ការរញ្ជួយដីដ៏ធំមួយកម្លាំង៨,៩បានអង្រន់ឆ្នេរសមុទ្រភាគឦសានប្រទេសជប៉ុន ដោយបង្កើតឲ្យមានរលកយក្ស ស៊ូណាមិ (Tsunami) កម្ពស់១០ម ដែលបោកអូសយកកប៉ាល់ ផ្ទះ ឡាននៅតាមបណ្តោយឆ្នេរសមុទ្រ ប្រទេសជប៉ុន។មានមនុស្សយ៉ាងតិច២០០នាក់ស្លាប់ តែក្រុមមន្រ្តីប្រមាណថា ចំនួនអ្នកស្លាប់នឹងកើនឡើង។
រូបថតតាមវីដេអូពីតំបន់ឆ្នេរសមុទ្រ ដែលរងប៉ះពាល់ពីកម្លាំងរលក Tsunami បង្ហាញឲ្យឃើញការអន្តរាយដ៏ធំធេងដែលរលកភក់បោកបញ្ជូនបំណែកបាក់បែកច្រើនតោនចូលទៅក្នុងទីវាលស្រែចម្ការនៅSendai ទីប្រជុំជនរបស់សង្កាត់មីយ៉ាគ្ហី ។រថយន្តច្រើនរយ និងផ្ទះច្រើនខ្នងក្នុងតំបន់នោះត្រូវអន្តរាយហូររសាត់តាមរលកទឹកទៅឆ្ងាយ ហើយក្រោយមកប៉ូលិសបានរកឃើញសពមនុស្ស២០០នាក់ដែលត្រូវរលកអូសទៅបោកបក់នៅឆ្នេរសមុទ្រ។ រលកទឹកបាននៅបន្តធ្វើឲ្យសហគមជាច្រើននៅតាមបណ្តោយឆ្នេរខាងកើតប្រទេសជប៉ុន ជន់លិច ហើយកន្លែងភាគច្រើននៅប្រទេសនេះ ស្ថិតនៅក្រោមការប្រុងប្រយ័ត្នពីការប៉ះពាល់បណ្តាលមកពីរលកយក្ស Tsunami។
រលក Tsunami ត្រូវគេរំពឹងថា នឹងបោកទៅដល់ប្រទេសទាំងឡាយនៅខាងមហាសាគរប៉ាស៊ីហ្វីក រហូតទៅដល់តំបន់អាមេរិកខាងត្បូង។ កាលពីថ្ងៃសុក្រនៅប្រមាណ៧ម៉ោង ក្រោយពីដីរញ្ជួយមកនោះ លោកYukio Edano អគ្គលេខាធិការខុទ្ទកាល័យជប៉ុន ថ្លែងថា មនុស្សនៅផ្ទះទាំងឡាយដែលនៅជិតរោងចក្រភ្លើងអគ្គិសនីប្រើថាមពលនុយក្លេអែរត្រូវគេបញ្ជាឲ្យចេញពីទីនោះ។
លោក Edano ថ្លែងថា ការជម្លៀសមនុស្សចេញពីតំបន់ជិតរោងចក្រភ្លើង Fukushima Daichi នោះជាវិធានការប្រុងប្រយ័ត្ន ហើយលោកនិយាយថា វិទ្យុសកម្មអត់លេចចេញពីរោងចក្រនោះទេ។ លោកក៏បាននិយាយថា អ្នកស្រុករស់នៅចម្ងាយ១០គ.ម.ពីរោងចក្រភ្លើងអគ្គិសនីនោះត្រូវគេបញ្ជាមិនឲ្យចេញពីផ្ទះទេ។ ការរញ្ជួយដីនោះក៏បានធ្វើឲ្យភ្លើងឆេះនៅរោងចក្រពីរធំៗ ដែលធ្វើផលិតផលពីសារធាតុគីមី បានមកពីការចម្រាញ់ប្រេង។ ទូរទស្សន៍ជប៉ុនបានបង្ហាញ រូបភាពអំពីភូមិករណ៍ ដែលមានអណ្តាតភ្លើងពាសពេញ។
ប្រែសម្រួល នៅ សារីម