អ្នកបកប្រែជនជាតិកម្ពុជាម្នាក់ដែលជួយបកប្រែភាពយន្តឯកសារអំពីការជួញដូរផ្លូវភេទឲ្យបណ្តាញសារព័ត៌មាន Russia Today ឬ RT ដែលឧបត្ថម្ភដោយរដ្ឋាភិបាលរុស្ស៊ីត្រូវបានចាប់បញ្ជូនពីប្រទេសថៃត្រឡប់ទៅកម្ពុជាវិញកាលពីម្សិលមិញក្រោមបទ ចោទថាបានជួយបង្កើតព័ត៌មានក្លែងក្លាយ។ នេះបើយោងតាមសេចក្តីរាយការណ៍ព័ត៌មាន។
សារព័ត៌មានបានរាយការណ៍ថា លោករ៉ាត់ រ័ត្នមុន្នីដែលជាអ្នកជួយបកប្រែការផលិតភាពយន្តឯកសារ និងជាសកម្មជនសិទ្ធិពលករម្នាក់ត្រូវបានចាប់ខ្លួនដោយប៉ូលីសថៃនៅក្នុងទីក្រុងបាងកកកាលពីថ្ងៃទី៧ ខែធ្នូ ខណៈព្យាយាមសុំសិទ្ធិជ្រកកោននៅឯការិយាល័យសុំទិដ្ឋាការទៅប្រទេសហូឡង់។ លោកត្រូវបានគេឃុំខ្លួននៅឯមជ្ឈមណ្ឌលឃុំឃាំងអន្តោប្រវេសន៍ថៃរហូតដល់លោកត្រូវបានបញ្ជូនទៅប្រទេសកម្ពុជាវិញកាលពីម្សិលមិញ។
លោក Shawn Crispin តំណាងជាន់ខ្ពស់នៃអង្គការ CPJប្រចាំតំបន់អាស៊ីអាគ្នេយ៍បានថ្លែងថា«យើងអំពាវនាវដល់អាជ្ញាធរកម្ពុជាឲ្យដោះលែងលោក រ៉ាត់ រ័ត្នមុន្នីជាបន្ទាន់និងដោយគ្មានលក្ខខណ្ឌ។ រឿងរ៉ាវពិតប្រាកដនៅពីក្រោយការចោទប្រកាន់ថាបង្កើតព័ត៌មានក្លែងក្លាយនេះគឺថាប្រទេសកម្ពុជាបានប្រែក្លាយពីប្រជាធិបតេយ្យពហុបក្សដែលមានបណ្តាញសារព័ត៌មានសេរីទៅជាប្រទេសផ្តាច់ការមានគណបក្សតែមួយ។
របបលោកហ៊ុន សែនបានបំផ្លាញមុខមាត់ប្រទេសជាតិ មិនមែនបណ្តាញផ្សព្វផ្សាយទេ»។ យោងតាមសេចក្តីរាយការណ៍បានឲ្យដឹងថាក្រុមមន្រ្តីកម្ពុជាបានអះអាងថាលោករ៉ាត់ រ័ត្នមុន្នីបានឲ្យលុយទៅអ្នកដែលបានមកសម្ភាសន៍នៅក្នុងភាពយន្តឯកសារនេះឲ្យនិយាយកុហកអំពីបទពិសោធន៍ផ្ទាល់ខ្លួនរបស់ពួកគេ៕