នាពេលបច្ចុប្បន្ននេះ មានការស៊ើបអង្កេតជាច្រើនកំពុងបន្តធ្វើដោយភ្នាក់ងារអនុវត្តច្បាប់ និងសមាជិកសភាទៅលើបញ្ហានេះ។
ទីភ្នាក់ងារព័ត៌មាន Reuters ធ្លាប់បានរាយការណ៍កាលពីលើកមុន ដោយដកស្រង់សម្ដីរបស់មន្ត្រីរដ្ឋាភិបាលបច្ចុប្បន្ន ក៏ដូចជាអតីតមន្ត្រីរដ្ឋាភិបាលនានា ដែលសុំមិនបញ្ចេញឈ្មោះថា ទីភ្នាក់ងារ FBI កំពុងដឹកនាំការស៊ើបអង្កេតយ៉ាងហោចណាស់ចំនួន ៣ ផ្សេងគ្នាទៅលើការចោទនានាអំពីការជ្រៀតជ្រែករបស់រុស្ស៊ីក្នុងការបោះឆ្នោតប្រធានាធិបតីសហរដ្ឋអាមេរិក និងទំនាក់ទំនងដែលអាចមានរវាងប្រទេសរុស្ស៊ីនិងលោក Trump។
ការិយាល័យ FBI នៅទីក្រុង Pittsburgh រដ្ឋ Pennsylvaniaដែលទទួលបន្ទុកលើការស៊ើបអង្កេតសន្តិសុខតាមប្រព័ន្ធអ៊ីនធឺណិត កំពុងស្វែងរកអត្តសញ្ញាណអ្នកដែលបានបំបែកប្រព័ន្ធកុំព្យូទ័ររបស់គណៈកម្មាធិការជាតិគណបក្សប្រជាធិបតេយ្យកាលពីឆ្នាំមុន។
ការិយាល័យ FBI នៅទីក្រុង San Francisco រដ្ឋ California កំពុងព្យាយាមកំណត់អត្តសញ្ញាណអ្នកដែលគេសង្ស័យថានៅពីក្រោយអ្នក ឬក្រុម "Guccifer 2" ដែលលបចូលប្រព័ន្ធអ៊ីនធឺណិតលួចអ៊ីមែលរបស់លោក John Podesta អ្នកគ្រប់គ្រងយុទ្ធនាការបោះឆ្នោតរបស់បេក្ខជនប្រធានាធិបតីមកពីគណបក្សប្រជាធិបតេយ្យលោកស្រី Hillary Clinton ទៅផ្សព្វផ្សាយជាសាធារណៈ។
លោក John Podesta ប្រធានឃោសនាបោះឆ្នោតរបស់លោកស្រីគ្លីនតុនថ្លែងកាលពីខែកក្កដាឆ្នាំ២០១៦
ភ្នាក់ងារប្រឆាំងការស៊ើបការណ៍សម្ងាត់របស់ទីភ្នាក់ងារ FBI នៅរដ្ឋធានីវ៉ាស៊ីនតោន កំពុងរកមើលតម្រុយពីអ្នកផ្ដល់ដំណឹង និងពីអ្នកកាត់ផ្ដាច់ការទំនាក់ទំនងបរទេស។
ទីភ្នាក់ងារ FBI ក៏បានស៊ើបអង្កេតកិច្ចសន្ទនានានា ដែលអតីតទីប្រឹក្សាសន្តិសុខជាតិលោក Michael Flynn ធ្លាប់មានជាមួយលោកឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកលោក Sergey Kislyak ដែលការស៊ើបអង្កេតនេះអាចជាការស៊ើបអង្កេតទីបួនរបស់ទីភ្នាក់ងារ FBI នេះ ទាក់ទិនទៅនឹងបញ្ហាពាក់ព័ន្ធរបស់ប្រទេសរុស្ស៊ីជាមួយនឹងលោក Trump។ ប៉ុន្តែការស៊ើបអង្កេតនេះ ជាអ្វីដែលលោក Flynn មិនបានបង្ហាញទៅលោកអនុប្រធានាធិបតី Mike Pence ដែលករណីនេះបានបណ្ដាលឈានដល់ការលាលែងពីតំណែងរបស់លោកកាលពីថ្ងៃទី ១៤ ខែកុម្ភៈ កន្លងទៅនេះ។
