អាជ្ញាធរប្រេស៊ីលបាននិយាយថា ពួកគេបានចាប់ខ្លួនអ្នកគាំទ្រអតីតប្រធានាធិបតីប្រេស៊ីលលោក Jair Bolsonaro យ៉ាងតិច ២០០ នាក់ដែលបានរុករកកកូរកកាយតុលាការកំពូល សភា និងវិមានប្រធានាធិបតីនៅក្នុងរដ្ឋធានីប្រាស៊ីលីយ៉ាកាលពីថ្ងៃអាទិត្យ។
អ្នកតវ៉ារាប់ពាន់នាក់បានសម្រុកចូលអគាររដ្ឋាភិបាលទាំងនោះ។ វីដេអូអំពីការបំពានលើទ្រព្យសម្បត្តិរបស់រដ្ឋាភិបាលទាំងនោះបានបង្ហាញឱ្យឃើញថា អ្នកតវ៉ាបានវាយបំបែកបង្អួច តោងឡើងដំបូល និងធ្វើសកម្មភាពបំផ្លិចបំផ្លាញផ្សេងៗទៀត។ ទីភ្នាក់ងារព័ត៌មាន AP បានរាយការណ៍ថាផ្នែកខាងក្នុងនៃអាគារទាំងនោះបានរងការខូចខាត។
អាជ្ញាធរប្រេស៊ីលបាននិយាយថា ពួកគេមានបំណងធ្វើឱ្យក្រុមអ្នកតវ៉ាទាំងនេះទទួលខុសត្រូវចំពោះទង្វើរបស់ពួកគេ ហើយនឹងពិនិត្យមើលអគារទាំងនោះដើម្បីរកស្នាមក្រយៅដៃ និងពិនិត្យមើលលើរូបភាពនានាដែលបានថតក្នុងអំឡុងពេលបំផ្លិចបំផ្លាញអាគារទាំងនោះ។
រដ្ឋមន្ត្រីក្រសួងយុត្តិធម៌ប្រេស៊ីលលោក Flavio Dino បាននិយាយថា រដ្ឋាភិបាលក៏មានបំណងស្វែងរកអ្នកដែលចំណាយលុយជួលរថយន្តក្រុងជាច្រើនគ្រឿងដឹកពួកកុបករទាំងនោះមកកាន់រដ្ឋធានីប្រាស៊ីលីយ៉ាផងដែរ។
ក្រុមអ្នកគាំទ្រលោក Bolsonaro ចង់ឱ្យលោកក្លាយជាប្រធានាធិបតីនៃប្រទេសប្រេស៊ីលម្ដងទៀត ហើយបានអំពាវនាវឱ្យយោធាធ្វើរដ្ឋប្រហារ។ លោក Bolsonaro បានចាញ់នៅក្នុងការបោះឆ្នោតកាលពីពេលថ្មីៗនេះ ដោយនៅក្នុងការបោះឆ្នោតនោះ លោក Luiz Inacio Lula da Silva បានឈ្នះតំណែងជាប្រធានាធិបតី និងបានស្បថចូលកាន់តំណែងកាលពីមួយសប្ដាហ៍មុន។
លោក Bolsonaro បានចាកចេញពីប្រទេសប្រេស៊ីលមុនពេលលោក Lula ចូលកាន់តំណែង ហើយបានស្នាក់នៅក្នុងទីក្រុង Orlando នៃរដ្ឋ Florida សហរដ្ឋអាមេរិក។
ការលុកលុយរបស់អ្នកតវ៉ាក្នុងអាគាររដ្ឋាភិបាលទាំងនេះហាក់ដូចជាធ្វើតាមករណីវាយប្រហារលើវិមានសភាសហរដ្ឋអាមេរិកកាលពីថ្ងៃទី ៦ ខែមករា ឆ្នាំ ២០២១ ដូច្នេះដែរ។ ប៉ុន្តែ ផ្ទុយពីករណីវាយប្រហារនៅវិមានសភាអាមេរិកដែលនៅពេលនោះសមាជិកសភាកំពុងប្រជុំ ករណីវាយប្រហារនៅអគាររដ្ឋាភិបាលរបស់ប្រទេសប្រេស៊ីលនេះ គឺធ្វើឡើងនៅពេលដែលភាគច្រើនមិនមានមន្ត្រីរដ្ឋាភិបាលនៅក្នុងនោះ។
វត្តមានដ៏ខ្លាំងក្លារបស់ប៉ូលិស ឬក៏យោធាក៏មិនមានដែរនៅពេលនោះ បើទោះបីជាមានការព្រមានទុកជាមុនថា ក្រុមអ្នកគាំទ្រលោក Bolsonaro មានផែនការសម្រុកទៅកាន់អាគាររដ្ឋាភិបាលទាំងនោះក៏ដោយ៕
ក្រុមអ្នកតវ៉ានៅប្រេស៊ីលបំផ្លាញអគាររដ្ឋាភិបាល
ប្រធានាធិបតីប្រេស៊ីលលោក Luiz Inacio Lula da Silva ពិនិត្យមើលការខូចខាតនៅវិមាន Planalto បន្ទាប់ពីវិមាននេះត្រូវបានវាយប្រហារដោយអ្នកគាំទ្រអតីតប្រធានាធិបតីប្រេស៊ីល លោក Jair Bolsonaro ក្នុងទីក្រុងប្រាស៊ីលីយ៉ា ប្រទេសប្រេស៊ីល នៅថ្ងៃទី៨ ខែមករា ឆ្នាំ២០២៣។