គណបក្សមួយចំនួនសម្តែងការគាំទ្រចំពោះការបដិសេធរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ដែលមិនចុះបញ្ជីគណបក្សភ្លើងទៀន សម្រាប់ដំណើរការបោះឆ្នោតជ្រើសរើសតំណាងរាស្រ្តខាងមុខនេះ។ រីឯគណបក្សខ្លះទៀតសម្តែងការខកចិត្តចំពោះការបដិសេធនេះ។
កាលពីថ្ងៃចន្ទ គ.ជ.ប បានចេញសេចក្តីសម្រេចបដិសេធការចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន ដោយហេតុថា«គណបក្សភ្លើងទៀនមិនមានភ្ជាប់មកជាមួយនូវការប្រកាសស្តីពីការចុះបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម ដោយរដ្ឋបាលរាជធានីភ្នំពេញ ខេត្ត ក្រុង ស្រុក ខណ្ឌ នៅការិយាល័យច្រកចេញចូលតែមួយ ឱ្យបានត្រឹមត្រូវ ឱ្យស្របតាមកថាខណ្ឌទី២ និងចំណុចទី១ ក្នុងមាត្រា ២៧ នៃច្បាប់ស្តីពីការបោះឆ្នោតជ្រើសរើសតំណាងរាស្រ្ត»។
ក្រោយការប្រកាសបដិសេធរបស់ គ.ជ.ប គណបក្សជាង ១០ បានសម្តែងការគាំទ្រចំពោះសេចក្តីសម្រេចមួយនេះ។ នេះបើតាមសេចក្តីថ្លែងការណ៍របស់ពួកគេដែលវីអូអេទទួលបាន។
គណបក្សទាំងអស់នោះរួមមានគណបក្សយុវជនកម្ពុជា គណបក្សខ្មែររួបរួមជាតិ គណបក្សនគរប្រជាធិបតេយ្យ គណបក្សខ្មែរតែមួយ គណបក្សជនជាតិដើមប្រជាធិបតេយ្យកម្ពុជា គណបក្សសំបុកឃ្មុំសង្គមប្រជាធិបតេយ្យ គណបក្សហ្វ៊ុនស៊ិនប៉ិច គណបក្សសញ្ជាតិកម្ពុជា គណបក្សកម្លាំងប្រជាធិបតេយ្យ គណបក្សឯកភាពជាតិខ្មែរ និងគណបក្សខ្មែរអភិវឌ្ឍន៍សេដ្ឋកិច្ច។
ប្រធានគណបក្សខ្មែររួបរួមជាតិ លោក ញឹក ប៊ុនឆៃ ប្រាប់វីអូអេនៅថ្ងៃអង្គារនេះថាគណបក្សរបស់លោកគាំទ្រការបដិសេធនេះ ដោយសារវាជាការអនុវត្តស្តង់ដាតែមួយ ដូចនឹងគណបក្សនយោបាយដទៃទៀត។ លោកបញ្ជាក់ទៀតថា នេះក៏ជាការធ្វេសប្រហែសរបស់គណបក្សភ្លើងទៀនខ្លួនឯង។
លោកថ្លែងថា៖ «អានេះមកពីគាត់ធ្វេសប្រហែសរបស់គាត់[គណបក្សភ្លើងទៀន]ហើយក៏មិនមែនជាការដាក់បន្ទុកអីទេតាមខ្ញុំមើល ព្រោះចង់មិនចង់ ការបោះឆ្នោតនោះចង់មានរូបភាពគណបក្សច្រើន ហើយមានខាងប្រឆាំងមានអី ចូលរួមទៅបានបរិយាកាសវាល្អ។ ប៉ុន្តែនេះគឺជាការធ្វេសប្រហែសអ៊ីចឹងទៅ ក៏មានការអនុវត្តនូវស្តង់ដារតែមួយដូចគ្នាទៀតទៅបាទ»។
ចំណែកប្រធានគណបក្សយុវជនកម្ពុជា លោក ពេជ្រ ស្រស់ ប្រាប់វីអូអេថា ការគាំទ្រសេចក្តីសម្រេចរបស់ គ.ជ.ប គឺបង្ហាញពីតម្លាភាព ភាពស្មើគ្នាចំពោះគណបក្សនយោបាយនីមួយៗ ដែលត្រូវតែបំពេញលក្ខខណ្ឌឱ្យបានត្រឹមត្រូវតាមការកំណត់របស់ គ.ជ.ប។
លោកបញ្ជាក់ថា៖ «បើគណបក្សភ្លើងទៀនបំពេញលក្ខខណ្ឌមិនគ្រប់ទេគឺថាត្រូវតែរុញចេញ អ៊ីចឹងយើងគាំទ្រស្មារតីរុញចេញ មានន័យថាមិនទទួលពាក្យ ឬក៏បដិសេធពាក្យ ពីព្រោះគណបក្សទាំងអស់គឺមានសិទ្ធិស្មើគ្នា តែបើគណបក្សណាមួយខុសលក្ខខណ្ឌ ឬក៏មិនគ្រប់គ្រាន់នូវលក្ខខណ្ឌទេ បើ គ.ជ.ប ទទួលក្នុងហេតុផលនយោបាយ គណបក្សយុវជនយើង គឺយើងប្រឆាំងដាច់ខាត»។
