គណបក្សនយោបាយចំនួន ៣ នឹងចាប់ផ្តើមហែក្បួនឃោសនារកសំឡេងឆ្នោតក្នុងរាជធានីភ្នំពេញ នៅថ្ងៃដំបូងនៃយុទ្ធនាការឃោសនា ដែលនឹងចាប់ផ្តើមពីថ្ងៃទី១ ខែកក្កដា ឆ្នាំ២០២៣។
ការឃោសនារកសំឡេងឆ្នោតសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ មានរយៈពេលមាន ២១ថ្ងៃ ដែលនឹងចាប់ផ្តើមពីរថ្ងៃទី១ ខែកក្កដា រហូតដល់ថ្ងៃទី២១ ខែកក្កដា ឆ្នាំ២០២៣។
លោក ស៊ីម ដូនី ប្រធានលេខាធិការដ្ឋាន រៀបចំការបោះឆ្នោតរាជធានីភ្នំពេញ ប្រាប់វីអូអេថា គណបក្សចំនួន ៣ នឹងហែក្បួនឃោសនាក្នុងថ្ងៃដំបូងនៃយុទ្ធនាការឃោសនារកសំឡេងបោះឆ្នោត ដោយក្នុងនោះមានគណបក្សប្រជាជនកម្ពុជា គណបក្សខ្មែររួបរួមជាតិ និងគណបក្សខ្មែរឈប់ក្រ។
បើតាមមន្រ្តីរូបនោះ គណបក្សកាន់អំណាចនឹងជួបជុំ និងហែក្បួន ដែលមានសមាជិក៧៦.៥០០នាក់ ដែល ៣ម៉ឺននាក់នឹងជួបជុំធ្វើមីទ្ទិញ នៅក្នុងទីធ្លាកោះពេជ្រ និងជាង៤ម៉ឺន៦ពាន់នាក់ ចូលរួមហែក្បួនឃោសនាតាមដងផ្លូវក្នុងរាជធានីភ្នំពេញ។ លោកបន្តថា គណបក្សខ្មែររួបរួមជាតិនឹងមានអ្នកចូលរួមចន្លោះពី ៦០០នាក់ ទៅ ១.០០០នាក់ ជួបជុំនៅទីលានប្រជាធិបតេយ្យ ដើម្បីហែក្បួន។ ចំណែកគណបក្សខ្មែរឈប់ក្រនឹងមានអ្នកចូលរួមចំនួន ១៥០នាក់ ជួបជុំនៅស្នាក់ការគណបក្ស ក្នុងសង្កាត់គោកឃ្លាង ខណ្ឌសែនសុខ ហើយនឹងហែក្បួនឃោសនាផងដែរ។
លោកបញ្ជាក់ថា៖ «គណបក្សប្រជាជនហែទាំងព្រឹក ទាំងល្ងាច ហើយគណបក្សខ្មែររួបរួមហែតែមួយព្រឹកទេ។ គណបក្សខ្មែរឈប់ក្រក៏មួយព្រឹកដែរ»។
ចំណែកគណបក្សខ្មែរតែមួយ គឺគ្រាន់តែជួបជុំសមាជិក ១២៥នាក់ នៅទីស្នាក់ការគណបក្សក្នុងខណ្ឌកំបូលតែប៉ុណ្ណោះ។
ប្រធានលេខាធិការដ្ឋានរៀបចំការបោះឆ្នោត រាជធានីភ្នំពេញ លោក ស៊ីម ដូនី បន្ថែមថា គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីអំពាវនាវមួយ ដោយណែនាំ និងស្នើអាជ្ញាធរគ្រប់លំដាប់ថ្នាក់ត្រូវប្រកាន់ជំហរអព្យាក្រឹត ឥតលម្អៀងក្នុងសកម្មភាពការងាររបស់ខ្លួន និងត្រូវសម្របសម្រួលទីកន្លែង ផ្លូវ ពេលវេលា ដើម្បីឱ្យគណបក្សនយោបាយនីមួយៗ អាចអនុវត្តកម្មវិធីឃោសនាបោះឆ្នោត និងការហែក្បួនឃោសនាបោះឆ្នោតរបស់ខ្លួន ឲ្យប្រព្រឹត្តទៅដោយស្មើភាពគ្នា។
លោកបន្តថា គ.ជ.ប ក៏អំពាវនាវដល់គណបក្សនយោបាយ បេក្ខជន អ្នកគាំទ្រគណបក្សនយោបាយទាំងអស់ ត្រូវតែគោរពតាមវិធានបទប្បញ្ញត្តិ និងគោលការណ៍ដែលមានចែងក្នុងច្បាប់ គោរពក្រមសីលធម៌ និងគោលការណ៍នានាដែលបានកំណត់ដោយ គ.ជ.ប ដើម្បីឱ្យការឃោសនាបោះឆ្នោតរបស់គណបក្សនយោបាយប្រព្រឹត្តទៅដោយសន្តិវិធី អហិង្សា សន្តិសុខ និងសុវត្ថិភាព។
