សហរដ្ឋអាមេរិកបានស្នើបទបញ្ញត្តិថ្មីមួយសម្រាប់និស្សិតអន្តរជាតិកំពុងសិក្សានៅអាមេរិក ដោយនឹងកំណត់ទិដ្ឋាការនិស្សិតឲ្យមានរយៈពេលត្រឹមបួនឆ្នាំ។
និស្សិតអន្តរជាតិដែលចង់ពន្យារការស្នាក់នៅបន្តរបស់ខ្លួននឹងតម្រូវឲ្យដាក់ពាក្យស្នើសុំការពន្យារពេល នេះបើយោងតាមបញ្ញត្តិថ្មីនេះ។ បញ្ញត្តិនោះក៏នឹងកំណត់រយៈពេលនៃទិដ្ឋាការនិស្សិតអន្តរជាតិឲ្យមកត្រឹមរយៈពេលពីរឆ្នាំបើសិនជានិស្សិតនោះមកពីប្រទេសមួយដែលមានអត្រានិស្សិតបន្តស្នាក់នៅហួសពេលលើស១០ភាគរយ ឬប្រទេសដែលស្ថិតក្នុងបញ្ជី«រដ្ឋដែលគាំទ្រភេរវកម្ម» (State Sponsor of Terrorism) នៃក្រសួងការបរទេសអាមេរិក។
បញ្ញត្តិថ្មីបានចែងថា៖«ការផ្លាស់ប្តូរនេះនឹងផ្តល់ឲ្យក្រសួង[ការបរទេស]នូវការការពារនិងយន្តការបន្ថែមដើម្បីអនុវត្តការត្រួតពិនិត្យចាំបាច់លើការពង្រឹងច្បាប់អន្តោប្រវេសន៍ជាតិតឹងរ៉ឹង ដើម្បីការពារបូរណភាពនៃកម្មវិធីមិនមែនអន្តោប្រវេសន៍ទាំងនេះ និងដើម្បីស្វែងរកឃើញភ្លាមៗនូវបញ្ហាសន្តិសុខជាតិ»។
គោលការណ៍ណែនាំអំពីទិដ្ឋាការនិស្សិតបច្ចុប្បន្នអនុញ្ញាតឲ្យនិស្សិតស្នាក់នៅក្នុងសហរដ្ឋអាមេរិកអំឡុង «រយៈពេលនៃឋានៈ» របស់ពួកគេ។ និយាយម្យ៉ាងទៀត គឺអ្នកកាន់ទិដ្ឋាការនិស្សិតអាចស្នាក់នៅក្នុងសហរដ្ឋអាមេរិកបានឲ្យតែពួកគេបានចុះឈ្មោះសិក្សាក្នុងសាលាហើយគោរពតាមឋានៈអន្តោប្រវេសន៍របស់ពួកគេ។
កម្មវិធីសិក្សាមួយចំនួនអាចមានរយៈពេលយូរជាងបួនឆ្នាំ កុំថាឡើយពីរឆ្នាំ។ ឧទាហរណ៍ កម្រិតសិក្សាថ្នាក់បណ្ឌិតមួយអាចត្រូវការរយៈពេល៤ទៅ៦ឆ្នាំដើម្បីបញ្ចប់ នេះបើយោងតាមសាកលវិទ្យាល័យ Franklin។
រូបឯកសារ៖ និស្សិតដើរក្បែរបណ្ណាល័យWidener របស់សាកលវិទ្យាល័យ Harvard ក្នុងក្រុង Cambridge រដ្ឋ Massachusetts ថ្ងៃទី១៣ ខែសីហា ឆ្នាំ២០១៩។
បទបញ្ញត្តិថ្មីបានចែងថា អ្នកកាន់ទិដ្ឋាការនិស្សិតដែលស្នើសុំពន្យារពេលស្នាក់នៅរបស់ខ្លួន អាចស្នើសុំបានបើសិនជា «ប្រសិនបើមានសេចក្តីត្រូវការពេលបន្ថែមដោយសារហេតុផលចាំបាច់ខាងការសិក្សាក្នុងសាកលវិទ្យាល័យ មានឯកសារពេទ្យបញ្ជាក់ថា និស្សិតនេះមានជំងឺឬមានកាលៈទេសៈដែលហួសពីការគ្រប់គ្រងរបស់និស្សិតនោះ»។
