អតីតមេដឹកនាំគណបក្សសង្គ្រោះជាតិ ដែលត្រូវបានរំលាយដោយតុលាការកំពូលកម្ពុជា បានថ្លែងចោទប្រធានគណបក្សប្រជាជនកម្ពុជា លោកហ៊ុន សែន ថាបាននិងកំពុងបំបែកគណបក្សប្រឆាំងដែលមានលោកកឹម សុខា ជាប្រធានតែស្ថិតក្នុងការជាប់ឃុំក្នុងផ្ទះ។ នេះបើយោងតាមការប្រកាសរបស់លោកសម រង្ស៊ី តាមបណ្តាញសង្គមហ្វេសប៊ុកកាលពីថ្ងៃអង្គារ។
ក្នុងវីដេអូឃ្លីបដែលមានរយៈពេលជាងពីរនាទីរបស់លោកសម រង្ស៊ី ដែលបានបង្ហោះលើទំព័រហ្វេសប៊ុកផ្ទាល់ខ្លួន លោកសម រង្ស៊ី បានអំពាវនាវឲ្យអ្នកគាំទ្រគណបក្សប្រឆាំងទាំងអស់កុំចាញ់ល្បិចកលនយោបាយរបស់លោកនាយករដ្ឋមន្ត្រីហ៊ុន សែន ដែលលោកចោទថា បានកំពុងយកលោកកឹម សុខា ជាចំណាត់ខ្មាំងខាងនយោបាយ ដើម្បីកម្ចាយគណបក្សសង្គ្រោះជាតិ។
លោកសម រង្ស៊ី ថ្លែងថា៖
«លោកប្រធានកឹម សុខា ត្រូវហ៊ុន សែន ចាប់យកទៅឃុំឃាំង លោកមិនអាចធ្វើអីបានទេ លោកអត់មានសេរីភាពទេ គេយកឈ្មោះលោកកឹម សុខា យកទៅប្រើទៀត នេះជាល្បិចហ៊ុន សែន ដើម្បីបំបែកបំបាក់គណបក្សសង្គ្រោះជាតិ»។
សារនយោបាយដែលលោកសម រង្ស៊ី ថ្លែងពីទីក្រុងអាត្លង់តាសហរដ្ឋអាមេរិកបានបន្ថែមថា៖
«តែយើងត្រូវតែរួមកម្លាំងគ្នាជាដាច់ខាត ជាធ្លុងមួយ ហើយយើងត្រូវយល់ឲ្យច្បាស់រក្សាជំហរ ឲ្យច្បាស់កឹម សុខា និងសម រង្ស៊ី ជាមនុស្សតែមួយទេ បេះដូងតែមួយ គោលបំណងតែមួយ។ គឺសង្គ្រោះជាតិយើងទាំងអស់គ្នា»។
លោកផៃ ស៊ីផាន អ្នកនាំពាក្យរដ្ឋាភិបាលខ្មែរ ប្រាប់ VOA នៅថ្ងៃពុធនេះ ការអធិប្បាយរបស់អតីតមេដឹកនាំគណបក្សប្រឆាំងលោកសម រង្ស៊ី គឺជាសារនយោបាយច្រំដែលៗ។ លោកមានប្រសាសន៍ថា៖
«គាត់និយាយជិត២០ ឆ្នាំហើយអាហ្នឹង ខ្ញុំមិនសូវចាប់អារម្មណ៍ទេគាត់ ឲ្យគាត់ថាម៉េចថាទៅ អាហ្នឹងជារឿងរបស់គាត់ទេ។ ហើយគាត់មិនទុកចិត្តខ្លួនគាត់ គាត់ចេះបន្ទោសគេ បន្ទោសឯង រហូតបានចងក្រងក្រមមួយ គេថា «មិនខ្លាច មិនលក់ មិនបែក» អាហ្នឹងពីគាត់បង្កើត ពាក្យខ្លួនគាត់ទេ ដូច្នេះ គ្រាន់តែ ឲ្យគេចាប់អារម្មណ៍ទៅលើគាត់តែប៉ុណ្ណឹង ក្នុងការលើកឡើងបាទ»។
ការអធិប្បាយរបស់លោកសម រង្ស៊ី ដែលបានចោទថា លោកហ៊ុន សែន ព្យាយាមប្រើល្បិចបំបែកបំបាក់គណបក្សសង្គ្រោះជាតិ បានធ្វើឡើង បន្ទាប់ពីលោកបានជួបជុំគ្នាជាមួយក្រុមដែលស្និទ្ធនឹងលោក ដើម្បីធ្វើសន្និសីទពិភពលោកមួយរបស់គណបក្សសង្គ្រោះជាតិនៅទីក្រុងអាត្លង់តា រដ្ឋ Georgia សហរដ្ឋអាមេរិក កាលពីថ្ងៃទី១និងទី២ ខែធ្នូ កន្លងទៅនេះ។
