គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចផ្ទេរឈ្មោះតំណាងរាស្ត្រជាប់ឆ្នោតចំនួន៣០នាក់ កាលពីថ្ងៃទី២៤ ខែសីហា តាមសំណើរបស់គណបក្សប្រជាជនកម្ពុជា ដោយមូលហេតុថា ពួកគេនឹងទៅបំពេញតួនាទីជារដ្ឋមន្ត្រី ឧបនាយករដ្ឋមន្ត្រី និងទេសរដ្ឋមន្ត្រី។ ដោយឡែកមន្រ្តីជាន់ខ្ពស់មួយចំនួននឹងបន្តកាន់តំណែងជារដ្ឋមន្ត្រី និងតំណាងរាស្រ្តដដែល។ នេះបើតាមមន្ត្រីជាន់ខ្ពស់គ.ជ.ប និងគណបក្សប្រជាជនកម្ពុជា។
បើយោងតាមសេចក្តីសម្រេចរបស់ស្ថាប័នរៀបចំការបោះឆ្នោត ចុះថ្ងៃទី២៤ ខែសីហា តំណាងរាស្ត្រមកពីគណបក្សប្រជាជនកម្ពុជាចំនួន៣០រូប នឹងត្រូវលុបឈ្មោះចេញពីតួនាទីជាតំណាងរាស្ត្រអាណត្តិទី៧នេះ ក្នុងនោះរួមមានលោក កើត រិទ្ធ រដ្ឋមន្រ្តីក្រសួងយុត្តិធម៌ លោក ហង់ជួន ណារ៉ុន រដ្ឋមន្រ្តីក្រសួងអប់រំ អ្នកស្រី អ៊ឹង កន្ថាផាវី រដ្ឋមន្រ្តីក្រសួងកិច្ចការនារី អ្នកស្រី ចម និម្មល រដ្ឋមន្រ្តីក្រសួងពាណិជ្ជកម្ម លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ លោក កែវ រតនៈ រដ្ឋមន្រ្តីក្រសួងរ៉ែ និងថាមពល លោក សាយ សំអាល់ រដ្ឋមន្រ្តីក្រសួងរៀបចំដែនដី លោក សុខ ចិន្តាសោភា រដ្ឋមន្រ្តីក្រសួងការបរទេស លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ លោក ចាយ បូរិន រដ្ឋមន្រ្តីក្រសួងធម្មការនិងសាសនា លោក ឌិត ទីណា រដ្ឋមន្រ្តីក្រសួងកសិកម្ម លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍជនបទ និងលោក អ៊ាង សុផល្លែត រដ្ឋមន្រ្តីក្រសួងបរិស្ថាន។
មន្រ្តីគណបក្សកាន់អំណាចដែលបោះបង់តំណែងតំណាងរាស្រ្តផ្សេងទៀត រួមមានលោក សក់ សេដ្ឋា លោក លូ គឹមឈន់ លោក អ៊ុក រ៉ាប៊ុន លោក លី ណារុន លោក ថោង ខុន លោក ស៊ុន ចាន់ថុល លោក វង្សី វិស្សុត លោក ជូ វិជិត្ត លោក ព្រុំ សុខា លោក អូស្មាន់ ហាស្សាន់ លោក ស្បោង សារ៉ាត់លោក ហ៊ឺ បាវី អ្នកស្រី តឹករ៉េតកំរង លោក តឹករ៉េត សំរេច លោក សូ ខនឬទ្ធីគុណ លោក អ៊ី ឈាន និងលោក គន់ គីម។
ដោយឡែកកូនប្រុសរបស់លោក ទៀ បាញ់ គឺលោក ទៀ សីហា និងកូនប្រុសរបស់លោក ស ខេង គឺលោក ស សុខា នៅបន្តកាន់តំណែងជារដ្ឋមន្ត្រី ឧបនាយករដ្ឋមន្ត្រី និងជាតំណាងរាស្រ្តដដែល។
វីអូអេបានព្យាយាមសុំការអត្ថាធិប្បាយពីលោក កើត រិទ្ធ លោក ឌិត ទីណា លោក សាយ សំអាល់ លោក សក់ សេដ្ឋា និងលោក អ៊ាង សុផល្លែត តែមិនទាន់អាចទាក់ទងបាននៅឡើយទេ។