យុទ្ធនាការឃោសនារកសំឡេងឆ្នោតនេះ នឹងផ្តល់ឱកាសឱ្យបេក្ខជនឈរឈ្មោះបោះឆ្នោត និងគណបក្សនយោបាយទាំងអស់ផ្សព្វផ្សាយកម្មវិធីនយោបាយរបស់ខ្លួន ដើម្បីបញ្ចុះបញ្ចូលពលរដ្ឋ ដែលគ្រប់អាយុបោះឆ្នោត និងមានសិទ្ធិបោះឆ្នោត ឱ្យបោះឆ្នោតគាំទ្រគណបក្សនយោបាយរបស់ខ្លួន។
ការបោះឆ្នោតដែលនឹងជ្រើសរើសតំណាងរាស្រ្តចំនួន ១២៥រូប នឹងអវត្តមានគណបក្សជំទាស់ដ៏ធំមួយ គឺគណបក្សភ្លើងទៀន ដែលធ្លាប់ទទួលបាន សំឡេងគាំទ្រពីប្រជាពលរដ្ឋជាង ១លាន៦សែននាក់ កាលពីការបោះឆ្នោតជ្រើសរើសក្រុមប្រឹក្សាឃុំសង្កាត់ ដោយសារស្ថាប័ន គ.ជ.ប បដិសេធការចុះបញ្ជីរបស់គណបក្សនេះ ដោយថាគណបក្សនេះមិនបានបំពេញគ្រប់គ្រាន់តាមលក្ខខណ្ឌតម្រូវ ដែល«បាត់ឯកសារដើមក្នុងការចុះបញ្ជី»។
គណបក្ស ដែលត្រៀមហែក្បួនឃោសនារំពឹងថា សារនយោបាយរបស់ពួកគេ នឹងជ្រាបដល់ប្រជាពលរដ្ឋ ដែលអាចឱ្យពលរដ្ឋ បោះឆ្នោតផ្តល់សេចក្តីទុកចិត្ត ដើម្បីទៅដណ្តើមកៅអីតំណាងរាស្ត្រក្នុងសភា។
រូបឯកសារ៖ អ្នកគាំទ្រគណបក្សខ្មែររួបរួមជាតិចាប់ផ្តើមចេញដំណើរដង្ហែក្បួនឃោសនានយោបាយ នៅរាជធានីភ្នំពេញ ថ្ងៃសៅរ៍ ទី០៧ ខែកក្កដា ឆ្នាំ២០១៨។ (ទី អូលីស្សា/ VOA)
លោក យ៉ែម បុញ្ញឬទ្ធិ អនុប្រធានគណបក្សខ្មែររួបរួមជាតិ និងជាអតីតអ្នកតំណាងរាស្រ្តគណបក្សសង្គ្រោះជាតិ ហើយបច្ចុប្បន្នឈរជាបេក្ខភាពតំណាងរាស្រ្តមណ្ឌលខេត្តព្រៃវែង ប្រាប់វីអូអេថា ក្នុងថ្ងៃធ្វើយុទ្ធនាការឃោសនាដំបូង គណបក្សខ្មែររួបរួមជាតិគ្រោងជួបជុំសមាជិកប្រមាណ ២ពាន់នាក់នៅទីលានប្រជាធិបតេយ្យ ដើម្បីហែក្បួនឃោសនា ផ្សព្វផ្សាយសារនយោបាយ និងគោលនយោបាយរបស់គណបក្ស។ លោកមានជំនឿថា សារនយោបាយ និងគោលនយោបាយរបស់គណបក្សខ្មែររួបរួមជាតិ នឹងជ្រាបទៅដល់ពលរដ្ឋខ្មែរ។
លោកថ្លែងថា៖ «គោលការណ៍ដែលសំខាន់បំផុតរបស់គណបក្សខ្មែររួបរួមជាតិ គឺយើងបំបាត់អំពើពុករលួយ បំបាត់ភាពរើសអើង ហើយនឹងរៀបចំឱ្យមានការផ្សះផ្សាជាតិពិតប្រាកដ។ ចំណុចទាំងអស់នេះ យើងសង្ឃឹមថា បងប្អូនប្រជាពលរដ្ឋ លោកនឹងយល់ពីគោលការណ៍និងបំណងដ៏ល្អរបស់យើងសម្រាប់សង្គមជាតិ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់វីអូអេថា គណបក្សប្រជាជនកម្ពុជានឹងជួបជុំគ្នានៅថ្ងៃបើកយុទ្ធនាការឃោសនារកសំឡេងឆ្នោត និងប្រារព្ធខួបអនុស្សាវរីយ៍លើកទី៧២ នៃកំណើតគណបក្ស ក្នុងពេលតែមួយ។
