ក្រសួងព័ត៌មានបានចេញសេចក្តីប្រកាសព័ត៌មានមួយ ដោយណែនាំឱ្យប្រព័ន្ធផ្សព្វផ្សាយទាំងអស់បញ្ឈប់រាល់សកម្មភាពលើកទឹកចិត្តឱ្យមានការប្រើប្រាស់គ្រឿងស្រវឹង និងអនុវត្តតាមសេចក្តីណែនាំរបស់ក្រសួងកាលពីកន្លងទៅ។ ចំណែកក្រសួងសុខាភិបាលវិញក៏បានចេញសេចក្តីប្រកាសព័ត៌មានមួយ ដោយប្រាប់ប្រជាពលរដ្ឋកុំឱ្យពិសាគ្រឿងស្រវឹង ដែលវាប៉ះពាល់ដល់សុខភាព។
ការចេញសេចក្តីប្រកាសព័ត៌មានពីសំណាក់ក្រសួងទាំងពីរធ្វើឡើងក្រោយមានការបង្ហោះរូបភាពរបស់យុវជនពីរនាក់ និងយុវតីពីរនាក់ពិសាស្រាបៀរកម្ពុជានៅលើសង្វៀនប្រដាល់ ដែលត្រូវបានផ្សព្វផ្សាយដោយទូរទស្សន៍ BTV។ រូបភាពនៃយុវជនទាំងនេះត្រូវបានចែករំលែកលើបណ្តាញសង្គមហ្វេសប៊ុកជាបន្តបន្ទាប់។
បើតាមសេចក្តីប្រកាសព័ត៌មានមួយចេញផ្សាយកាលពីថ្ងៃអង្គារ ក្រសួងព័ត៌មានឱ្យដឹងថា ការប្រើប្រាស់គ្រឿងស្រវឹងធ្វើឱ្យប៉ះពាល់ដល់សង្គម ដូចជាគ្រោះថ្នាក់ចរាចរណ៍ អំពើហិង្សាក្នុងគ្រួសារ សង្គម និងប៉ះពាល់ដល់សុខភាពជាដើម ដែលវាកើតចេញពីការទទួលទានគ្រឿងស្រវឹងដោយខ្វះការទទួលខុសត្រូវ។ ក្រសួងបន្ថែមថា ក្រសួងសង្កេតឃើញមានការផ្សព្វផ្សាយគ្រឿងស្រវឹងលើកញ្ចក់ទូរទស្សន៍ និងតាមប្រព័ន្ធផ្សព្វផ្សាយគ្រប់ប្រភេទយ៉ាងគគ្រឹកគគ្រេង ដោយប្រើសកម្មភាពជំរុញលើកទឹកចិត្ត និងប្រើរូបភាពអូសទាញប្រជាពលរដ្ឋ និងយុវជនឱ្យឈ្លក់វង្វេងសេពគ្រឿងស្រវឹង។
ដើម្បីបង្ការទប់ស្កាត់ និងលុបបំបាត់នូវរាល់ភាពអសកម្មខាងលើ ក្រសួងព័ត៌មានបានក្រើនរំឭកជាថ្មីម្តងទៀតដល់ម្ចាស់ប្រព័ន្ធផ្សព្វផ្សាយទាំងអស់ ម្ចាស់ក្រុមហ៊ុនផលិត នាំចូល ចែកចាយ និងក្រុមហ៊ុនផ្តល់សេវាកម្មផ្សាយពាណិជ្ជកម្មគ្រឿងស្រវឹងទាំងអស់ ត្រូវយកចិត្តទុកដាក់អនុវត្តតាមលិខិតជូនដំណឹង និងគោលការណ៍ក្រមប្រតិបត្តិរបស់ក្រសួងព័ត៌មានស្តីពីការផ្សាយពាណិជ្ជកម្មគ្រឿងស្រវឹង ដូចជាហាមផ្សាយពាណិជ្ជកម្មគ្រឿងស្រវឹងផ្តល់រង្វាន់ ដោយប្រើសកម្មភាពជំរុញ លើកទឹកចិត្ត ឬអូសទាញប្រជាពលរដ្ឋឱ្យឈ្លក់វង្វេងសេពគ្រឿងស្រវឹង ដើម្បីផ្សងសំណាងយករង្វាន់ និងពាក្យស្លោកដែលមានចរិតលើកទឹកចិត្តហួសហេតុពេក និងហាមយកស្ត្រី និងអនីតិជនក្រោមអាយុ ១៨ ឆ្នាំ ផ្សាយគ្រឿងស្រវឹងដែលប៉ះពាល់ដល់សិទ្ធិ និងសេចក្តីថ្លៃថ្នូររបស់ស្ត្រីខ្មែរ។ ក្រសួងព័ត៌មានបន្ថែមថា រាល់ការផ្សាយពាណិជ្ជកម្មគ្រឿងស្រវឹងតាមកញ្ចក់ទូរទស្សន៍គ្រប់ប្រភេទ និងសារព័ត៌មានតាមប្រព័ន្ធអនឡាញផ្សេងៗត្រូវដាក់សារព្រមានថា ពិសាគ្រឿងស្រវឹង សូមកុំបើកបរឬពិសាដោយការទទួលខុសត្រូវ។