លោក ហង្ស ពុទ្ធា អ្នកនាំពាក្យគ.ជ.ប ប្រាប់វីអូអេថា ការលុបឈ្មោះតំណាងរាស្ត្រទាំង៣០នាក់របស់គណបក្សប្រជាជនកម្ពុជានេះ យោងតាមសំណើរបស់គណបក្ស។ លោកបន្ថែមថាបេក្ខជនពេញសិទ្ធិ និងបេក្ខជនបម្រុង ដែលមានក្នុងបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រអាណត្តិទី៧ ដែលស្ថាប័នគ.ជ.ប ទទួលស្គាល់ជាផ្លូវការ កាលពីថ្ងៃទី៨ ខែឧសភា ឆ្នាំ២០២៣ នឹងត្រូវរំកិលឱ្យឡើងជាតំណាងរាស្ត្រពេញសិទ្ធិជំនួស។
លោកថ្លែងថា៖ «ការលុបឈ្មោះរបស់បេក្ខជននៃគណបក្សនយោបាយណាមួយតាមការស្នើសុំរបស់សាមីគណបក្ស [គឺ] គ.ជ.ប នឹងរំកិលឈ្មោះបន្តបន្ទាប់តាមលេខរៀង ដើម្បីចូលទៅដាក់បំពេញឱ្យបេក្ខជននៃគណបក្សនយោបាយណាដែលលោកទទួលជ័យលាភី»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា ការផ្លាស់ប្តូរនេះ គឺដោយសារតំណាងរាស្ត្រមួយចំនួន ត្រូវទៅកាន់តំណែង តួនាទីក្នុងជួររដ្ឋាភិបាល។ លោកបន្តថា បើទោះបីជាលោក ទៀ សីហា រដ្ឋមន្ត្រីក្រសួងការពារជាតិ និងលោក ស សុខា រដ្ឋមន្ត្រីក្រសួងមហាផ្ទៃ ដែលកាន់តួនាទីជាឧបនាយករដ្ឋមន្ត្រីផង និងជាតំណាងរាស្ត្រផង គឺមិនទាស់ខុសអ្វីឡើយ និងមិនមានការតម្រូវឱ្យលាលែងតួនាទីជាតំណាងរាស្ត្រនោះទេ លុះត្រាតែអ្នកដែលមានតួនាទីជាទេសរដ្ឋមន្ត្រី ទើបត្រូវលាលែងតួនាទីតំណាងរាស្រ្ត។ លោកបន្ថែមថា ការលាលែងរបស់មន្រ្តីជាន់ខ្ពស់ខ្លះពីតំណាងរាស្រ្ត ដោយសារផ្អែកលើតម្រូវការការងាររបស់ពួកគេ។
លោកប្រាប់វីអូអេថា៖ «ឧបមា ឯកឧត្តម ស សុខា អ៊ីចឹង គាត់ធ្វើឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គាត់ជាតំណាងរាស្ត្រផង អត់មានលាលែងទេ។ ប៉ុន្តែឧទាហរណ៍ថា ពីមុនមក តាមខ្ញុំចាំ គឺថាឯកឧត្តមខ្លះជាតំណាងរាស្ត្រផង ជាទេសរដ្ឋមន្ត្រីផង ឥឡូវដោយសារគោលការណ៍គណបក្ស [គឺ]ទេសរដ្ឋមន្ត្រី មិនអាចក្លាយជាតំណាងរាស្ត្រផង ហើយនឹងទេសរដ្ឋមន្ត្រីផងទេ។ អាហ្នឹងគឺថាគាត់ត្រូវលាលែងហើយ។ បើគាត់ទៅកាន់ការងារ[រដ្ឋាភិបាល]អី គាត់ត្រូវលាលែងពីតំណាងរាស្ត្រ។ អ៊ីចឹងទុកឱ្យអ្នកក្រោយគេលេខរៀងបន្ទាប់ហ្នឹង គេឡើងមកធ្វើតំណាងរាស្ត្រ»។
បើតាមលោក សុខ ឥសាន ក្នុងករណីដូចលោក ស សុខា និងលោក ទៀ សីហា ដែលកាន់តួនាទីជារដ្ឋមន្ត្រី និងតំណាងរាស្ត្រ គឺមិនប៉ះពាល់ប្រសិទ្ធភាពការងារនោះទេ ប៉ុន្តែពួកគាត់អាចក្តាប់ស្ថានការណ៍ក្នុងប្រទេសបានល្អថែមទៀត។
អ្នកនាំពាក្យគណបក្សប្រជាជនកម្ពុជារូបនេះ បានឱ្យដឹងថា តំណាងរាស្ត្រថ្មីដែលត្រូវឡើងជំនួស ក៏ត្រូវប្រកាសសុពលភាពដោយរដ្ឋសភា តាមរយៈការបើកសម័យប្រជុំពេញអង្គ និងត្រូវស្បថក្នុងព្រះមរបរាជវាំងផងដែរ។ លោកបន្តថា ការផ្លាស់ប្តូរតំណាងរាស្ត្រ ដែលទើបតែធ្វើឡើងថ្ងៃទី២៤ ខែសីហា ឬក្រោយរដ្ឋសភាបើកសម័យប្រជុំលើកទី១ កាលពីថ្ងៃទី២១ និង២២ ខែសីហាកន្លងទៅ គឺយោងទៅតាមរដ្ឋធម្មនុញ្ញកម្ពុជា៕