ទោះជាយ៉ាងណា ស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន ប្រាប់វីអូអេនៅថ្ងៃអង្គារនេះថាលោកខកចិត្តយ៉ាងខ្លាំងចំពោះការបដិសេធមិនចុះឈ្មោះគណបក្សភ្លើងទៀនសម្រាប់ការបោះឆ្នោតខាងមុខ។ លោកបន្ថែមថា បើទោះបីគណបក្សភ្លើងទៀនមិនមានសក្តានុពលប្រហាក់ប្រហែលនឹងគណបក្សកាន់អំណាចក៏ដោយ តែគួរណាស់តែមានវត្តមានក្នុងការបោះឆ្នោតខាងមុខ ដើម្បីកុំឱ្យលទ្ធិប្រជាធិបតេយ្យនៅកម្ពុជាដើរថយក្រោយខ្លាំងពេក។
លោកបញ្ជាក់ថា៖ «គណបក្សដទៃវិញយល់ឃើញថារឿងនេះគ្រាន់តែធ្វើប៉ុណ្ណឹងវាស្មើភាពគ្នាខ្ញុំយល់ថា វាគឺជារឿងកំប៉ិកកំប៉ុកខ្លាំងពេកហើយ ប្រសិនជាយល់ថាអ៊ីចឹង។ គួរតែពង្រឹង មែនទែនទៅគឺ ជួយជំរុញដើម្បីឱ្យ គ.ជ.ប ទទួលយកគណបក្សភ្លើងទៀនឱ្យចូលរួមប្រកួតប្រជែង នេះគឺជារឿងប្រសើរជាជាង ទៅគាំទ្រអាជ្ញាកណ្តាល ទៅឱបជើងអាជ្ញាកណ្តាល ទៅលើកទឹកចិត្តអាជ្ញាកណ្តាល នេះគឺមានន័យថាយ៉ាងហោចណាស់គឺខ្លួនបានទៅយកចិត្តអាជ្ញាកណ្តាល ដើម្បីការពារខ្លួនហើយអ៊ីចឹងហាស»។
ចំណែកឯគណបក្សប្រជាធិបតេយ្យមូលដ្ឋានក៏ចេញសេចក្តីថ្លែងការណ៍មួយនៅថ្ងៃអង្គារនេះថា គណបក្សពិតជាសោកស្តាយចំពោះការបដិសេធការចុះបញ្ជីគណបក្សភ្លើងទៀន ដោយលើកឡើងថា ហេតុផលនៃការបដិសេធនេះគឺជាបញ្ហាបច្ចេកទេសដែលមានភាពស្មុគស្មាញទាក់ទិននឹងទម្រង់នៃឯកសារគតិយុត្តិ។
គណបក្សមួយនេះក៏ជំរុញឱ្យក្រសួងមហាផ្ទៃគួរតែចេញលិខិតជូនគណបក្សភ្លើងទៀន តាមតម្រូវការរបស់ គ.ជ.ប សម្រាប់ការចុះបញ្ជីគណបក្សនយោបាយឈរឈ្មោះបោះឆ្នោតនេះ។
សេចក្តីថ្លែងការណ៍បញ្ជាក់ថា៖ «គណបក្សប្រជាធិបតេយ្យមូលដ្ឋានយល់ថាការបដិសេធការចុះបញ្ជីគណបក្សភ្លើងទៀនបានជះឥទ្ធិពលដល់ដំណើរការបោះឆ្នោតដែលមានលក្ខណៈសេរី និងយុត្តិធម៌ និងផ្ទុយពីគោលការណ៍ប្រជាធិបតេយ្យសេរីពហុបក្សនៅព្រះរាជាណាចក្រកម្ពុជា»។
ក្នុងសន្និសីទសារព័ត៌មានកាលពីព្រឹកថ្ងៃអង្គារ លោក សុន ឆ័យ អនុប្រធានគណបក្សភ្លើងទៀនបានពន្យល់មូលហេតុដែលបណ្តាលឱ្យគណបក្សមិនមានឯកសារចុះបញ្ជីដើមនៅក្រសួងមហាផ្ទៃ គឺដោយសារតែកន្លងមកគណបក្សភ្លើងទៀនធ្លាប់ជួលទីស្នាក់ការ ដែលនៅជាមួយគណបក្សសង្គ្រោះជាតិ លុះពេលដល់តុលាការរំលាយគណបក្សសង្គ្រោះជាតិ គឺថ្នាក់ដឹកនាំគណបក្សមិនត្រូវបានគេអនុញ្ញាតឱ្យចូលទៅយកឯកសារទាំងនោះ រហូតដល់អគារគណបក្សសង្គ្រោះជាតិនោះត្រូវបានវាយបំផ្លាញខ្ទេចខ្ទី ដែលធ្វើឱ្យឯកសារទាំងនោះបាត់បង់។
លោក សុន ឆ័យ ឱ្យដឹងទៀតថា ឯកសារដើមត្រូវបានក្រសួងមហាផ្ទៃទុកមួយច្បាប់ ដើម្បីផ្ទៀងផ្ទាត់។ លោកបន្ថែមថាក្រសួងមហាផ្ទៃ កាលពីថ្ងៃទី៥ ខែឧសភា បានចេញបញ្ជាក់មកឱ្យគណបក្សភ្លើងទៀនថា គណបក្សពិតជាបានចុះបញ្ជីនៅក្រសួងមហាផ្ទៃ និងមានការបញ្ជាក់អាស័យដ្ឋានត្រឹមត្រូវ។ ប៉ុន្តែឯកសារនេះ ត្រូវបានស្ថាប័ន គ.ជ.ប អះអាងថាមិនទាន់គ្រប់គ្រាន់តាមច្បាប់កំណត់នៅឡើយ។
គួរបញ្ជាក់ថា គណបក្សភ្លើងទៀនជាគណបក្សជំទាស់ដ៏ធំមួយ និងធ្លាប់ទទួលបានសំឡេងគាំទ្រពីប្រជាពលរដ្ឋជាង១លាន ៦សែននាក់ កាលពីការបោះឆ្នោតជ្រើសរើសក្រុមប្រឹក្សាឃុំសង្កាត់ នាខែមិថុនា ឆ្នាំ២០២២៕