នៅថ្ងៃអង្គារនេះ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស និងជាអតីតគណៈកម្មការបុណ្យសពលោកបណ្ឌិត កែម ឡី មួយរូបក្នុងចំណោមបីរូប បានចូលបំភ្លឺនៅតុលាការ ដោយបដិសេធការចោទប្រកាន់ក្នុងបណ្តឹងរបស់ប្រធានគណបក្សមួយដែលបានចោទថា លោកធ្វើឲ្យបាត់លុយបច្ច័យបុណ្យ។ អ្នកឃ្លាំមើលសិទ្ធិមនុស្សលើកឡើងថា បណ្តឹងនេះនឹងធ្វើឲ្យប៉ះពាល់ដល់សកម្មភាពស្ម័គ្រចិត្ត និងអំពើមនុស្សធម៌។
លោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារនិងសិទ្ធិមនុស្ស។ (រូបថតផ្តល់ឲ្យលោក មឿន តុលា)
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថាសង់ត្រាល់ និងជាសមាជិកមួយរូបនៃគណៈកម្មការរៀបចំបុណ្យសពលោកបណ្ឌិត កែម ឡី បានបដិសេធថា លោកមិនជាប់ពាក់ព័ន្ធនឹងការកិបកេងលុយក្នុងពិធីបុណ្យសពរបស់លោក កែម ឡីនោះទេ ហើយថា លោកស្នើឲ្យតុលាការតម្កល់រឿងទុកឥតចាត់ការ។
លោក មឿន តុលា ថ្លែងបែបនេះ ក្រោយបញ្ចប់ការចូលបំភ្លឺនៅសាលាដំបូងរាជធានីភ្នំពេញ ទៅតាមបណ្តឹងរបស់ប្រធានគណបក្សយុវជនកម្ពុជា ដែលបានប្តឹងគណៈកម្មការបុណ្យសពចំនួនបីរូប ដែលក្នុងនោះមានលោក មឿន តុលា មួយរូបផង ពីបទរំលោភលើសេចក្តីទុកចិត្ត ពាក់ព័ន្ធនឹងការចោទថា កិបកេងលុយបុណ្យសពរបស់លោកបណ្ឌិត កែម ឡី។
លោក មឿន តុលា ប្រាប់អ្នកសារព័ត៌មាននៅខាងក្រៅតុលាការ នៅថ្ងៃអង្គារនេះថា កាលពីឆ្នាំមុន លោកជាសមាជិកគណៈកម្មការរៀបចំបុណ្យសពលោក កែម ឡី ដែលទទួលបានសិទ្ធិពីភរិយា និងម្តាយរបស់លោក កែម ឡី។ លោកបន្តថា គណៈកម្មការរៀបចំបុណ្យសពបានជួយតែផ្នែកបច្ចេកទេស សកម្មភាពទូទៅ ប៉ុន្តែមិនមានតួនាទីកាន់លុយដែលជាបច្ច័យបុណ្យនោះទេ ហើយលោកថា បណ្តឹងរបស់លោក ពេជ ស្រស់ ដែលជាប្រធានគណបក្សយុវជនកម្ពុជា ក៏មិនមានបញ្ជាក់ពីចំនួនទឹកប្រាក់ដែលលោកថា សមាជិកគណៈកម្មការនេះបានកិបកេងនោះដែរ។
លោក មឿន តុលា បានបដិសេធការចោទប្រកាន់របស់លោក ពេជ ស្រស់ ថា៖
«ការចោទប្រកាន់អស់ហ្នឹងគឺខ្ញុំបដិសេធថា វាអត់ពិត ហើយត្រង់ថា ឆន្ទៈអ្នកប្តឹងយ៉ាងណាៗនោះ ខ្ញុំសុំមិនធ្វើអធិប្បាយទេ ទុកឲ្យសាធារណជនអ្នកសម្រេចចុះ»។