ទន្ទឹមនឹងនេះ នៅក្នុងសភា យ៉ាងហោចណាស់មានគណៈកម្មាធិការអចិន្ត្រៃយ៍ចំនួន ៥ និងអនុគណៈកម្មាធិការមួយ កំពុងធ្វើការស៊ើបអង្កេតនៅក្នុងដំណាក់កាលផ្សេងៗទៅលើការជ្រៀតជ្រែករបស់ប្រទេសរុស្ស៊ីនៅក្នុងការបោះឆ្នោតរបស់សហរដ្ឋអាមេរិក និងអំពីទំនាក់ទំនងដែលបានរាយការណ៍កន្លងមក រវាងក្រុមរបស់លោក ត្រាំ ជាមួយនិងមន្ត្រីរដ្ឋាភិបាលរុស្ស៊ី។
ទីប្រឹក្សាសន្តិសុខជាតិ លោក Michael Flynn ថ្លែងក្នុងកិច្ចសង្ខេបប្រចាំថ្ងៃនៅសេតវិមាន
ក្នុងចំណោមគណៈកម្មាធិការទាំងនោះ គណៈកម្មាធិការស៊ើបការណ៍សម្ងាត់របស់ព្រឹទ្ធសភាដែលមានសិទ្ធិអំណាចគ្របដណ្ដប់លើទីភ្នាក់ងារស៊ើបការណ៍សម្ងាត់ជាង ១៧ កំពុងស្ថិតក្នុងដំណាក់កាលដំបូងនៃការស៊ើបអង្កេតដែលបានចាប់ផ្ដើមកាលពីខែមករាកន្លងមកនេះ។ ដំបូង គណៈកម្មាធិការនេះ ផ្ដោតការស៊ើបអង្កេតលើការប៉ុនប៉ងរបស់រុស្ស៊ីក្នុងការលបចូលប្រព័ន្ធអ៊ីនធឺណិត និងការផ្ដល់ព័ត៌មានក្លែងក្លាយនៅក្នុងអំឡុងពេលបោះឆ្នោតប្រធានាធិបតីសហរដ្ឋអាមេរិក។ ក្រោយមក គណៈកម្មធិការនេះបានពង្រីកការស៊ើបអង្កេតរបស់ខ្លួនទៅគ្របដណ្តប់លើអ្វីដែលសមាជិកគណៈកម្មាធិការបានរៀបរាប់ថា ជាទំនាក់ទំនងរវាងក្រុមមន្ត្រីរដ្ឋាភិបាលរុស្ស៊ី និងយុទ្ធនាការនយោបាយរបស់សហរដ្ឋអាមេរិក។
គណៈកម្មាធិការយុត្តិធម៌របស់ព្រឹទ្ធសភា ដែលមានសិទ្ធិអំណាចត្រួតពិនិត្យលើក្រសួងយុត្តិធម៌ និងទីភ្នាក់ងារ FBI កំពុងធ្វើការស៊ើបអង្កេតរបស់ខ្លួន និងបានស្នើក្រសួងយុត្តិធម៌ឲ្យផ្តល់នូវព័ត៌មាន និងឯកសារដែលទាក់ទងទៅនឹងស្ថានការណ៍ដែលឈានដល់ការលាលែងពីតំណែងរបស់លោក Michael Flynn។
អនុគណៈកម្មាធិការយុត្តិធម៌ព្រឹទ្ធសភាទទួលបន្ទុកផ្នែកឧក្រិដ្ឋកម្ម និងភេរវកម្ម ដែលដឹកនាំដោយលោក Lindsey Graham ដែលជាមន្ត្រីប្រកាន់គោលនយោបាយម៉ឺងម៉ាត់ជាមួយប្រទេសរុស្ស៊ី កាលពីដើមខែកុម្ភៈកន្លងទៅនេះ បានប្រកាសពីផែនការមួយចំនួនដើម្បីស៊ើបអង្កេតអំពីការជ្រៀតជ្រែករបស់រុស្ស៊ី។ ក្រុមនេះមានយុត្តាធិការលើនាយកដ្ឋានព្រហ្មទណ្ឌនៃក្រសួងយុត្តិធម៌ ក៏ដូចជាទីភ្នាក់ងារ FBI ផងដែរ។
