តុលាការកំពូលបានសម្រេចនៅព្រឹកថ្ងៃអង្គារនេះមិនអនុញ្ញាតឲ្យអ្នកផលិតភាពយន្តឯកសារសញ្ជាតិ អូស្ត្រាលី ឈ្មោះ James Ricketson ឲ្យស្ថិតនៅក្រៅឃុំ ដោយសំអាងថា សាលាដំបូងរាជធានីភ្នំពេញមិនទាន់បញ្ចប់កិច្ចស៊ើបសួរទៅលើជនជាប់ចោទរូបនេះ ក្នុងសំណុំរឿងចារកម្ម។ នេះបើយោងតាមការបញ្ជាក់របស់ចៅក្រមតុលាការកំពូល។
នៅក្នុងការប្រកាសសេចក្តីសម្រេចរបស់តុលាការកំពូលនៅថ្ងៃទី ៣០ ខែមករា ឆ្នាំ ២០១៨ នេះ លោក Ricketson ខកខានមិនបានស្តាប់ការប្រកាសសេចក្តីសម្រេចនោះទេ ដោយសារលោកត្រូវគេឃើញថា បានមកដល់ក្នុងតុលាការ បន្ទាប់ពីតុលាការបានប្រកាសសេចក្តីសម្រេចរួចទៅហើយ។ លោកត្រូវបានឆ្មាំគុក នាំមកដល់តុលាការប្រមាណជាជាង៣០នាទី ក្រោយការប្រកាសសេចក្តីសម្រេចរបស់តុលាការ។
លោក ស៊ឹង បញ្ញាវុធ ប្រធានអង្គប្រឹក្សាជំនុំជម្រះ បានប្រើពេលជិត២០នាទី ប្រកាសសេចក្តីសម្រេចចិត្តក្នុងករណីព្រហ្មទណ្ឌផ្សេងៗគ្នាចំនួនប្រាំ មុនឈានដល់ការប្រកាសសាលដីការលើការស្នើសុំនៅក្រៅឃុំរបស់លោក Ricketson។ លោកចៅក្រម ស៊ឹង បញ្ញាវុធ បានប្រកាសតម្កល់ទុកសេចក្តីសម្រេចរបស់សាលាឧទ្ធរណ៍ ដែលមិនអនុញ្ញាតឲ្យលោក Ricketson បានស្ថិតនៅក្រៅឃុំ។ លោកបានប្រកាសនៅក្នុងសាលសវនាការ ដែលមានអ្នកចូលរួមស្តាប់ភាគច្រើនជាក្រុមអ្នកកាសែតតាមន័យដើមយ៉ាងដូច្នេះ៖
«សាលាឧទ្ធរណ៍មិនដោះលែង ជាការត្រឹមត្រូវ ខណៈដែលសាលាដំបូងរាជធានីភ្នំពេញកំពុងស៊ើបអង្កេត»។
រូបឯកសារ៖ អ្នកផលិតភាពយន្តឯកសារសញ្ជាតិអូស្រា្តលី លោក James Ricketson ដែលមន្ត្រីជាន់ខ្ពស់របស់រដ្ឋាភិបាលកម្ពុជាចោទថាជា អ្នកផ្តល់ព័ត៌មានសម្ងាត់ដល់លោក សម រង្ស៊ី ត្រូវបានមន្ត្រីពន្ធនាគារនាំយកមកបង្ហាញខ្លួន នៅតុលាការកំពូលនៅព្រឹកថ្ងៃពុធ ទី១៧ ខែមករា ឆ្នាំ២០១៨។ (ហ៊ុល រស្មី/VOA)
លោក James Ricketson វ័យ ៦៨ ឆ្នាំ ត្រូវបានសាលាដំបូងរាជធានីភ្នំពេញសម្រេចឃុំខ្លួន ក្រោមបទចោទថាបានប្រព្រឹត្តអំពើ «ចារកម្ម» បន្ទាប់ពីលោកត្រូវបានចាប់ខ្លួននៅតាមមាត់ទន្លេនៃទីក្រុងភ្នំពេញ មួយថ្ងៃមុនការបោះឆ្នោតក្រុមប្រឹក្សាឃុំសង្កាត់ដែលត្រូវបានរៀបចំឡើងនៅ ថ្ងៃទី៤ ខែមិថុនា ឆ្នាំ ២០១៧។