ក្នុងពេលធ្វើសន្និសីទនោះ លោក សម រង្ស៊ី ដែលជាប្រធានចលនាសង្គ្រោះជាតិផងនោះបានប្រកាសទទួលយកឋាន:ជាប្រធានស្តីទីគណបក្សសង្គ្រោះជាតិក្នុងពេលដែលលោក កឹម សុខា នៅជាប់ឃុំឃាំងក្នុងគេហដ្ឋាន ទៅតាមការស្នើរបស់តំណាងដែលចូលរួមសន្និសីទពិភពលោកនោះ។
ពីរថ្ងៃក្រោយសន្និសីទនោះ លោកចាន់ ចេន មេធាវីមួយរូបរបស់លោកកឹម សុខា បានប្រាប់ VOA ថា លោកសម រង្ស៊ី កំពុងរំលោភលក្ខខន្តិកៈរបស់បក្សនិងមិនពេញចិត្តនឹងការធ្វើសន្និសីទរបស់ក្រុមអ្នកគាំទ្រគណបក្សសង្គ្រោះជាតិនៅទីក្រុងអាត្លង់តា រដ្ឋ Georgia សហរដ្ឋអាមេរិកទេ។
VOA ព្យាយាមសុំការអធិប្បាយបន្ថែម ពីលោកចាន់ ចេន តែទូរស័ព្ទលោករោទិ៍ គ្មានអ្នកទទួល។ អ្នកស្រីម៉េងសុភារី មេធាវី មួយរូបទៀត របស់លោកកឹម សុខា មិនមានការអធិប្បាយទៅលើការថ្លែងរបស់លោកសម រង្ស៊ី ហើយថា អ្វីដែលលោកសម រង្ស៊ី បានលើកឡើងពាក់ព័ន្ធនឹងកូនក្តីអ្នកស្រីនោះ គ្រាន់តែជាការបញ្ចេញការយល់ឃើញមួយតែប៉ុណ្ណោះ។
«ពីមុនដូចជាគាត់លើកករណីរឿងភ្នាល់ហ្នឹង វាមានប៉ះពាល់ហើយ អ៊ីចឹង យើងក៏បានធ្វើសេចក្តីថ្លែងការណ៍មួយ ដោយសារតែការភ្នាល់របស់គាត់ហ្នឹង វាប៉ះពាល់ទៅដល់ដំណើរការនីតិវិធីរបស់កូនក្តីយើងខ្ញុំច៎ា។ ហើយដោយឡែក ចំពោះការណ៍ដែលគាត់លើកឡើងថ្មីៗនេះ គឺជាការយល់ឃើញស្រេចតែគាត់យល់ឃើញទៅចុះ។ ហើយចំពោះយើងខ្ញុំសុំមិន ធ្វើការអត្ថាធិប្បាយទាក់ទងទៅនឹងការយល់ឃើញរបស់គាត់ទេ»។
គ្រាលោកសម រង្ស៊ី បន្តថ្លែងការពារថា លោកកឹម សុខា និងរូបលោកជាមនុស្សតែមួយនោះ ក្រុមមន្ត្រីរបស់គណបក្សសង្គ្រោះជាតិ ក៏ត្រូវបានគេមើលឃើញថ្លែងសារនយោបាយផ្សេងៗគ្នានៅក្នុងបណ្តាញសង្គមហ្វេសប៊ុក។ មន្ត្រីមួយចំនួនដែលគាំទ្រលោកកឹម សុខា បានរិះគន់ទស្សនៈនយោបាយរបស់លោកសម រង្ស៊ី ចំពោះការស្តារគណបក្សសង្គ្រោះជាតិឲ្យបានដំណើរការឡើងវិញ នៅគ្រាលោកកឹម សុខា គ្មានសេរីភាពធ្វើនយោបាយ ចំណែកមន្ត្រីមួយចំនួនទៀត ដែលគាំទ្រលោកសម រង្ស៊ី បានថ្លែងកោតសរសើរលោកសម រង្ស៊ី ចំពោះការធ្វើនយោបាយការបរទេសរបស់លោក។
លោកបណ្ឌិតមាស នី អ្នកឃ្លាំមើលស្ថានការណ៍នយោបាយកម្ពុជា មានប្រសាសន៍ប្រាប់ VOA ភាពជ្រុលនិយមរបស់ក្រុមនិយមបុគ្គលក្នុងគណបក្សប្រឆាំង កំពុងនាំគណបក្សមួយនេះ ជួបវិបត្តិផ្ទៃក្នុងបក្ស។ លោកមានប្រសាសន៍ថា៖