គណៈកម្មាធិការស៊ើបការណ៍សម្ងាត់របស់រដ្ឋសភា ដែលទទួលបន្ទុកលើការត្រួតពិនិត្យទីភ្នាក់ងារស៊ើបការណ៍សម្ងាត់ចំនួន ១៧ កំពុងធ្វើការស៊ើបអង្កេតលើ «បញ្ហាស៊ើបការណ៍សម្ងាត់ ឬបញ្ហាការប្រឆាំងនឹងការស៊ើបការណ៍សម្ងាត់នានា» ដែលពាក់ព័ន្ធជាមួយនឹងប្រទេសរុស្ស៊ីនិងការបោះឆ្នោតប្រធានាធិបតីសហរដ្ឋអាមេរិក។
គណៈកម្មាធិការយុត្តិធម៌របស់រដ្ឋសភា ដែលត្រួតពិនិត្យលើក្រសួងយុត្តិធម៌ កំពុងធ្វើការស៊ើបអង្កេតរបស់ខ្លួនផ្ទាល់ ដោយសមាជិកសភាមកពីគណបក្សសាធារណរដ្ឋគ្រោងនឹងសរសេរលិខិតមួយច្បាប់ទៅកាន់រដ្ឋមន្ត្រីក្រសួងយុត្តិធម៌លោក Jeff Sessions ដើម្បីស្នើសុំកិច្ចសហប្រតិបត្តិការរបស់លោកនៅក្នុងការស៊ើបអង្កេតលើករណីជ្រៀតជ្រែករបស់ប្រទេសរុស្ស៊ីនេះ។
រដ្ឋមន្ត្រីក្រសួងយុត្តិធម៌លោក Jeff Sessions។
គណកម្មាធិការត្រួតពិនិត្យរដ្ឋសភា និងកំណែទម្រងរដ្ឋាភិបាល ដែលជាគណៈកម្មាធិការស៊ើបអង្កេតចម្បងរបស់សភាទាំងពីរថ្នាក់ ដែលមានយុត្តាធិការត្រួតពិនិត្យលើរដ្ឋាភិបាលទាំងមូល កំពុងស៊ើបអង្កេតការលេចធ្លាយព័ត៌មានសម្ងាត់អំពីលោក Michael Flynn និងអំពីទំនាក់ទំនងរបស់លោកជាមួយប្រទេសរុស្ស៊ី ហើយបានផ្ញើលិខិតមួយទៅអាជ្ញាធរថ្នាក់ដឹកនាំដើម្បីសួរនាំថាតើលោក Flynn ទទួលបានថវិកាណាមួយពីរដ្ឋាភិបាលរុស្ស៊ីសម្រាប់ការបង្ហាញខ្លួនរបស់លោកនៅក្នុងកម្មវិធីកម្សាន្តមួយក្នុងទីក្រុងមូស្គូ កាលពីឆ្នាំ ២០១៥។
គណៈកម្មាធិការសភាផ្សេងៗទៀត ដូចជាគណៈកម្មាធិការកិច្ចការការពារប្រទេសរបស់ព្រឹទ្ធសភា និងគណៈកម្មាធិការទំនាក់ទំនងបរទេសរបស់ព្រឹទ្ធសភា បានបើកសវនាការអំពីការចោទប្រកាន់លើការលបលួចព័ត៌មានពីប្រព័ន្ធអ៊ីនធឺណិតរបស់ប្រទេសរុស្ស៊ីនៅកាលពីរដូវក្ដៅឆ្នាំមុន។ សមាជិកព្រឹទ្ធសភាលោក John McCain ដែលជាប្រធានគណៈកម្មាធិការកិច្ចការការពារប្រទេស បានសរសេរលិខិតមួយច្បាប់ទៅកាន់សេតវិមានកាលពីខែកុម្ភៈកន្លងទៅនេះ ដើម្បីស្នើសុំព័ត៌មានអំពីទំនាក់ទំនងរបស់លោក Flynn ជាមួយនឹងប្រទេសរុស្ស៊ី។
ប៉ុន្តែក្នុងចំណោមការស៊ើបអង្កេតទាំងអស់របស់សភា ការស៊ើបអង្កេតមួយដែលប្រហែលជាសំខាន់ជាងគេ គឺការស៊ើបអង្កេតដែលដឹកនាំដោយគណៈកម្មាធិការស៊ើបការណ៍សម្ងាត់របស់ព្រឹទ្ធសភា ដែលជាគណៈកម្មាធិការទទួលបន្ទុកលើការស៊ើបអង្កេតទ្រង់ទ្រាយធំនានា ដូចជាការស៊ើបអង្កេតលើការធ្វើទារុណកម្មដ៏ចម្រូងចម្រាសរបស់ទីភ្នាក់ងារ CIA កាលពីឆ្នាំ ២០១៤ និងការវាយប្រហារដោយពួកសកម្មប្រយុទ្ធទៅលើទីតាំងចំនួនពីររបស់រដ្ឋាភិបាលសហរដ្ឋអាមេរិកនៅក្នុងទីក្រុង Benghazi ប្រទេសលីប៊ី កាលពីឆ្នាំ ២០១២។
