ក្រុមអ្នកជួយសង្គ្រាះក្នុងកោះតៃវ៉ាន់ ប្រឈមនឹងការគំរាមកំហែងនៃការបាក់ដី និងថ្មបាក់ធ្លាក់បន្ថែមទៀតនៅថ្ងៃសុក្រនេះ នៅក្នុងការរុករកអ្នកបាត់ខ្លួនចំនួនជាងដប់នាក់ពីការរញ្ជួយដីក្នុងសប្តាហ៍នេះ ខណៈដែលអ្នកស្លាប់សរុបបានកើនដល់១២នាក់ ហើយអ្នកដែលនៅជាប់ក្នុងអគារខ្លះទៀត ត្រូវបានជួយសង្គ្រោះឱ្យមានសុវត្ថិភាពហើយ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ក្រុមអ្នកជួយសង្គ្រោះបានរកឃើញសាកសព២នាក់ទៀតក្រោយពីការរញ្ជួយដីកាលពីថ្ងៃពុធ ដែលមានកម្លាំងរញ្ជួយ៧,២រិជ្ជទ័រ ដែលបានកើតឡើងក្នុងតំបន់ដាច់ស្រយ៉ាលនៅភាគខាងកើតស្រុក Hualien ដែលមិនសូវមានមនុស្សរស់នៅច្រើន ដែលធ្វើឱ្យមនុស្សជាច្រើនរយនាក់ជាប់នៅក្នុងឧទ្យានជាតិមួយកន្លែង ខណៈដែលផ្ទាំងថ្មធំៗបានធ្លាក់រមៀលពីលើភ្នំ និងកាត់ផ្តាច់ផ្លូវជាច្រើន។
នាយករដ្ឋានពន្លត់អគ្គិភ័យកោះតៃវ៉ាន់និយាយថា សាសពមនុស្ស២នាក់ត្រូវបានរកឃើញនៅភ្នំ ប៉ុន្តែនៅមិនទាន់ធ្វើការសរុបចំនួនអ្នកស្លាប់ទាំងអស់នៅឡើយទេ។ នាយកដ្ឋានថា មានអ្នកបាត់ខ្លួនសរុបចំនួន១៨នាក់ ក្នុងនោះ៣នាក់ជាជនបរទេស ដែលមានសញ្ជាតិអូស្ត្រាលីនិងកាណាដា។
ការរញ្ជួយដីនេះកើតឡើងមួយថ្ងៃ មុនថ្ងៃឈប់សម្រាកចុងសប្តាហ៍វែង ដែលជាថ្ងៃបុណ្យសែនឆេងម៉េងបោសសម្អាតផ្នូរ ដែលមនុស្សជាច្រើនធ្វើដំណើរទៅផ្ទះរបស់ខ្លួន ដើម្បីសម្អាតផ្នូរដូនតារបស់គេ៕