អ្នកនាង Sofia Elkin Becerra ដែលមកប្រទេសកូស្តារីកា ជានិស្សិតឆ្នាំទី៤នៅសាកលវិទ្យាល័យ Maryland និងជាប្រធានសហភាពនិស្សិតអន្តរជាតិនៅក្នុងសាកលវិទ្យាល័យនេះ ។ នាង Becerra បាននិយាយថា នាងគ្រោងនឹងដាក់ស្នើពន្យារទិដ្ឋាការនៅពេលនាងបញ្ចប់ការសិក្សាក្នុងខែធ្នូដើម្បីបន្តចូលកម្មវិធីហ្វឹកហ្វឺនការងារក្រោយបញ្ចប់ការសិក្សាសម្រាប់និស្សិតអន្តរជាតិដែលហៅកាត់ថា OPT (Optional Practical Training)។
នាងបាននិយាយថា នាងត្រូវការរយៈពេលមួយឆ្នាំបន្ថែមទៀតដើម្បីសិក្សា ដោយសារមានអសមត្ថភាពខាងការសិក្សាមួយដែលនាងមិនអាចបញ្ជាក់បាន ហើយនាងមិនច្បាស់ថាតើបញ្ញត្តិថ្មីនេះនឹងអនុញ្ញាតសម្រាប់កាលៈទេសៈទាំងនោះឬទេ។
«បញ្ញត្តិថ្មីគឺមិនសូវច្បាស់ហើយស្មុគស្មាញ ដែលសូម្បីតែអ្នកប្រឹក្សានិស្សិតអន្តរជាតិមិនមានចម្លើយទាំងអស់សម្រាប់និស្សិតក្នុងស្ថានភាពដូចជាខ្ញុំ។ ដូច្នេះខ្ញុំមិនច្បាស់ថា តើវានឹងប៉ះពាល់ខ្ញុំឬទេ ឬប៉ះពាល់យ៉ាងណា»។
បើសិនជាបញ្ញត្តិនេះមានតាំងពីមុនអ្នកនាង Becerra ចាប់ផ្តើមការសិក្សានៅក្នុងសហរដ្ឋអាមេរិកម៉្លោះ នោះនាងប្រហែលមិនអាចបញ្ចប់ការសិក្សាក្រោមរយៈពេលកំណត់ថ្មីទេ។
នាងបាននិយាយថា៖ «ជាមួយនឹងរយៈពេលកំណត់ជាក់លាក់មួយ តាមអ្វីដែលខ្ញុំយល់ វានឹងមិនងាយស្រួលឡើយ ហើយខ្ញុំប្រហែលមិនអាចបញ្ចប់ការសិក្សានៅមហាវិទ្យាល័យបានទេ»។
បើយោងតាមបញ្ញត្តិថ្មីនេះ និស្សិតអន្តរជាតិដែលកំពុងសុំពន្យារទិដ្ឋាការនិស្សិតរបស់ពួកគេត្រូវតែធ្វើក្រោមគោលបំណងបញ្ចប់វគ្គសិក្សាប៉ុណ្ណោះ។
អ្នកនាង Kenji Ho និស្សិតអន្តរជាតិមកពីប្រទេសសិង្ហបុរីគឺជានិស្សិតឆ្នាំទី៣ដែលកំពុងសិក្សាផ្នែកអចលនទ្រព្យនៅសាលាសិក្សាវិជ្ជាជីវៈ នៃសាកលវិទ្យាល័យញូវយ៉ក។ អ្នកនាង Ho បាននិយាយថា នាងមិនយល់ចំពោះពេលវេលានិងហេតុផលនៃបញ្ញត្តិថ្មី។
អ្នកនាង Ho បាននិយាយថា៖ «វាធ្វើឲ្យគ្រប់យ៉ាងកាន់តែមិនច្បាស់ ហើយភ័ន្តច្រឡំក្នុងពេលដែលមិនអាចទស្សន៍ទាយទៅហើយបានសម្រាប់និស្សិតអន្តរជាតិ។»
អ្នកនាង Ho ថាបញ្ញត្តិថ្មីអាចបន្ថែមសម្ពាធផ្នែកការសិក្សាកាន់តែខ្លាំងដល់និស្សិតដែលមកពីប្រទេសជាក់លាក់មួយចំនួន។
អ្នកនាង Ho បន្ថែមថា ការតម្រូវឲ្យនិស្សិតស្នើសុំការពន្យារមួយអាចបន្ថយឱកាសដែលពួកគេអាចទទួលបានការអនុញ្ញាតឲ្យពន្យារទិដ្ឋាការនោះ។
ខណៈដែលសមាគមអប់រំជាច្រើននិងនិស្សិតជំទាស់នឹងការផ្លាស់ប្តូរនេះ សមាជិកសភាមួយចំនួនបានរិះគន់អ្វីដែលពួកគេនិយាយថាជាភាពធូរលុងមួយក្នុងការអនុម័តទិដ្ឋាការនិស្សិត។
