គោលដៅគឺដើម្បីពង្រឹងចំណងទាក់ទងទ្វេភាគីនិងដើម្បីសិក្សាបន្ថែមពីវិមជ្ឈការនៅអាល្លឺម៉ង់។
នេះគឺជាដំណើរទស្សនកិច្ចដ៏កម្រមួយរបស់ក្រុមរដ្ឋមន្ត្រីរបស់ប្រទេសកម្ពុជា ទៅកាន់ប្រទេសសមាជិកសហភាពអឺរ៉ុបមួយនេះ។ លោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃនឹងដឹកនាំគណៈប្រតិភូជាន់ខ្ពស់នេះ។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់វីអូអេថា ការធ្វើទស្សនកិច្ចនៅប្រទេសអាល្លឺម៉ង់នេះ ទទួលបានការអនុញ្ញាតពីលោកនាយករដ្ឋមន្រ្តី ហ៊ុន សែន និងថា ក្នុងគោលបំណងដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ។
«ក្រោយពីការបោះឆ្នោត អាល្លឺម៉ង់គាត់បានសន្យាថា គាត់នឹងធ្វើកិច្ចសហប្រតិបត្តិការជាមួយនឹងរដ្ឋាភិបាលរបស់រាជរដ្ឋាភិបាលកម្ពុជាអាណត្តិទី៦ហ្នឹង តាំងពីប្រកាសលទ្ធផលបោះឆ្នោតម្ល៉េះ។ ដូច្នេះហើយនេះជាលទ្ធផលផ្លែផ្កាដែលភាគីអាល្លឺម៉ង់បានប្រកាសក្រោយការបោះឆ្នោតឆ្នាំ២០១៨»។
គណៈប្រតិភូនៃរដ្ឋមន្ត្រីទាំងបួនរូបនឹងចេញដំណើរទៅកាន់ប្រទេសអាល្លឺម៉ង់នៅថ្ងៃទី២៤ ខែកញ្ញា និងត្រូវបញ្ចប់ទស្សនកិច្ចនៅទីនោះ នៅថ្ងៃទី៣០ខែកញ្ញាដដែល។ ប៉ុន្តែនាយឧត្តមសេនីយ៍ ខៀវ សុភ័គ បដិសេធមិនបញ្ជាក់លម្អិតអំពីរបៀបវារៈនៃដំណើរទស្សនកិច្ចនេះទេ។
អាល្លឺម៉ង់គឺជាប្រទេសដែលមានប្រវត្តិឆ្លងកាត់បទពិសោធន៍នៃអំពើប្រល័យពូជសាសន៍ដូចគ្នាទៅនឹងប្រទេសកម្ពុជាដែរ។
បច្ចុប្បន្ន អាល្លឺម៉ង់គឺជាប្រទេសកាន់លទ្ធិប្រជាធិបតេយ្យធំមួយក្នុងទ្វីបអឺរ៉ុប ដែលត្រូវបានគេទទួលស្គាល់ថា សេរីភាពក្នុងការបញ្ចេញមតិនិងសេរីភាពផ្នែកសារព័ត៌មាននៅទីនោះ មានភាពទូលំទូលាយខ្លាំង។
ថ្លែងអំពីគម្រោងទស្សនកិច្ចរបស់ក្រុមរដ្ឋមន្រ្តីកម្ពុជាទាំង៤រូបនោះ អ្នកនាំពាក្យស្ថានទូតអាល្លឺម៉ង់ប្រចាំកម្ពុជា ប្រាប់ VOA តាមរយៈសារអេឡិចត្រូនិចឬអ៊ីមែលដោយមិនបញ្ចេញឈ្មោះថា ក្រសួងសហព័ន្ធកិច្ចសហប្រតិបត្តិការនិងអភិវឌ្ឍន៍អាល្លឺម៉ង់បានអញ្ជើញគណៈប្រតិភូកម្ពុជាទៅធ្ចើទស្សនកិច្ចសិក្សាស្តីពីវិមជ្ឈការនៅអាល្លឺម៉ង់ គឺដោយសារអាល្លឺម៉ង់បានគាំទ្រដល់រាជរដ្ឋាភិបាលកម្ពុជាក្នុងការផ្តល់វិមជ្ឈការនេះជាងមួយទសវត្សរ៍មកហើយ។ ហើយដំណើរទស្សនកិច្ចនេះមានគោលបំណងជំរុញវិមជ្ឈការដែលកំពុងបន្តនៅកម្ពុជា។
