ប្រទេសកូរ៉េខាងជើងនិយាយថាស.រ.អា.គួរ «បិទមាត់» អំពីទំនាក់ទំនងមិនល្អរវាងប្រទេសកូរ៉េទាំងពីរ ប្រសិនបើប្រទេសអាមេរិកចង់ធ្វើការបោះឆ្នោតប្រធានាធិបតីប្រកបដោយជោគជ័យ។
សេចក្តីថ្លែងការណ៍នេះកើតមានឡើងនៅពេលកូរ៉េខាងជើងមានភាពតានតឹងខ្លាំងជាងមុនជាមួយកូរ៉េខាងត្បូង។ កាលពីដើមសប្តាហ៍ទីពីរនៃខែមិថុនា រដ្ឋាភិបាលក្រុងព្យុងយ៉ាងបាននិយាយថា ខ្លួននឹងកាត់ផ្តាច់បណ្តាញសន្ទនាគ្នាជាផ្លូវការទាំងអស់រវាងប្រទេសកូរ៉េទាំងពីរ។
ក្រសួងការបរទេសស.រ.អា.បាននិយាយថា ខ្លួន «ស្រងាកចិត្ត» នឹងការសម្រេចនេះ។ ប៉ុន្តែសម្រាប់ប្រទេសកូរ៉េខាងជើង ការណ៍នេះជាការជ្រៀតជ្រែកមិនអាចទទួលយកបានទេ។
ជាការសងសឹក ប្រទេសកូរ៉េខាងជើងបាននិយាយថា ស.រ.អា.អាចជួបប្រទះ «អ្វីមួយដែលនាំឱ្យមិនពេញចិត្ត» ឬ «នាំឱ្យព្រឺសម្បុរគីងគក់» ដែលអាចបង្អាក់ការបោះឆ្នោតនៅក្នុងស.រ.អា.បាន។
លោក Mintaro Oba ជាអតីតអ្នកការទូតស.រ.អា.។ លោកនិយាយថា សេចក្តីថ្លែងការណ៍នេះជាយុទ្ធសាស្ត្របំបែកបំបាក់ដើម្បីត្រួតត្រា។ លោក Oba បាននិយាយថា៖
«ពួកកូរ៉េខាងជើងខិតខំបំបែកបំបាក់ស.រ.អា. និងកូរ៉េខាងត្បូង។ ពួកគេបង្ហាញថា ពួកគេគិតគូរអំពីការបោះឆ្នោតក្នុងស.រ.អា.។ កូរ៉េខាងជើងក៏បង្ហាញដែរថាពួកគេអាចធ្វើបាន និងចង់បង្កើតឱ្យមានភាពតានតឹងនៅពេលពិបាកមួយសម្រាប់ប្រធានាធិបតី Trump»។
ប្រទេសកូរ៉េខាងជើងទំនងជាមិនមែនជាកត្តាធំមួយនៅក្នុងការបោះឆ្នោតក្នុងស.រ.អា.ទេ។ លោកប្រធានាធិបតីស.រ.អា.បានព្រមានកូរ៉េខាងជើងកុំឱ្យបង្ករឿងធំដុំនៅពេលបោះឆ្នោត។
កាលពីខែមករា លោក គីម ជុងអ៊ុន មេដឹកនាំកូរ៉េខាងជើងបានសន្យាថា ក្នុងពេលឆាប់ៗនេះពិភពលោកនឹងឃើញ «អាវុធយុទ្ធសាស្ត្រថ្មី» មួយដែលនាំឱ្យគេយល់ថា គាត់នឹងបង្ហោះកាំជ្រួចមីស៊ីលមានវង់ប្រតិបត្តិការឆ្ងាយជាងមុន។
ការគំរាមកំហែងកាលពីថ្ងៃព្រហស្បតិ៍ ទី១១ មិថុនាបានចេញផ្សាយដោយក្រសួងការបរទេសកូរ៉េខាងជើងដែលមិនសូវមានឥទ្ធិពលទេ។ ក្រសួងនេះក៏ធ្លាប់ធ្វើការគំរាមកំហែងមិនពិតដែរ។
កាលពីខែធ្នូ អនុរដ្ឋមន្ត្រីការបរទេសកូរ៉េខាងជើងបានគំរាមកំហែងផ្តល់ «កាដូពេលបុណ្យណូអែល» មួយ ប្រសិនបើស.រ.អា.មិនធ្វើសម្បទាននៅក្នុងកិច្ចចរចានុយក្លេអ៊ែរដែលគាំងដំណើរការ។ ស.រ.អា.មិនបានធ្វើសម្បទានអ្វីទេហើយកូរ៉េខាងជើងមិនបានបាញ់បង្ហោះកាំជ្រួចមីស៊ីលធំណាមួយទេ។
លោក Oba និយាយថា ការណ៍នេះអាចផ្លាស់ប្តូរបានជានិច្ច។
លោកបានថ្លែងថា៖ «ខ្ញុំយល់ឃើញថា កូរ៉េខាងជើងដឹងច្បាស់ណាស់ថា ប្រធានាធិបតី Trump មិនចង់មានបញ្ហាជាមួយកូរ៉េខាងជើងទេនៅពេលបោះឆ្នោត ដោយសារលោកមិនសូវមានការប៉ិនប្រសប់ខាងការទូត។ ដូច្នេះកូរ៉េខាងជើងប្រហែលបង្ករឿងជាមួយកូរ៉េខាងត្បូង ឬបាញ់បង្ហោះសាកល្បងកាំជ្រួចមីស៊ីលដើម្បីបង្ខំឲ្យលោក Trump ធ្វើការចរចាគ្នាដើម្បីកុំឱ្យគេមើលឃើញថាលោកខ្សោយ»។
កិច្ចចរចានុយក្លេអ៊ែរបានគាំងដំណើរការចាប់តាំងពីដើមឆ្នាំទៅមិញនៅពេលលោក Trump និងលោកគីម ជុងអ៊ុនមិនបានសម្រេចកិច្ចព្រមព្រៀងមួយនៅក្នុងជំនួបកំពូលក្នុងទីក្រុងហាណូយ ប្រទេសវៀតណាម៕
ប្រែសម្រួលដោយលោកឈឹម សុមេធ