ក្រសួងព័ត៌មានបញ្ជាក់ទៀតថា ករណីម្ចាស់ប្រព័ន្ធផ្សព្វផ្សាយ ឬក្រុមហ៊ុនផលិតនាំចូល ចែកចាយ ឬក្រុមហ៊ុនផ្តល់សេវាកម្មផ្សាយពាណិជ្ជកម្មគ្រឿងស្រវឹងណាមួយមិនអនុវត្តតាមលិខិតជូនដំណឹងនេះ ក្រសួងនឹងបញ្ឈប់ការផ្សាយស្ពតពាណិជ្ជកម្មនោះ ហើយបើម្ចាស់ប្រព័ន្ធផ្សព្វផ្សាយណាដែលល្មើសនោះ ក្រសួងព័ត៌មាននឹងអនុវត្តតាមកិច្ចសន្យាដែលតម្កល់ទុកនៅក្រសួងព័ត៌មាន។
ចំណែកក្រសួងសុខាភិបាលក៏បានចេញសេចក្តីប្រកាសព័ត៌មាននៅថ្ងៃពុធនេះ ដោយអំពាវនាវដល់អាជ្ញាធរមូលដ្ឋាន គ្រួសារ សាលារៀន និងសហគមន៍ ចូលរួមបង្កើតបរិយាកាសកាត់បន្ថយការប្រើប្រាស់គ្រឿងស្រវឹង ដូចជាអប់រំ ផ្សព្វផ្សាយឱ្យបានទូលំទូលាយ និងលើកទឹកចិត្តគាំទ្រអ្នកប្រើប្រាស់គ្រឿងស្រវឹងឱ្យលះបង់ការប្រើប្រាស់គ្រឿងស្រវឹង។ ក្រសួងសុខាភិបាលបញ្ជាក់ថា គ្រឿងស្រវឹងបង្កឱ្យមានផលប៉ះពាល់រយៈពេលវែងដូចជា ជំងឺក្រិនថ្លើម ខូចថ្លើម មហារីក ប្រព័ន្ធភាពស៊ាំចុះខ្សោយ ងាយធ្លាក់ខ្លួនឈឺដោយសារការបង្ករោគ បញ្ហាសុខភាពផ្លូវចិត្ត ជំងឺបេះដូង និងសរសៃឈាម ជំងឺខ្សោយសាច់ដុំ និងឆ្អឹងជាដើម។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្ដិភាពកត់សម្គាល់ឃើញថា កន្លងមកក្រសួងព័ត៌មានតែងចេញសេចក្ដីណែនាំអំពីការផ្សាយពាណិជ្ជកម្មស្ប៉តគ្រឿងស្រវឹងទៅដល់ប្រព័ន្ធផ្សព្វផ្សាយជានិច្ច ប៉ុន្តែក្រសួងព័ត៌មានមិនដែលអនុវត្តនូវវិធានការចំពោះស្ថាប័នប្រព័ន្ធផ្សព្វផ្សាយណាដែលធ្វើខុសពីការណែនាំនោះទេ។
លោកថ្លែងថា៖ «ជាទូទៅតាមការសង្កេតរបស់ខ្ញុំ គឺនេះមិនមែនជាលើកទីមួយទេដែលក្រសួងព័ត៌មានចេញ។ ក្រសួងព័ត៌មានតែងតែចេញជារៀងរាល់ឆ្នាំ ក៏ប៉ុន្តែជាទូទៅគឺក្រសួងព័ត៌មានមិនដែលបានអនុវត្តសេចក្ដីសម្រេចរបស់ខ្លួនទៅលើក្រុមហ៊ុន ទៅលើប្រព័ន្ធផ្សព្វផ្សាយមានការផ្សាយពាណិជ្ជកម្មខុសពីសេចក្ដីសម្រេចដែលបានចេញដោយក្រសួងព័ត៌មានទេ កន្លងមក»។
លោកសង្ឃឹមថា រដ្ឋមន្រ្ដីនៃក្រសួងព័ត៌មានថ្មីអាចយកចិត្តទុកដាក់ដោះស្រាយបញ្ហានេះ និងជំរុញការអនុវត្តច្បាប់ពាក់ព័ន្ធនឹងការផ្សាយពាណិជ្ជកម្មគ្រឿងស្រវឹងតាមសេចក្ដីណែនាំដែលចេញដោយក្រសួងព័ត៌មានឱ្យមានប្រសិទ្ធភាព។