លោក មឿន តុលា បន្ថែមថា ទាក់ទងនឹងបណ្តឹងដែលចោទថា មានការបាត់លុយបច្ច័យបុណ្យនោះ លោកមិនទាន់ដឹងថា តើដើមបណ្តឹងប្តឹងចោទប្រកាន់បាត់លុយចំនួនប៉ុន្មាននោះទេ ហើយថា ព្រះរាជអាជ្ញារងក៏មិនទាន់សម្រេចចោទប្រកាន់ ឬទម្លាក់ចោលការចោទប្រកាន់ណាមួយនៅឡើយទេដែរ។
លោក លី សុផាណា អ្នកនាំពាក្យសាលាដំបូងរាជធានីភ្នំពេញ បានប្រាប់អ្នកសារព័ត៌មានតាមរយៈសារអេឡិចត្រូនិចតេលេក្រាមពាក់ព័ន្ធនឹងសំណុំរឿងនោះ ដោយសម្រង់ន័យដើមថា៖ «អយ្យការអមសាលាដំបូងនឹងបន្តចំណាត់ការតាមនីតិវិធី»។
លោក កែម ឡី អ្នកវិភាគសង្គមដ៏ល្បីល្បាញត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃ នៅកណ្តាលរាជធានីភ្នំពេញ កាលពីខែកក្កដាឆ្នាំទៅ។ មុនការដង្ហែសពលោក កែម ឡីទៅកាន់ផ្ទះកំណើតរបស់លោកក្នុងខេត្តតាកែវ គណៈកម្មការរៀបចំបុណ្យសពត្រូវបានបង្កើតឡើង ដើម្បីរៀបចំបុណ្យសពរបស់លោក កែម ឡី ឲ្យបានអធិកអធមក្នុងវត្តមួយនៅរាជធានីភ្នំពេញ។
ប៉ុន្មានខែក្រោយមក គ្រួសាររបស់លោក កែម ឡី បានប្រារព្ធខួបបុណ្យសពនៃការស្លាប់របស់លោកនៅឯស្រុកកំណើតក្នុងខេត្តតាកែវ និងមានព័ត៌មានថា ពួកគេខ្វះខាតថវិកាក្នុងការប្រារព្ធពិធីបុណ្យនោះ។
កាលពីថ្ងៃទី២២ ខែកញ្ញា ព្រះរាជអាជ្ញារងអមសាលាដំបូងរាជធានីភ្នំពេញគឺលោក គុជ ឡេង បានចេញដីកាកោះហៅអតីតគណៈកម្មការចំនួន៣រូប ដែលរៀបចំបុណ្យសពរបស់លោក កែម ឡី ឲ្យចូលបំភ្លឺនៅដើមខែតុលានេះ ដើម្បីសាកសួរពាក់ព័ន្ធនឹងបទរំលោភលើសេចក្តីទុកចិត្ត។
លោក ស៊ឹង សែនករុណា មន្រ្តីផ្នែកស៊ើបអង្កេតនៃសមាគមការពារសិទ្ធិមនុស្សអាដហុក ប្រាប់ VOA ថា ករណីបណ្តឹងដែលធ្វើឡើងដោយអ្នកដទៃ ខណៈក្រុមគ្រួសារអះអាងថា ពួកគេមិនមានខាតបង់អ្វីនោះ គឺជាករណីចម្លែក និងគួរឲ្យសង្ស័យ។ លោកបន្ថែមថា បណ្តឹងរបស់លោក ពេជ ស្រស់ ដែលប្តឹងអតីតគណៈកម្មការបុណ្យសពលោក កែម ឡី ទាំងបីរូបនោះ អាចបណ្តាលមកពីលោក ពេជ ស្រស់ ចង់ទទួលបានការគាំទ្រក្នុងនាមជាអ្នកនយោបាយមួយរូប។
លោកស៊ឹង សែនករុណា មានប្រសាសន៍ថា៖