បើតាម លោក សុខ ឥសាន នៅថ្ងៃដំបូងនៃយុទ្ធនាការឃោសនាបោះឆ្នោត លោកនាយករដ្ឋមន្ត្រី ហ៊ុន សែន នឹងថ្លែងបើកយុទ្ធការឃោសនាបោះឆ្នោត ជាមួយសមាជិក សមាជិកាគណបក្ស ដែលអាចមានចំនួនទៅដល់ ១០ម៉ឺននាក់។
លោកថ្លែងថា៖ «នៅថ្ងៃសៅរ៍ទី១ នៅពេលព្រលឹម ជួបជុំគ្នានៅរាជធានីភ្នំពេញ គឺនៅកោះពេជ្រ ដើម្បីធ្វើមហាមីទ្ទិញមួយ ដែលមានប្រជាជន សមាជិក សមាជិកាគណបក្ស ប្រហែលជាពី ៥ម៉ឺនទៅ១០ម៉ឺននាក់»។
អ្នកនាំពាក្យរូបនេះបន្តថា ក្រោយពីការជួបជុំ សមាជិក សមាជិកាគណបក្សនឹងហែក្បួនទៅតាមគោលដៅនីមួយៗ ដែលក្រុមការងារបានកំណត់។
លោក សុខ ឥសាន ក៏មានជំនឿថា សារនយោបាយ និងគោលនយោបាយរបស់គណបក្សប្រជាជនកម្ពុជាដែលដឹកនាំប្រទេសជិត ៤០ឆ្នាំនេះ នឹងទាក់ទាញសំឡេងគាំទ្រពីពលរដ្ឋបន្តទៀត ដោយផ្អែកតាមគុណសម្បត្តិ និងស្នាដៃរបស់គណបក្ស។
លោកថ្លែងថា៖ «សារនយោបាយមានច្រើន ក៏ប៉ុន្តែយើងយកបច្ចុប្បន្នភាពមួយចំនួនជូន ដូចជាអរគុណសន្តិភាព អរគុណស្ថាបនិកសន្តិភាព មានសន្តិភាពទើបមានការអភិវឌ្ឍ អ៊ីចឹងណា។ អាហ្នឹង គឺសំខាន់ណាស់ កន្លែងហ្នឹងវាជាកត្តាគន្លឹះ ក្នុងការធ្វើឱ្យប្រទេសជាតិមានការរីកចម្រើន»។
ពាក់ព័ន្ធនឹងការហែក្បួនឃោសនារកសំឡេងឆ្នោតនេះ គណបក្សទាំង១៨ ដែលចូលរួមការបោះឆ្នោតនាថ្ងៃទី២៣ ខែកក្កដា ខាងមុខ អាចធ្វើសកម្មភាពបានតែ ៤ដងប៉ុណ្ណោះ ក្នុងរយៈពេល២១ថ្ងៃនៃយុទ្ធនាការឃោសនា។ ចំពោះការហែក្បួនក្នុងយុទ្ធនាការឃោសនា គឺគណបក្សនីមួយៗត្រូវជូនដំណឹងទៅលេខាធិការដ្ឋានគណៈកម្មការរាជធានី ខេត្តរៀបចំការបោះឆ្នោត យ៉ាងយូរ ៣ថ្ងៃមុនថ្ងៃហែក្បួនឃោសនា។ នេះបើតាមលោក ស៊ីម ដូនី ប្រធានលេខាធិការដ្ឋានរៀបចំការបោះឆ្នោតរាជធានីភ្នំពេញ។
លោក ស៊ីម ដូនី បានឱ្យដឹងទៀតថា បើគិតត្រឹមថ្ងៃទី២៩ ខែមិថុនា លេខាធិការដ្ឋានរៀបចំការបោះឆ្នោតរាជធានីភ្នំពេញបានទទួលការជូនដំណឹងរបស់គណបក្សនយោបាយចំនួន១២ ដែលបានដាក់លិខិត ដោយកំណត់ពេលវេលាហែក្បួនឃោសនា និងជួបជុំសមាជិករបស់ខ្លួន ក្នុងយុទ្ធនាការឃោសនាបោះឆ្នោតនេះ។
កាលពីថ្ងៃទី២៩ ខែមិថុនា រដ្ឋបាលរាជធានីភ្នំពេញ ក៏បានចេញសេចក្តីជូនដំណឹង ដោយអំពាវនាវទៅប្រជាពលរដ្ឋ ឱ្យបញ្ចៀសចរាចរយានយន្តគ្រប់ប្រភេទជាបណ្តោះអាសន្ន នៅតាមទីតាំងជួបជុំរបស់គណបក្សនីមួយៗ និងតាមតម្រាយផ្លូវនានាដែលគណបក្សនយោបាយហែក្បួនឃោសនានៅថ្ងៃទី១ ខែកក្កដា ចាប់ពីម៉ោង៥ព្រឹក រហូតដល់ការហែក្បួនបញ្ចប់។ ចំណែកកំពង់ចម្លងជ្រោយចង្វារភ្នំពេញ និងកំពង់ចម្លងអរិយក្សត្រភ្នំពេញនឹងផ្អាកជាបណ្ដោះអាសន្ន នៅថ្ងៃទី១ ខែកក្កដា ដូចគ្នា ចាប់ពីវេលាម៉ោង៥ព្រឹក រហូតដល់ម៉ោង ១២ថ្ងៃត្រង់៕