ព្រះសង្ឃទីបេមួយអង្គបានធ្វើការប្រឆាំងតវ៉ាដោយដុតព្រះកាយខ្លួនឯង នៅខាងក្រៅប៉ុស្តិ៍សន្តិសុខមួយ ក្នុងខេត្តស៊ីឈួន (Sichuan) ប្រទេសចិន។ នេះជាករណីទី៣នៃការដុតខ្លួនដែលប្រព្រឹត្តដោយព្រះសង្ឃទីបេក្នុងរយៈពេលមួយសប្តាហ៍កន្លងទៅ។
ប្រភពព័ត៌មាននានាបានប្រាប់វីអូអេភាសាទីបេថាព្រះតេជគុណ កាល់សាំង យេស្ស៉ី ( Kalsang Yeshi ) បាននិមន្តទៅកាន់បុស្តិ៍យាមសន្តិសុខខាងក្រៅវត្ត ព្រះតេជគុណកាលពីថ្ងៃអង្គារ ហើយបានអំពាវនាវឲ្យមានសេរីភាពសម្រាប់ទីបេហើយនឹងអនុញាតិឲ្យព្រះសង្ឃដាឡៃឡាម៉ា និមន្តមកដែនដីទីបេវិញ មុនពេលដុតខ្លួន។
ព្រះតេជគុណអង្គនេះត្រូវបានគេជឿថាបានសុគតនៅទីកន្លែងដុតខ្លួន ទោះជាព្រះកាយព្រះអង្គត្រូវក្រុមសន្តិសុខចិនបានយកចេញក្តី។ តែស្ថានភាពពិតប្រាកដមិនត្រូវបានគេបញ្ជាក់ឲ្យដឹងទេនៅពេលនេះ។
ការបដិសេធរបស់ប៉ូលីសមិនឲ្យគ្រួសារបានដឹងពីស្ថានភាពព្រះតេជគុណអង្គ នោះនិងការមិនប្រគល់សពមកធ្វើបុណ្យឲ្យបានសមរម្យ បានធ្វើឲ្យមានការ តានតឹងក្នុងតំបន់ដែលគ្មានប្រព័ន្ធទំនាក់ទំនងផ្នែកទូរស័ព្ទនិងអ៊ិនធឺណិតនោះ។
ការដុតព្រះកាយព្រះតេជគុណ Kalsang Yeshi នេះគឺកើតឡើងបន្ទាប់ពីបុរសអាយុ៣៤ឆ្នាំ ឈ្មោះ Sangay Khar មានកូនពីរនាក់ បានដុតខ្លួនកាលពីថ្ងៃទី១៦ ខែធ្នូ និងស្រ្តីអាយុ២០ឆ្នាំ ឈ្មោះ សេបប៉ី យ៉ី (Tsepey Kyi) កាលពីថ្ងៃច័ន្ទ។
ក្រុមអាជ្ញាធរចិនមិនទាន់ធ្វើការអាត្ថាធិប្បាយអ្វីឡើយអំពីការដុតខ្លួនព្រះសង្ឃនិងពលរដ្ឋទីបេនាពេលថ្មីៗនេះទេ។
ចាប់តាំងពីឆ្នាំ២០០៩មក មានការដុតខ្លួនរបៀបនេះជាង១៣០ករណីមកហើយ ក្នុងទឹកដីទីបេ។ តែនៅខែថ្មីៗនេះមិនមានករណីរបៀបនេះកើតឡើងជាញឹក ញាប់ទេ ក្រោយពេលដែលមានការដាក់បំរាមអំពីការផាកពិន័យនិងដាក់ទោសទណ្ឌដល់ក្រុមគ្រួសារ និងអ្នកដ៏ទៃទៀតដែលជិតដិតនឹងអ្នកប្រពឹត្តការដុតខ្លួន នោះ។
កាលពីខែមុន ពលរដ្ឋទីបេដែលកំពុងនិរទេសខ្លួនបាននិយាយថា តុលាការភាគខាងនរតីប្រទេសចិនបានដាក់គុកពលរដ្ឋទីបេបីនាក់ ដោយចាប់ពី ពីរទៅបីឆ្នាំពីបទទាក់ទងនឹងការដុតខ្លួនកាលពីឆ្នាំទៅ។
ប្រទេសចិននិយាយថាការតវ៉ាប្រឆាំងតាមរយៈការធ្វើអត្តឃាតខ្លួនគឺជាអំពើ ភេរវកម្ម៕
(សេចក្តីរាយការណ៍របស់វីអូអេភាសាទីបេ ហើយប្រែសម្រួលដោយ លោក សុខ ខេមរា)។