«ខ្ញុំមើលទៅក្រុមអ្នកផ្កាប់មុខ ទៅលើបុគ្គលរៀងខ្លួនហ្នឹង ក៏បានបង្កឲ្យមានបញ្ហាធំៗច្រើនដែរ បើ[យើង] បើខ្ញុំស្តាប់ទៅ។ ព្រោះអីដូចក្នុងលក្ខខណ្ឌហ្នឹង ឯកឧត្តមសម រង្ស៊ី ដែលមកកាន់ធ្វើប្រធានក្នុងពេលនេះ គឺជាប្រធានស្តីទី នៅពេលដែលលោកកឹម សុខា មិនបាន មិនទាន់មានការដោះលែង ហើយនៅក្នុងលក្ខខណ្ឌនោះ តាមខ្ញុំដឹង ថាកាលណា លោកកឹម សុខា គេត្រូវបាន គេដោះលែងមកវិញ ពេលនោះ គឺលោកកឹម សុខា នឹងឡើងមកជាប្រធានសង្គ្រោះជាតិហ្នឹងដដែល ដដែលវិញបាទ។ ទាំងហ្នឹងហើយដែលពួកក្រុមដែលផ្កាប់មុខទៅលើបុគ្គលរៀងខ្លួនហ្នឹងគឺ អត់បានមើលអាហ្នឹងទេ គ្រាន់តែ ឮសូរថាមានការប្រជុំអី គឺនាំគ្នាប្រកាស គឺថា ដៀលគ្នាទៅវិញទៅមក តែម្តងបាទ។ នេះជារឿងមួយ មិនល្អមើលទេ ហើយក្រុមអ្នកផ្កាប់មុខទាំងអស់ហ្នឹង ជួនកាលពេលខ្លះធ្វើឲ្យគ្រោះថ្នាក់ដល់បក្សហ្នឹង ច្រើនជាជាងការគិតគូរអំពីរឿងជាតិ»។
នៅមុនការរំលាយគណបក្សសង្គ្រោះជាតិ កាលពីឆ្នាំ២០១៧ លោកកឹម សុខា ត្រូវបានអាជ្ញាធរចាប់ដាក់ក្នុងពន្ធនាគារ ក្រោមបទចោទលោកបានឃុបឃឹតជាមួយសហរដ្ឋអាមេរិក ក្នុងបំណងផ្តួលរំលំរដ្ឋាភិបាលរបស់លោកហ៊ុន សែន ដែលស្មើនឹងការប្រព្រឹត្តអំពើក្បត់ជាតិ។ លោកកឹម សុខា បានច្រានចោលការចោទប្រកាន់នោះ។
តែទោះជាយ៉ាងណាក៏ដោយ លោកកឹម សុខា ត្រូវបានតុលាការបង្គាប់ឲ្យឃុំខ្លួនរយៈពេលជាងមួយឆ្នាំ ក្នុងពន្ធនាគារមួយដែលស្ថិតនៅខេត្តត្បូងឃ្មុំ ដែលស្ថិតនៅភាគខាងកើតប្រទេសកម្ពុជា និងមានព្រំប្រទល់ជាប់ប្រទេសវៀតណាម។ បច្ចុប្បន្ននេះ លោកកំពុងស្ថិតក្នុងការជាប់ឃុំឃាំងក្នុងផ្ទះរបស់លោកនាទីក្រុងភ្នំពេញ។
ប្រទេសប្រជាធិបតេយ្យធំៗ រួមមានសហរដ្ឋអាមេរិក និងសហភាពអឺរ៉ុប បានព្រមានរដ្ឋាភិបាលទីក្រុងភ្នំពេញជាបន្តបន្ទាប់ ដោយសហរដ្ឋអាមេរិក បានគំរាមផ្អឹបទ្រព្យសម្បតិ្តក្រុមមន្ត្រីកម្ពុជារូបណា ដែលធ្វើឲ្យខូចដំណើរការប្រជាធិបតេយ្យនៅកម្ពុជា និងបានដាក់បម្រាមក្រុមមន្ត្រីកម្ពុជាមួយចំនួនមិនឲ្យចូលក្នុងទឹកដីរបស់ប្រទេសអាមេរិកផងដែរ រីឯសហភាពអឺរ៉ុបបានរំឭករដ្ឋាភិបាលលោកហ៊ុន សែន ឲ្យរួសរាន់ស្តារការអនុវត្តដំណើរប្រជាធិបតេយ្យសេរីពហុបក្ស និងការគោរពសិទ្ធិមនុស្ស និងសិទ្ធិនយោបាយជាបន្ទាន់ នៅមុនពេលកម្ពុជាបាត់បង់ការគាំទ្រខាងពាណិជ្ជកម្ម ក្រោមគំនិតផ្តួចផ្តើមពាណិជ្ជកម្ម «គ្រប់មុខទំនិញលើកលែងសព្វាវុធ» ឬហៅថា EBA នោះ៕