វិមជ្ឈការគឺជាការធ្វើឲ្យប្រសើរឡើងនូវការគ្រប់គ្រងតាមបែបប្រជាធិបតេយ្យនិងអភិបាលកិច្ចល្អនៅថ្នាក់រដ្ឋបាលក្រោមជាតិ។
មន្ត្រីការទូតដដែលបញ្ជាក់តាមន័យដើមថា៖ «តាមការស្នើសុំរបស់រាជរដ្ឋាភិបាលកម្ពុជាដំណើរទស្សនកិច្ចសិក្សានេះផ្តោតលើការផ្តល់សេវាក្នុងវិស័យសុខាភិបាលសាធារណៈ ការអប់រំ ការគ្រប់គ្រងកាកសំណល់រឹងនិងព្រៃឈើ។ ផ្នែកគោលនយោបាយទាំងអស់នេះមានការពាក់ព័ន្ធខ្ពស់ក្នុងបរិបទនៃប្រទេសកម្ពុជា»។
តាមគម្រោង គណៈប្រតិភូកម្ពុជានឹងត្រូវជួបជាមួយមន្រ្តីរដ្ឋាភិបាលអាល្លឺម៉ង់ក្នុងតំបន់ មន្រ្តីការិយាល័យការបរទេសសហព័ន្ធអាល្លឺម៉ង់ ក្រសួងមហាផ្ទៃអាល្លឺម៉ង់និងក្រសួងសហប្រតិបត្តិការសេដ្ឋកិច្ចនិងអភិវឌ្ឍន៍សហព័ន្ធអាល្លឺម៉ង់ ព្រមទាំងសមាជិកសភាអាល្លឺម៉ង់ ដែលហៅថា German Bundestag។
លោកបណ្ឌិត ឈាង វណ្ណារិទ្ធ នាយកវិទ្យាស្ថានចក្ខុវិស័យអាស៊ី និងជាអ្នកវិភាគកិច្ចការតំបន់ប្រាប់ VOA ថា ការអញ្ជើញថ្នាក់រដ្ឋមន្រ្តីជាក្រុមទៅធ្វើទស្សនកិច្ចនៅប្រទេសអាល្លឺម៉ង់នេះ បង្ហាញពីការផ្តោតការយកចិត្តទុកដាក់របស់អាល្លឺម៉ង់ចំពោះដំណើរការលទ្ធិប្រជាធិបតេយ្យនិងវិមជ្ឈការនៅកម្ពុជា។
«អាល្លឺម៉ង់ គោលនយោបាយការបរទេសគេមានភាពបត់បែនល្អចំពោះកម្ពុជា ហើយប្រហែលជាគេយល់ពីស្ថានការណ៍នៅកម្ពុជាថា លទ្ធិប្រជាធិបតេយ្យហ្នឹងវាត្រូវការដំណើរការមួយរយៈពេល បានន័យថាយើងមិនអាចជំរុញទៅលឿនខ្លាំងពេកទេ វាជាដំណាក់កាលៗ»។
សម្រាប់លោកបណ្ឌិតឈាង វណ្ណារិទ្ធ ប្រសិនបើការអនុវត្តគោលនយោបាយវិមជ្ឈការនៅកម្ពុជាបានជោគជ័យ នោះនឹងជួយជំរុញការអភិវឌ្ឍប្រកបដោយចីរភាពនៅកម្ពុជាក៏ដូចជាអាចជួយពង្រឹងនូវលទ្ធិប្រជាធិបតយ្យនៅកម្ពុជាផងដែរ៕