សមាជិកព្រឹទ្ធសភាខាងគណបក្សសាធារណរដ្ឋរបស់សហរដ្ឋអាមេរិកពីររូបគឺលោក Tom Cotton នៃរដ្ឋArkansas និងអ្នកស្រី Marsha Blackburn នៃរដ្ឋTennessee និយាយថា សាកលវិទ្យាល័យនានារបស់អាមេរិកត្រូវបានប្រើដោយប្រទេសដទៃសម្រាប់ជាកន្លែងចារកម្មនិងលួចកម្មសិទ្ធិបញ្ញា។
អ្នកស្រី Blackburn បាននិយាយនៅក្នុងសេចក្តីថ្លែងការណ៍រួមមួយជាមួយនឹងលោក Cotton កាលពីខែឧសភាថា៖ «រដ្ឋាភិបាលទីក្រុងប៉េកាំងបានកេងប្រវ័ញ្ចពីទិដ្ឋាការនិស្សិតនិងទិដ្ឋាការអ្នកស្រាវជ្រាវដើម្បីលួចព័ត៌មានសម្ងាត់ផ្នែកផលិតកម្ម វិស្វកម្ម បច្ចេកវិទ្យា និងវិទ្យាសាស្ត្រពីស្ថាប័នស្រាវជ្រាវនិងស្ថាប័នអប់រំក្នុងសហរដ្ឋអាមេរិក។ យើងបានចិញ្ចឹមផ្គត់ផ្គង់កង្វះខាតយ៉ាងខ្លាំងនៃភាពច្នៃប្រឌិតរបស់ចិន ជាមួយនឹងគំនិតប៉ិនប្រសប់របស់ជនជាតិអាមេរិកនិងលុយដុល្លាររបស់អ្នកបង់ពន្ធរបស់យើង អស់ពេលយូរពេកហើយ។»
ពួកគេបាននិយាយក្នុងសេចក្តីថ្លែងការណ៍មួយថា៖ «វាដល់ពេលដែលយើងត្រូវការពារស្ថាប័នស្រាវជ្រាវរបស់សហរដ្ឋអាមេរិកប្រឆាំងនឹងចារកម្មសេដ្ឋកិច្ចរបស់គណៈបក្សកុម្មុយនីស្តចិន។»
ការផ្លាស់ប្តូរមួយទៀតដែលត្រូវបានធ្វើនោះគឺរយៈពេលនៃការចាកចេញរបស់អ្នកកាន់ទិដ្ឋាការនិស្សិតពី ៦០ថ្ងៃបន្ទាប់ពីបានបញ្ចប់ការសិក្សាមកត្រឹម ៣០ថ្ងៃ។
បញ្ញត្តិថ្មីបានចែងថា៖ «ក្រសួង[ការបរទេស]បារម្ភអំពីបូរណភាពនៃកម្មវិធីនេះ ហើយនិងហានិភ័យដែលអាចកើនឡើងសម្រាប់សន្តិសុខជាតិ។»
នៅក្នុងឆ្នាំសិក្សា២០១៨និង២០១៩ មាននិស្សិតអន្តរជាតិចំនួន១.០៩៥.២៩៩នាក់បានសិក្សាក្នុងចំណោមនិស្សិតសរុប១៩.៨២៨.០០០នាក់ក្នុងស្ថាប័នឧត្តមសិក្សាក្នុងសហរដ្ឋអាមេរិក នេះបើយោងតាមវិទ្យាស្ថានសម្រាប់ការអប់រំអន្តរជាតិ។
ទិន្នន័យនេះបង្ហាញថា និស្សិតអន្តរជាតិមានចំនួន៥,៥ភាគរយនៃចំនួននិស្សិតសរុបតាមមហាវិទ្យាល័យនិងសាកលវិទ្យាល័យក្នុងសហរដ្ឋអាមេរិក។
ទោះបីចំនួននិស្សិតអន្តរជាតិក្នុងសហរដ្ឋអាមេរិកបន្តកើនឡើង ក៏អត្រាការដាក់ពាក្យចូលរៀនបានធ្លាក់ចុះក្នុងរយៈពេលបីឆ្នាំចុងក្រោយ។
និស្សិតអន្តរជាតិនៅតាមមហាវិទ្យាល័យនិងសាកលវិទ្យាល័យរបស់សហរដ្ឋអាមេរិកបានរួមចំណែកដល់សេដ្ឋកិច្ចអាមេរិកចំនួន៤១ពាន់លានដុល្លារ និងផ្គត់ផ្គង់ការងារចំនួន៤៥៨.២៩០ ក្នុងសេដ្ឋកិច្ច នេះបើយោងតាមការវិភាគចុងក្រោយរបស់អង្គការ NAFSAសមាគមអ្នកអប់រំអន្តរជាតិ៕
ប្រែសម្រួលដោយកញ្ញា ទុំ ម្លិះ