ប្រទេសកូរ៉េខាងជើងកំពុងរៀបចំទទួលគណៈប្រតិភូ ដែលខ្លួនអញ្ជើញមកពីប្រទេសចិននិងរុស្ស៊ីក្នុងសប្តាហ៍នេះ ដើម្បីចូលរួមក្នុងពិធីបុណ្យខួបលើកទី៧០ នៃទិវាជ័យជម្នះ ដែលខ្លួនបានប្រកាសដោយខ្លួនឯង ដែលនេះជាសកម្មភាពលើកលែងមួយ នៅក្នុងអំឡុងពេលនៃការបិទច្រកព្រំដែនរបស់ខ្លួនទាំងអស់ ដែលនៅជាធរមាននៅឡើយ ចាប់តាំងពីដើមឆ្នាំ២០២០មក នៅពេលដែលមានការចាប់ផ្តើមការឆ្លងរាតត្បាតជំងឺកូវីដ១៩។
ថ្ងៃទី២៧ ខែកក្កដាស្អែកនេះ ជាថ្ងៃចុះហត្ថលេខាលើកិច្ចព្រមព្រៀងឈប់បាញ់គ្នាមួយ ដែលត្រូវបានចរចាអស់រយៈពេលជាយូរ ដើម្បីផ្អាកសង្គ្រាមកូរ៉េ។ កូរ៉េខាងជើងអះអាងថា សង្រ្គាមកូរ៉េ ដែលចាប់ផ្តើមពីឆ្នាំ១៩៥០ ដល់ឆ្នាំ១៩៥៣នោះ ត្រូវបានបញ្ឆេះឡើងដោយសហរដ្ឋអាមេរិកនិងកូរ៉េខាងត្បូង ហើយនៅទីបំផុតខ្លួនជាអ្នកទទួលជ័យជម្នះយ៉ាងត្រចះត្រចង់លើសង្គ្រាមនេះ។
ប្រព័ន្ធព័ត៌មានរដ្ឋកូរ៉េខាងជើងនៅថ្ងៃពុធនេះ បានផ្សព្វផ្សាយរូបថតរដ្ឋមន្ត្រីការពារជាតិរុស្ស៊ីលោក Sergei Shoigu ដែលទើបមកដល់អាកាសយានដ្ឋានអន្តរជាតិក្រុងព្យុងយ៉ាងកាលពីយប់ម្សិលមិញ និងត្រូវបានទទួលស្វាគមន៍រាក់ទាក់ ដោយសមភាគីកូរ៉េខាងជើងរបស់លោក គឺរដ្ឋមន្ត្រីការពារជាតិ លោក Kang Sun Nam។
នៅក្នុងសេចក្តីថ្លែងការណ៍មួយរបស់ខ្លួន ក្រសួងការពារជាតិរុស្ស៊ី បានហៅដំណើរទស្សនកិច្ចនេះថា នឹងជួយពង្រឹងចំណងទាក់ទងយោធារវាងរុស្ស៊ីនិងកូរ៉េខាងជើង ហើយថា វាជាដំណាក់កាលដែលមានសារៈសំខាន់មួយ នៅក្នុងការអភិវឌ្ឍកិច្ចសហប្រតិបត្តិការរវាងប្រទេសទាំងពីរ»។
ព្រឹត្តិការណ៍នៃពិធីបុណ្យជាតិដ៏ធំនេះ ត្រូវគេរំពឹងថា នឹងប្រព្រឹត្តទៅនៅថ្ងៃព្រហស្បតិ៍ ដោយមានការដើរក្បួនព្យុហយាត្រាយ៉ាងធំនៅពេលរាត្រី នៅក្នុងអ្វីដែលជាការបង្អួតយុទ្ធោបករណ៍ធុនធ្ងន់ ដែលប្រទេសនេះបានអភិវឌ្ឍឡើងក្នុងឆ្នាំកន្លងមក។
ទន្ទឹមនឹងនេះដែរ ប្រទេសចិនក៏បានបញ្ជូនតំណាងរបស់ខ្លួន គឺអនុប្រធានគណៈកម្មាធិការអចិន្ត្រៃយ៍នៃសភាប្រជាជនចិនលោក Li Hongzhong ទៅចូលរួមនៅក្នុងការប្រារព្ធពិធីនេះផងដែរ ដែលដំណើរទស្សនកិច្ចរបស់មន្ត្រីជាន់ខ្ពស់ចិនរូបនេះ នឹងត្រូវចាប់ផ្តើមនៅថ្ងៃពុធនេះ៕
រដ្ឋមន្ត្រីការពារជាតិរុស្ស៊ីកំពុងស្ថិតនៅកូរ៉េខាងជើង ដើម្បីចូលរួមប្រារព្ធទិវាជ័យជម្នះ
រូបថតផ្សាយដោយទីភ្នាក់ងារព័ត៌មានមជ្ឈិមកូរ៉េនេះបង្ហាញរដ្ឋមន្ត្រីការពារជាតិរុស្ស៊ីលោក Sergei Shoigu (ស្តាំ) ត្រូវបានស្វាគមន៍ដោយរដ្ឋមន្ត្រីការពារជាតិកូរ៉េខាងជើង លោក Kang Sun Nam អាកាសយានដ្ឋានអន្តរជាតិក្រុងព្យុងយ៉ាង កាលពីថ្ងៃទី២៥ ខែកក្កដា ឆ្នាំ២០២៣។
ក្រុងសេអ៊ូល ប្រទេសកូរ៉េខាងត្បូង —