ការឃុំខ្លួន និងការចាប់ខ្លួនរបស់លោក Ricketson បានធ្វើឡើងក្រោយអ្នកផលិតកុនឯកសារជនជាតិអូស្ត្រាលីរូបនេះ បានប្រើម៉ាស៊ីនដ្រូន (drone) ថតយករូបភាពការប្រមូលផ្តុំរបស់ក្រុមអ្នកគាំទ្រគណបក្សសង្គ្រោះជាតិ ដែលបានហែរពីវត្តចាស់កាត់តាមស្ពានមិត្តភាពកម្ពុជាចិនមកចំកណ្តាលរាជធានីភ្នំពេញ កាលពីថ្ងៃទី ២មិថុនា ឆ្នាំ ២០១៧។
អ្នកស្រី ពឹង យក់ហៀប មេធាវីការពារក្តីឲ្យលោក James Ricketson សុំមិនធ្វើការអធិប្បាយ ក្រោយសវនាការនៅតុលាការកំពូល។
អ្នកស្រី Alexandra Kennett ដែលជាមិត្តស្រីកូនប្រុសរបស់លោក Ricketson បានសំដែងការខកចិត្តសារជាថ្មី ចំពោះការណ៍ដែលតុលាការមិនអនុញ្ញាតឲ្យលោក Ricketson បានស្ថិតនៅក្រៅឃុំ។ ទោះបីជាយ៉ាងណាក៏ដោយ អ្នកស្រីបានប្រាប់ក្រុមអ្នកកាសែតនៅក្រៅតុលាការកំពូលថា ដំណើរការកាត់ក្តីប្រកបដោយតម្លាភាព និងនីតិវិធីច្បាប់ត្រឹមត្រូវនឹងអាចកើតមាន ចំពោះលោក Ricketson។
«គ្រួសារលោក Ricketson បានសុំឲ្យខ្ញុំនិយាយថា ពួកគេពិតជាមានការអាក់អន់ចិត្តយ៉ាងខ្លាំង ចំពោះលទ្ធផលនៃការកាត់សេចក្តីថ្ងៃនេះ ហើយជាពិសេសនោះ គឺសាលក្រមដែលបានច្រានចោលសំណើសុំនៅក្រៅឃុំ បានធ្វើឡើងដោយកំបាំងមុខ»។
អ្នកស្រីបានថ្លែងបន្តថា៖
«ប៉ុន្តែយើងពិតជាសង្ឃឹមថា យើងអាចឃើញរឿងក្តីនេះនឹងដំណើរការទៅមុខប្រកបដោយតម្លាភាព ហើយបញ្ចប់ក្តីនេះបានឆាប់រហ័សតាមដែលអាចធ្វើទៅបាន»។
ស្ថានទូតអូស្រ្តាលីប្រចាំប្រទេសកម្ពុជា មិនបានឆ្លើយតបទៅនឹងសំណួររបស់ VOA តាមសារអេឡិក ត្រូនិកអ៊ីម៉េល ពាក់ព័ន្ធនឹងសេចក្តីសម្រេចរបស់តុលាការកំពូលនៅថ្ងៃអង្គារនេះ តែមន្ត្រីអ្នកនាំពាក្យនៃក្រសួងការបរទេស និងពាណិជ្ជកម្មអូស្រា្តលី បានបញ្ជាក់ថា ក្រសួងការបរទេស និងពាណិជ្ជកម្មអូស្រា្តលី បានបន្តផ្តល់សេវាកុងស៊ុលដល់លោក Ricketson។
រឿងក្តីរបស់លោក Ricketson កំពុងទាញចំណាប់អារម្មណ៍ពីមហាជននៅប្រទេសអូស្រា្តលី ពោលគឺសម្ពាធទៅលើរដ្ឋាភិបាលអូស្រា្តលីឲ្យខ្នះខ្នែងការពារលោក Ricketson បានកើនឡើងនៅក្នុងប្រទេសអូស្រ្តាលី ជាទីដែល អ្នកកាសែតម្នាក់ឈ្មោះ Peter Greste ត្រូវបានដោះលែងពីការឃុំឃាំងនៅក្នុងប្រទេសអេហ្ស៊ីប កាលពីឆ្នាំ ២០១៤ បន្ទាប់ពីមានកិច្ចអន្តរាគមន៍ពីអ្នកស្រី Julie Bishop រដ្ឋមន្ត្រីក្រសួងការបរទេសអូស្រា្តលី។
លោក Peter Greste បានផ្តល់ការគាំទ្រដល់លោក Ricketson ដោយលោកបានបង្ហោះសារលើគណនី Twitter របស់លោកតាមន័យដើមកាលពីចុងខែធ្នូថា៖
