ប៉ូលិសនៅរដ្ឋ Illinois បានចាប់ខ្លួនបុរសម្នាក់ដែលប៉ូលិសចាត់ទុកថា ជា«មនុស្សដែលប៉ូលិសចាប់អារម្មណ៍» នៅក្នុងការបាញ់ប្រហារដ៏សាហាវកាលពីថ្ងៃច័ន្ទនៅឯក្បួនដង្ហែបុណ្យឯករាជ្យមួយ។ លោក Robert E. Crimo III អាយុ ២២ ឆ្នាំ ត្រូវ បានចាប់ខ្លួនប៉ុន្មានម៉ោងបន្ទាប់ពីការដេញតាមរថយន្តមួយរយៈខ្លីនៅខាងក្រៅក្រុង Highland Park នៅជាយក្រុងតំបន់អ្នកមានស្តុកស្តម្ភនៃទីក្រុង Chicago ដែលជាកន្លែងដែលមនុស្ស៦នាក់បានស្លាប់ និងជាង៣០ នាក់បានរងរបួសនៅពេលដែលខ្មាន់កាំភ្លើងបានបាញ់ប្រហារពីលើដំបូលអគារនៅតាមផ្លូវនោះទៅលើអ្នកដើរក្បួន។
ប៉ូលិសបាននិយាយថា មនុស្ស៥នាក់បានស្លាប់នៅកន្លែងកើតហេតុ ចំណែកម្នាក់ទៀតបានស្លាប់នៅមន្ទីរពេទ្យក្បែរនោះ។ ក្រសួងការបរទេសម៉ិកស៊ិកនិយាយថា អ្នកស្លាប់ម្នាក់ក្នុងចំណោមអ្នកស្លាប់ទាំងនោះជាជនជាតិម៉ិកស៊ិក។ វេជ្ជបណ្ឌិតម្នាក់នៅមន្ទីរពេទ្យក្រុង Highland Park និយាយថា ពួកគេបានទទួលអ្នករបួសចំនួន២៦នាក់ពីក្បួនដង្ហែនោះ។ អ្នកទាំងនោះមានអាយុចន្លោះពី៨ទៅ ៨៥ឆ្នាំ។
កៅអីទំនេរត្រូវបានគេឃើញនៅតាមដងផ្លូវ ក្រោយពីមានការបាញ់ប្រហារទ្រង់ទ្រាយធំនៅក្រុង Highland Park រដ្ឋ Illinois នៅថ្ងៃបុណ្យឯករាជ្យក្នុងសហរដ្ឋអាមេរិក ថ្ងៃទី ៤ ខែកក្កដា ឆ្នាំ២០២២។
វីដេអូពីទូរសព្ទដៃបានថតមនុស្សរាប់សិបនាក់រត់ចេញពីកន្លែងកើតហេតុដោយភ័យស្លន់ស្លោ ខណៈសំឡេងកាំភ្លើងបានបន្លឺឡើងយ៉ាងខ្លាំងពីអគារក្បែរនោះ។ កៅអីនៅវាលស្មៅ រទេះរុញកូនក្មេង ធុងដាក់អាហារចល័ត និងវត្ថុផ្សេងៗទៀតត្រូវរាយប៉ាយនៅតាមបណ្តោយផ្លូវដង្ហែក្បួននោះ ព្រោះត្រូវបានបោះបង់ចោលដោយមនុស្សដែលរត់រកកន្លែងសុវត្ថិភាព។
ប្រធានាធិបតីអាមេរិកលោក Joe Biden បានចេញសេចក្តីថ្លែងការណ៍មួយ ដោយនិយាយថា លោក និងភរិយាគឺអ្នកស្រី Jill Biden «រន្ធត់ចំពោះអំពើហិង្សាដោយកាំភ្លើងដែលជាថ្មីទៀតនាំទុក្ខសោកដល់សហគមន៍អាមេរិកនៅថ្ងៃបុណ្យឯករាជ្យនេះ»។
ការបាញ់ប្រហារនៅទីក្រុងHighland Park បានកើតឡើងជាងមួយសប្តាហ៍ បន្ទាប់ពីលោកប្រធានាធិបតី Biden បានចុះហត្ថលេខាលើច្បាប់សហព័ន្ធដ៏សំខាន់ស្តីពីអំពើហិង្សាដោយអាវុធដែលត្រូវបានអនុម័តដោយសភាជាលើកដំបូងក្នុងរយៈពេលច្រើនទសវត្សរ៍នេះ។ ច្បាប់ដែលសម្របសម្រួលដោយគណបក្សទាំងពីរនេះ ត្រូវបានអនុម័តបន្ទាប់ពីការបាញ់ប្រហារទ្រង់ទ្រាយធំចំនួនពីរក្នុងខែឧសភា រួមមានការវាយប្រហាររើសអើងជាតិសាសន៍ ដែលបានសម្លាប់មនុស្ស ១០ នាក់នៅហាងលក់គ្រឿងទេសមួយកន្លែងក្នុងសង្កាត់ជនជាតិស្បែកខ្មៅរស់នៅក្នុងទីក្រុង Buffalo នៅរដ្ឋ New York និងការផ្ទុះអាវុធនៅសាលាបឋមសិក្សា Uvalde នៅរដ្ឋ Texas ដែលសម្លាប់កូនសិស្ស១៩នាក់និងគ្រូបង្រៀនពីរនាក់៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានThe Associated Press, Reuters និង Agence France-Presse)