នៅសហរដ្ឋអាមេរិក ការចរចារវាងរដ្ឋបាលរបស់លោកប្រធានាធិបតី Joe Biden និងសមាជិករដ្ឋសភាដែលគ្រប់គ្រងដោយគណបក្សសាធារណរដ្ឋអំពីកម្រិតបំណុលអតិបរមារបស់រដ្ឋាភិបាលនឹងបន្តធ្វើម្ដងទៀតនៅថ្ងៃពុធនេះ។
ការពិភាក្សារវាងភាគីទាំងពីរត្រូវបានបញ្ឈប់ភ្លាមៗកាលពីថ្ងៃអង្គារដោយមិនមានដំណើរវិវឌ្ឍជាក់ស្ដែងណាមួយឆ្ពោះទៅរកការព្រមព្រៀងគ្នាដែលនឹងអនុញ្ញាតឱ្យក្រសួងហិរញ្ញវត្ថុសហរដ្ឋអាមេរិកអាចដំឡើងពិដានបំណុលបច្ចុប្បន្នរបស់រដ្ឋាភិបាលដែលមានចំនួន ៣១ លានលានដុល្លារ និងបន្តខ្ចីប្រាក់ដើម្បីសងបំណុលដែលនៅសេសសល់របស់រដ្ឋាភិបាលនោះទេ។
រដ្ឋមន្ត្រីហិរញ្ញវត្ថុសហរដ្ឋអាមេរិកអ្នកស្រី Janet Yellen បានព្រមានថា ក្រសួងហិរញ្ញវត្ថុនឹងអស់ថវិកានៅត្រឹមថ្ងៃទី ១ ខែមិថុនាខាងមុខ ដែលអាចបង្ខំឱ្យរដ្ឋាភិបាលមិនអាចសងបំណុលរបស់ខ្លួនបាន ដោយធ្វើឱ្យសហរដ្ឋអាមេរិកធ្លាក់ចូលទៅក្នុងវិបត្តិសេដ្ឋកិច្ចមហន្តរាយ និងបង្កើតឱ្យមានភាពចលាចលនៅលើទីផ្សារសាកលលោក។
គណបក្សសាធារណរដ្ឋនៅរដ្ឋសភាទាមទារឱ្យរដ្ឋបាលរបស់លោក Biden យល់ព្រមកាត់បន្ថយការចំណាយរបស់រដ្ឋាភិបាលឱ្យនៅត្រឹមកម្រិតឆ្នាំ ២០២២។ គណបក្សសាធារណរដ្ឋក៏ចង់ដាក់លក្ខខណ្ឌការងារតឹងតែងផងដែរសម្រាប់ពលរដ្ឋអាមេរិកាំងណាដែលស្ថិតក្នុងកម្មវិធីជំនួយជាម្ហូបអាហារនិងថវិការបស់រដ្ឋាភិបាលសម្រាប់អ្នកដែលមានប្រាក់ចំណូលទាប និងស្ថិតក្នុងកម្មវិធីធានារ៉ាប់រងសុខភាពសម្រាប់ជនក្រីក្រ (Medicaid)។
សេតវិមានបានស្នើឱ្យទុកការចំណាយរបស់រដ្ឋាភិបាលឱ្យនៅត្រឹមកម្រិតបច្ចុប្បន្ននៅក្នុងឆ្នាំនេះ និងចង់ឱ្យបញ្ចប់ការកាត់បន្ថយពន្ធលើប្រាក់ចំណូលសម្រាប់ពលរដ្ឋអាមេរិកាំងអ្នកមាននិងសាជីវកម្មមួយចំនួន។ រដ្ឋបាលរបស់លោក Biden ក៏ចង់ស្នើផងដែរឱ្យមានការបញ្ចូលការចំណាយផ្នែកការពារជាតិទៅក្នុងការកាត់បន្ថយការចំណាយណាមួយដែលអាចធ្វើឡើង។
អ្នកនាំពាក្យសេតវិមានអ្នកស្រី Karine Jean-Pierre បានប្រាប់អ្នកយកព័ត៌មានកាលពីថ្ងៃអង្គារថា ការចរចា «កំពុងបន្តធ្វើទៅមុខ» ប៉ុន្តែបានទទូចឱ្យគណបក្សប្រជាធិបតេយ្យនិងគណបក្សសាធារណរដ្ឋ «យល់ថា ពួកគេនឹងមិនទទួលបានអ្វីៗគ្រប់យ៉ាងដូចអ្វីដែលពួកគេចង់បាននោះទេ»។ អ្នកស្រីបាននិយាយថា គោលបំណងគឺធ្វើយ៉ាងណា «ឈានដល់កញ្ចប់ថវិកាមួយដែលសមហេតុសមផល ដែលមានការគាំទ្រពីគណបក្សទាំងពីរ ដែលទាំងគណបក្សប្រជាធិបតេយ្យនិងគណបក្សសាធារណរដ្ឋនៅរដ្ឋសភានិងព្រឹទ្ធសភាអាចបោះឆ្នោតនិងយល់ព្រមតាម»។
ប៉ុន្តែ តំណាងរាស្ត្រលោក Garret Graves ដែលជាអ្នកចរចាមួយរូបខាងគណបក្សសាធារណរដ្ឋនៅរដ្ឋសភា បាននិយាយកាលពីថ្ងៃអង្គារថា នៅមាន «គម្លាតគួរសម» រវាងគោលជំហរភាគីទាំងពីរ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AP ទីភ្នាក់ងារព័ត៌មាន Reuters និងទីភ្នាក់ងារព័ត៌មាន AFP។