គណៈកម្មាធិការនេះមិនត្រឹមតែមានយុត្តាធិការទូលំទូលាយលើកិច្ចការស៊ើបការណ៍សម្ងាត់ ដោយសារមានបុគ្គលិក និងធនធានដើម្បីស៊ើបអង្កេតលើបញ្ហាអស់ទាំងនេះប៉ុណ្ណោះទេ ប៉ុន្តែការស៊ើបអង្កេតរបស់គណៈកម្មាធិការនេះលើការជ្រៀតជ្រែករបស់រុស្ស៊ីទទួលបានការគាំទ្រពីលោក Mark Warner សមាជិកសភាមកពីគណបក្សប្រជាធិបតេយ្យ បើទោះបីជាការស៊ើបអង្កេតផ្សេងទៀតរបស់សភាដែលដឹកនាំដោយសមាជិកសភាមកពីគណបក្សសាធារណរដ្ឋត្រូវបានរិះគន់ដោយគណបក្សប្រជាធិបតេយ្យថាមានការប្រកាន់បក្សពួកក៏ដោយ។
លោក Andrew Kent សាស្ត្រាចារ្យនៅសាកលវិទ្យាល័យច្បាប់ Fordham នៅក្នុងទីក្រុងញូវយ៉ក ដែលបានសរសេរអត្ថបទជាច្រើនអំពីការស៊ើបអង្កេតលើទំនាក់ទំនងរបស់រុស្ស៊ីជាមួយលោក Trump បាននិយាយថា ទីភ្នាក់ងារ FBI និងគណៈកម្មាធិការសភាអាមេរិក កំពុងផ្ដោតទៅលើទិដ្ឋភាពផ្សេងៗគ្នានៃទំនាក់ទំនងដែលគេសង្ស័យថាអាចកើតមានឡើងរវាងលោក Trumpនិងប្រទេសរុស្ស៊ី។
លោក Andrew Kent បាននិយាយយ៉ាងដូច្នេះថា៖ «ការផ្ដោតរបស់ទីភ្នាក់ងារ FBI គឺទៅលើថាតើច្បាប់សហព័ន្ធណាមួយត្រូវបានគេបំពាន ឬក៏យ៉ាងណានោះ។ ចំណែកឯគណៈកម្មាធិការសភាវិញ អាចពិនិត្យមើលឲ្យកាន់តែទូលាយបន្ថែមទៀត និងមិនចាំបាច់ផ្ដោតលើថាតើច្បាប់ជាក់លាក់ណាមួយដែលត្រូវបានគេបំពាននោះទេ»។
រូបឯកសារ៖ លោកត្រាំនិយាយជាមួយប្រធានាធិបតីរុស្ស៊ី Vladimir Putin តាមទូរស័ព្ទពីសេតវិមាន កាលពីខែមករា។
ខណៈពេលដែលគ្មានការស៊ើបអង្កេតណាមួយមានភាពឯករាជ្យពិតប្រាកដនោះ លោក Kent បានមានប្រសាសន៍ថា យ៉ាងហោចណាស់មានជម្រើស ៤ ដើម្បីអនុវត្តការស៊ើបអង្កេតបែបនេះ។ ជម្រើសទាំងនោះមានដូចជា គណៈកម្មាធិការសភាដែលត្រូវបានជ្រើសរើសមួយ ដែលមានការគ្រប់គ្រងរួមគ្នាដោយគណបក្សប្រជាធិបតេយ្យ និងគណបក្សសាធារណរដ្ឋ; គណៈកម្មការសភាដែលបង្កើតឡើងដោយមិនលំអៀង ស្រដៀងទៅនឹងក្រុមក្រុមការងារស៊ើបអង្កេតព្រឹត្តិការណ៍វាយប្រហារថ្ងៃទី១១ ខែកញ្ញា ឆ្នាំ ២០០១; រដ្ឋអាជ្ញាពិសេស ឬក្រុមប្រឹក្សាឯករាជ្យមួយ ដែលមានអំណាចប្រតិភូកម្មពេញលេញដូចទៅនឹងសិទ្ធិអំណាចរបស់រដ្ឋមន្ត្រីក្រសួងយុត្តិធម៌ដែរ។