«ធម្មតាគាត់អ្នកនយោបាយ គាត់ធ្វើអ្វីមួយដើម្បីទទួលបានប្រជាប្រិយភាពពីការគាំទ្រអីជាដើម។ ប៉ុន្តែចំពោះករណីនេះ ខ្ញុំគិតថា វាមិនមែនជាការធ្វើឲ្យគាត់មានប្រជាប្រិយភាពទេ ព្រោះវាអាចធ្វើប៉ះពាល់ដល់ប្រជាប្រិយភាពគាត់ទៅវិញទេ ហើយផ្ទុយទៅវិញ ការគាំទ្រអីផ្សេងៗអត់មាន មានតែការរិះគន់ និងការថ្កោលទោសពីមហាជនទៅវិញ»។
លោក ស៊ឹង សែនករុណា បន្ថែមថា អតីតសមាជិកគណៈកម្មការបុណ្យ ដែលជាអ្នកធ្វើការអង្គការទាំងបីរូបនោះ បានស្ម័គ្រចិត្តជួយរៀបចំពិធីបុណ្យ ដូច្នេះលោកថា បណ្តឹងរបស់លោក ពេជ ស្រស់ នឹងធ្វើឲ្យប៉ះពាល់ដល់ពេលវេលាធ្វើការរបស់ពួកគាត់ និងធ្វើឲ្យមានការរារែកក្នុងការស្ម័គ្រចិត្តជួយការងារមនុស្សធម៌នៅពេលក្រោយ។ លោករំពឹងថា តុលាការនឹងមិនធ្វើការចោទប្រកាន់ណាមួយលើអ្នកទាំងបីពាក់ព័ន្ធនឹងបណ្តឹងរបស់លោក ពេជ ស្រស់នោះទេ។
លោកមានប្រសាសន៍ថា៖
«វាធ្វើឲ្យប៉ះពាល់ដល់កិច្ចការផ្នែកមនុស្សធម៌របស់ពួកគាត់ហ្នឹង វាធ្វើឲ្យអ្នកផ្សេងទៀតមើលឃើញថា អ្វីដែលជាការធ្វើរបស់គាត់ហ្នឹងវាមិនត្រូវមានការឲ្យតម្លៃពីកិច្ចរបស់គាត់ទេ វាទៅជាមានការប្តឹងផ្តល់បែបនេះទៅវិញ។ អីចឹងវាធ្វើឲ្យអំពើល្អក្នុងសង្គមហ្នឹងត្រូវបានមនុស្ស ឬក៏ប្រជាពលរដ្ឋ ឬអ្នកដែលចង់ធ្វើហ្នឹង ទៅជាមានការព្រួយបារម្ភទៅវិញ ហើយគាត់លែងចង់ធ្វើអំពើបែបមនុស្សធម៌អីហ្នឹងជាដើម»។
អ្នកទាំង៣រូបដែលរងបណ្តឹងរបស់អ្នកនយោបាយ ពេជ ស្រស់ ថា បានកេងប្រាក់ពីបុណ្យសពលោក កែម ឡី រួមមានដូចជា លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងលោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ព្រមទាំងព្រះតេជព្រះគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ។
រហូតមកដល់ពេលនេះ ទាំងលោក ប៉ា ងួនទៀង និងព្រះតេជគុណ ប៊ុត ប៊ុនតិញ មិនទាន់បានចូលបំភ្លឺនៅតុលាការ តាមការកោះហៅនៅឡើយ។
លោកស្រី ប៊ូ រចនា ភរិយារបស់លោក បណ្ឌិត កែម ឡី បានបញ្ជាក់តាមប្រព័ន្ធផ្សព្វផ្សាយក្នុងពេលកន្លងមកថា ពុំមានការបាត់លុយបច្ច័យបុណ្យដូចការចោទប្រកាន់នោះទេ៕