លោកបន្ថែមទៀតថា ចំពោះការផ្សព្វផ្សាយផលិតផលគ្រឿងស្រវឹង នៅតាមបដាផ្ទាំងប៉ាណូផ្សាយពាណិជ្ជកម្មតាមទីសាធារណៈ លោកយល់ឃើញថា ជារឿងមិនសមរម្យ និងហាក់ដូចជាបង្ហាញថា កម្ពុជាមានវប្បធម៌ប្រពៃណីចងភ្ជាប់នឹងគ្រឿងស្រវឹង។
បន្ថែមពីនេះ លោក យង់ គិមអេង ជំរុញឱ្យរដ្ឋាភិបាលពន្លឿនច្បាប់ស្ដីពីការត្រួតពិនិត្យផលិតផលគ្រឿងស្រវឹងដែលនៅតែជាសេចក្ដីព្រាងច្បាប់តាំងពីឆ្នាំ២០១៥ ដើម្បីអាចប្រើបា្រស់ជាវិធានការក្នុងការទប់ស្កាត់កំណើននៃការប្រើប្រាស់គ្រឿងស្រវឹង។
វីអូអេមិនទាន់អាចសុំការអត្ថាធិប្បាយពីអ្នកស្រី ឱ វណ្ណឌីន អ្នកនាំពាក្យក្រសួងសុខាភិបាលបាននៅឡើយទេ។
ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី ប្រាប់វីអូអេនៅថ្ងៃពុធនេះថា ក្នុងនាមលោកជាគ្រូពេទ្យម្នាក់ លោកណែនាំឱ្យបងប្អូនប្រជាពលរដ្ឋអ្នកពិសាគ្រឿងស្រវឹងទាំងអស់គួរតែពិចារណាសាជាថ្មីចំពោះការពិសាគ្រឿងស្រវឹង ដោយលោកថា ប្រភេទគ្រឿងស្រវឹងនៅក្នុងស្រុកបច្ចុប្បន្ននេះហាក់បីមិនមានប្រភពច្បាស់លាស់នៅឡើយ។
លោកថ្លែងថា៖ «បើសិនជាបងប្អូនបានដឹង បានយល់ហើយគួរណាតែកុំទទួលរបស់ទាំងអស់ហ្នឹងបាទ ពីព្រោះថា យើងអត់ដឹងថា របស់ទាំងអស់ហ្នឹងដែលគេផលិតឡើងហ្នឹងវាមកពីប្រភពណា ហើយចេញពីណាមក។ យើងដឹងថា ក្រុមហ៊ុនមួយចំនួនបានផលិតនៅស្រុកខ្មែរ ក៏ប៉ុន្តែ យើងមិនបានដឹងថា យកទៅចូលឡាបូអីយ៉ាងម៉េចដើម្បីឱ្យដឹងថា គ្រឿងភេសជ្ជៈទាំងអស់ហ្នឹងវាមានហានិភ័យឬជាតិគីមីអ្វីខ្លះនៅក្នុងហ្នឹង»។
គួរបញ្ជាក់ថា ការស្ទង់មតិថ្មីមួយដែលធ្វើឡើងដោយក្រសួងសុខាភិបាល និងស្ថាប័នរដ្ឋាភិបាលពាក់ព័ន្ធផ្សេងទៀត បានបង្ហាញថា បុរស ៧ នាក់ ក្នុងចំណោម ១០ នាក់ដែលស្មើប្រមាណ ៧០% សេពគ្រឿងស្រវឹង។ នេះបើយោងតាមរបាយការណ៍ស្តីពីការអង្កេតប្រជាសាស្ត្រ និងសុខភាពកម្ពុជា ២០២១-២០២២ ដែលចេញផ្សាយកាលពីថ្ងៃទី ៤ ខែមេសា ឆ្នាំ ២០២៣។
ការស្ទង់មតិបង្ហាញថា ក្នុងមួយខែ បុរស ១០% ពិសាគ្រឿងស្រវឹងជារៀងរាល់ថ្ងៃ ឬស្ទើរតែរាល់ថ្ងៃ។ ចំណែក បុរស ៦០% សេពគ្រឿងស្រវឹងពី ១ ថ្ងៃទៅ ៥ ថ្ងៃ។ បុរស ១៨% ពិសាគ្រឿងស្រវឹង ៦ ថ្ងៃទៅ ១០ ថ្ងៃ និង បុរស ១២% ពិសាគ្រឿងស្រវឹងពី១១ ថ្ងៃទៅ ២៤ ថ្ងៃ៕