ប៉ុន្តែដោយសារតែមានការប្រឆាំងពីសេតវិមាន និងការគ្រប់គ្រងសភាដោយគណបក្សសាធារណរដ្ឋ លោកបានបន្ថែមថា គ្មានជម្រើសណាមួយទំនងជាអាចកើតមានឡើងនោះទេ នៅពេលនេះ។
លោក Richard Ben-Veniste អតីតប្រធានក្រុមការងារ Watergate ដែលស៊ើបអង្កេតលើលោកអតីតប្រធានាធិបតី Richard Nixon នៅក្នុងទសវត្សរ៍ ១៩៧០ បាននិយាយថា លោក Jeff Sessionsគួរតែប្រគល់ការងារត្រួតពិនិត្យការស៊ើបអង្កេតទាំងនេះ ទៅឲ្យរដ្ឋមន្ត្រីស្ដីទីក្រសួងយុត្តិធម៌លោក Dana Boente ដែលមានមុខងារជារដ្ឋអាជ្ញា។
លោក Ben-Veniste បានបញ្ជាក់យ៉ាងដូច្នេះថា៖ «លោក Dana Boente គឺជារដ្ឋអាជ្ញាដែលមានបទពិសោធន៍ ហើយទំនងជាអាចទុកចិត្តបានក្នុងការគ្រប់គ្រងលើស៊ើបអង្កេតនេះ»។
លោក Andrew Kent បាននិយាយថា នៅក្នុងសភា ខណៈពេលដែលគណបក្សសាធារណរដ្ឋបានរួមគ្នាបដិសេធការអំពាវនាវរបស់គណបក្សប្រជាធិបតេយ្យឲ្យមានការបង្កើតគណៈកម្មាធិការមួយដើម្បីស៊ើបអង្កេតលើទំនាក់ទំនងណាមួយរវាងប្រទេសរុស្ស៊ី និងលោក Trump ដែលគំនិតនោះទំនងជាទាក់ទាញការចាប់អារម្មណ៍ ពេលដែលមានព័ត៌មានថ្មីៗត្រូវបានបង្ហាញឡើង។
ដោយសារតែវិសាលភាពនៃទាក់ទំនងរវាងយុទ្ធនាការឃោសនាបោះឆ្នោតរបស់លោក Trump និងប្រទេសរុស្ស៊ីមិនទាន់បានដឹងនោះ លោក Ben-Veniste បាននិយាយថា វាជាការប្រញាប់ប្រញាល់ពេកក្នុងការនិយាយថា ចម្ងល់អំពីករណីប្រទេសរុស្ស៊ីនឹងឈានដល់ការស៊ើបអង្កេតបែប Watergate នោះ។ ទោះជាយ៉ាងណាក៏ដោយ លោកបាននិយាយថា លោកបានសម្លឹងឃើញចំណុចដូចគ្នារវាងរឿងអាស្រូវធំៗទាំងពីរនេះ។
លោកបានបញ្ជាក់បន្ថែមយ៉ាងដូច្នេះថា៖ «នៅក្នុងប្រវត្តិសាស្ត្រ យើងបានឃើញស្ថានភាពស្រដៀងគ្នានេះដែរ ដែលក្នុងនោះ ដើម្បីការពារកេរ្តិ៍ឈ្មោះរបស់ខ្លួន គណបក្សនយោបាយបានអះអាងថា ការបង្កើតក្បាលម៉ាស៊ីនស៊ើបអង្កេតពិសេសណាមួយដើម្បីធានាចំពោះសាធារណជនទូទៅថា ការស៊ើបអង្កេតនេះជាការស៊ើបអង្កេតដែលធ្វើឡើងដោយត្រឹមត្រូវនោះ គឺជារឿងដែលមិនចាំបាច់ទាល់តែសោះ។ រាល់ពេលដែលការតវ៉ាដំបូងៗទាំងនោះទទួលបានជោគជ័យ ហើយការស៊ើបអង្កេតពិសេសមួយបានកើតឡើង វាបានបង្ហាញថា មានភ្លើងនៅពីក្រោយផ្សែង»។
ប្រែសម្រួលដោយ ផន បុប្ផា