Your browser doesn’t support HTML5
ការរឹតត្បិតថ្មី នៅក្នុងច្បាប់បោះឆ្នោតកម្ពុជា
អ្នកឯកទេសខាងការបោះឆ្នោតនៃអង្គការសង្គមស៊ីវិលបានបញ្ជាក់ឡើងវិញពីការស្នើសុំឱ្យគណបក្សនយោបាយដែលមានអាសនៈនៅក្នុងរដ្ឋសភារៀបចំឱ្យមានប្រព័ន្ធបោះឆ្នោតចម្រុះដើម្បីទុកឱកាសឱ្យបុគ្គលឯករាជ្យឈរឈ្មោះដោយមិនចាំបាច់នៅក្រោមគណបក្សនយោបាយណាមួយ។
លោក សំ គន្ធាមី អ្នកសម្របសម្រួលនៃអង្គការឃ្លាំមើលការបោះឆ្នោតនិកហ្វិកបានបញ្ជាក់នៅក្នុងកម្មវិធីហេឡូវីអូអេកាលពីថ្ងៃច័ន្ទថា ការប្រើប្រព័ន្ធឯកត្តនាមនិងសមាមាត្ររួមគ្នានឹងជួយធានាបានការចូលរួមខាងផ្នែកនយោបាយកាន់តែច្រើន។
លោកបន្តថា៖
«សព្វថ្ងៃនេះបេក្ខជនឈរឈ្មោះតំណាងរាស្រ្តគាត់ត្រូវជាសមាជិកគណបក្ស ហើយបើសិនជាបុគ្គលឯករាជ្យគាត់មិនអត់មានលទ្ធភាពឈរទេ។ យើងចង់ឱ្យមានចម្រុះទៅ»។
លោកគន្ធាមីក៏បានបញ្ជាក់ដែរថាដោយសារតែរដ្ឋាភិបាលកម្ពុជានៅមិនទាន់ផ្តល់អត្តសញ្ញាណបណ្ណជាតិខ្មែរដល់ប្រជាពលរដ្ឋគ្រប់រូបដូច្នេះគណៈកម្មាធិការជាតិរៀបចំការបោះឆ្នោតដែលនឹងបង្កើតក្នុងពេលឆាប់ៗនេះត្រូវចេញបណ្ណបោះឆ្នោតថ្មីសម្រាប់អ្នកដែលចុះឈ្មោះបោះឆ្នោតដើម្បីធានាឱ្យមានការបោះឆ្នោតដោយត្រឹមត្រូវនិងយុត្តិធម៌។
លោកគន្ធាមីបានបន្ថែមថា៖
«បើសិនជាយើងរង់ចាំយកអត្តសញ្ញាណបណ្ណសញ្ជាតិខ្មែរយកមកប្រើ អញ្ចឹងបញ្ជីបោះឆ្នោតនៅ តែមានបញ្ហា បោះឆ្នោតរាល់អណត្តិនៅតែមានបញ្ហាដែរ»។
ក្រុមការងារគណបក្សសង្គ្រោះជាតិនិងគណបក្សប្រជាជនកម្ពុជានៅមិនទាន់យល់ស្របគ្នាលើនីតិវិធីនៃការចុះឈ្មោះបោះឆ្នោតនៅឡើយដោយគណបក្សកាន់អំណាចប្រកាន់យកការប្រើប្រាស់អត្តសញ្ញាណបណ្ណជាតិធ្វើជាឯកសារគោលសម្រាប់អ្នកបោះឆ្នោតក្នុងខណៈពេលដែលគណបក្សសង្គ្រោះជាតិស្នើសុំឱ្យប្រើប្រាស់បណ្ណបោះឆ្នោតថ្មីដែលនឹងចេញដោយគ.ជ.ប។
លោកសំ គន្ធាមីក៏បានបញ្ជាក់ដែរថាផ្អែកតាមធនធាននិងសមត្ថភាពដែលមានគឺកម្ពុជាគួរតែអាចបង្កើតការិយាល័យបោះឆ្នោតនៅក្រៅប្រទេសដើម្បីជួយសម្រួលដល់ពលករខ្មែរដែលធ្វើការនៅក្រៅប្រទេសដូចជាកូរ៉េខាងត្បូងនិងថៃជាដើមឱ្យមានលទ្ធភាពងាយស្រួលក្នុងការចូលរួមបោះឆ្នោតដោយមិនបាត់បង់សិទ្ធិរបស់ពួកគេ។
«យើងត្រូវការពួកគាត់ឱ្យចូលរួមក្នុងសិទ្ធិនយោបាយដែរ អញ្ចឹងហើយយើងទាមទារយើងតស៊ូមតិដើម្បីឱ្យរដ្ឋាភិបាលឬក៏គ.ជ.បហ្នឹងរៀបចំថវិកាដើម្បី អនុវត្តការងារចុះឈ្មោះនិងបោះឆ្នោតសម្រាប់អ្នកនៅក្រៅប្រទេស»។
ក្រុមអង្គការសង្គមស៊ីវិលក៏បានស្នើឡើងដែរថាផ្អែកតាមចំនួនពលរដ្ឋដែលមានការកើនឡើងពីការបោះឆ្នោតមួយទៅ ការបោះឆ្នោតមួយចំនួនអាសនៈដែលមានចំនួន១២៣នាពេលបច្ចុប្បន្នគួរតែត្រូវបង្កើនរហូតដល់ចំនួន១៣០ ហើយការរៀបចំបញ្ជីបេក្ខជនឈរឈ្មោះបោះឆ្នោតទៀតសោតក៏គណបក្សត្រូវរៀបចំដោយបង្កលក្ខណៈឱ្យស្ត្រីអាចនឹងជាប់ឆ្នោតតំណាងរាស្រ្តបានច្រើន៕