របបយោធាដែលគ្រប់គ្រងប្រទេសមីយ៉ាន់ម៉ា កាលពីថ្ងៃច័ន្ទ បានបន្ថែមបទចោទប្រកាន់ទី៦ ប្រឆាំងនឹងលោកស្រី Aung San Suu Kyi មេដឹកនាំស៊ីវិលដែលត្រូវបានទម្លាក់ពីតំណែង ខណៈការធ្វើបាតុកម្មនៅតែបន្តប្រឆាំងនឹងរដ្ឋប្រហារកាលពីថ្ងៃទី១ ខែកុម្ភៈ។
លោក Min Min Soe មេធាវីរបស់លោកស្រី Aung San Suu Kyi បានប្រាប់ក្រុមអ្នកសារព័ត៌មានថា កូនក្តីរបស់លោកត្រូវបានចោទប្រកាន់ជាលើកទី ២ ពីបទរំលោភលើវិធានការរបស់ប្រទេសក្នុងការទប់ស្កាត់ជំងឺកូវីដ១៩ នៅក្នុងអំឡុងពេលបង្ហាញខ្លួនចំពោះមុខតុលាការតាមអនឡាញ។
លោក Min Min Soe និយាយថា លោកស្រី Aung San Suu Kyi បានស្នើឲ្យតុលាការអនុញ្ញាតឱ្យលោកស្រីជួបជាមួយមេធាវីរបស់លោកស្រីដោយផ្ទាល់ក្នុងអំឡុងពេលសវនាការនៅថ្ងៃច័ន្ទ។
លោកស្រី Aung San Suu Kyi អាយុ៧៥ឆ្នាំបានប្រឈមនឹងការចោទប្រកាន់នានារួមមានបទចោទដែលថាមានវិទ្យុទាក់ទងចំនួន៦គ្រឿង និងការចោទប្រកាន់ធ្ងន់ធ្ងរបំផុតគឺបទរំលោភច្បាប់សម្ងាត់សម័យអាណានិគមរបស់ប្រទេសនេះដែលលោកស្រីអាចជាប់ពន្ធនាគាររហូតដល់រយៈពេល១៤ឆ្នាំ ប្រសិនបើត្រូវបានសម្រេចថាមានទោស។
លោកស្រី Aung San Suu Kyi និងសមាជិករដ្ឋាភិបាលស៊ីវិលរបស់លោកស្រីជាច្រើនត្រូវបានឃុំខ្លួនចាប់តាំងពីយោធាកាន់អំណាចជាងពីរខែមក ដោយយោធាចោទប្រកាន់ថា មានការលួចបន្លំទ្រង់ទ្រាយធំនៅក្នុងការបោះឆ្នោតសភាកាលពីខែវិច្ឆិកាឆ្នាំមុន ដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី Aung San Suu Kyi បានឈ្នះយ៉ាងភ្លូកទឹកភ្លូកដី។
រដ្ឋប្រហារនេះបានធ្វើឱ្យមានបាតុកម្មទ្រង់ទ្រាយធំជារៀងរាល់ថ្ងៃនៅទូទាំងប្រទេសមីយ៉ាន់ម៉ាដើម្បីទាមទារឱ្យរដ្ឋាភិបាលជាប់ឆ្នោតរបស់លោកស្រីវិលត្រឡប់មកកាន់អំណាចវិញ។
របបយោធាបានឆ្លើយតបដោយការបង្ក្រាបដ៏ឃោរឃៅនិងដ៏សាហាវបំផុតប្រឆាំងនឹងក្រុមបាតុករ។
សមាគមជំនួយសម្រាប់អ្នកទោសមនសិការ (AAPP) ដែលជាអង្គការក្រៅរដ្ឋាភិបាលដែលឃ្លាំមើលស្ថានការណ៍នៅក្នុងប្រទេសមីយ៉ាន់ម៉ាបានប៉ាន់ស្មានថា មានមនុស្សជាង ៧០០ នាក់ហើយដែលត្រូវបានសម្លាប់ដោយកងកម្លាំងយោធា ចាប់តាំងពីមានការធ្វើបាតុកម្មដោយសន្ដិវិធីមក៕