«សូមជួយធ្វើឲ្យមានសេរីភាពដល់អ្នកកាសែតម្នាក់ផ្សេងទៀតនៅក្នុងពន្ធនាគារក្រោមបទចោទពាក់ព័ន្ធនឹងសន្តិសុខជាតិ។ គ្មានភស្តុតាងណាមួយដែលបានបង្ហាញថា លោក James Ricketson នៅប្រទេសកម្ពុជា មានទោសចំពោះអ្វីមួយដែលលោកបានធ្វើ ក្រៅតែពីការយកចិត្តទុកដាក់[លើកិច្ចការលោក] នោះទេ»។
ឆ្លើយតបនឹងព័ត៌មានអំពីការលើកពេលសេចក្តីសម្រេចតុលាការកាលពីពេលកន្លងមកនេះ លោក Peter Greste បានសរសេរក្នុង Twitter ថាកម្ពុជាត្រូវតែដោះលែងលោក James Rocketson ប្រសិនបើមិនមានភស្តុតាង។
លោក Peter Greste បានទទូចសុំឲ្យអ្នកប្រើប្រាស់បណ្តាញសង្គម Twitter ដែលតាមរូបលោក ធ្វើញត្តិអំពាវនាវឲ្យមានការដោះលែងលោក Ricketson។ ញត្តិដែលអង្វរករលោក Malcolm Turnbull នាយករដ្ឋមន្ត្រីប្រទេសអូស្រ្តាលី អ្នកស្រី Julie Bishop រដ្ឋមន្ត្រីក្រសួងការបរទេស និងលោក Christian Porter រដ្ឋមន្ត្រីក្រសួងយុត្តិធម៌ឲ្យអន្តរាគមន៍ បានប្រមូលហត្ថលេខាចំនួនជាង ៦០.០០០ហត្ថលេខា គិតមកត្រឹមចុងខែមករានេះ។
លោក Ricketson ត្រូវបានចោទប្រកាន់តាមខដែលមានចែងក្នុងក្រមព្រហ្មទណ្ឌកម្ពុជា ដែលហាមឃាត់ការប្រមូលយកព័ត៌មានទៅឲ្យរដ្ឋបរទេស ដែលមានសក្ដានុពលធ្វើឲ្យខូចប្រយោជន៍ប្រទេស [កម្ពុជា] ហើយអាច ប្រឈមនឹងការជាប់ពន្ធនាគារពី៥ ទៅ ១០ឆ្នាំ។
មិនទាន់មានភស្តុតាងជាដុំកំភួនសម្រាប់ការចោទប្រកាន់ប្រឆាំងនឹងលោក Ricketson ដែលមិនត្រឹមតែជាបុគ្គលមួយរូបត្រូវបានគេកោតសរសើរចំពោះការគាំទ្ររបស់លោកខាងមនុស្សធម៌ទៅលើគ្រួសារក្រីក្រនោះទេ តែលោកថែមទាំងបានប្រមូលផ្តុំសត្រូវជាច្រើន តាមការណ៍ដែលលោកបានធ្វើយុទ្ធនាការប្រឆាំងក្រុមអង្គការសង្គមស៊ីវិល ដែលលោកចោទថា បានធ្វើការកេងប្រវ័ញ្ចលើជនក្រខ្សត់។
នៅមុនការបោះឆ្នោតជាតិ ខែកក្កដា ឆ្នាំ ២០១៨ រដ្ឋាភិបាលកម្ពុជាត្រូវគេសង្កេតឃើញថា បានបើកការបង្រ្កាបមិនរួញរាដៃទៅលើអង្គការសង្គមស៊ីវិល ក្រុមអ្នកនយោបាយគណបក្សប្រឆាំង និងសារព័ត៌មានឯករាជ្យ ក៏ដូចជាអង្គភាពព័ត៌មានដែលទទួលបានការឧបត្ថម្ភថវិកាពីរដ្ឋាភិបាលសហរដ្ឋអាមេរិក។
លោក Ricketson បានជាប់ឃុំបណ្ដោះអាសន្នប្រមាណ៧ខែមកហើយ គិតចាប់តាំងពីការចាប់ឃុំខ្លួនលោកកាលពី ខែមិថុនា ឆ្នាំ ២០១៧៕