បន្ទាប់ពីមានករណីពុលទឹក និងស្រា សក្នុងខេត្តក្រចេះ ដែលបណ្ដាលឲ្យមនុស្សជាង១០នាក់បានស្លាប់ និងជាង២០០នាក់ផ្សេងទៀតចូលសម្រាកព្យាបាលក្នុងមន្ទីរពេទ្យ នៅថ្ងៃអង្គារនេះ ក្រសួងឧស្សាហកម្ម និងសិប្បកម្ម បានចេញលិខិតអំពាវនាវឲ្យប្រជាពលរដ្ឋបញ្ឈប់ការបរិភោគទឹកព្រែក និងស្រាស បន្ទាប់ពីរកឃើញមានសាធាតុពុលក្នុងទឹក និងស្រាទាំងនោះ។
ក្រសួងឧស្សាហកម្ម និងសិប្បកម្ម អំពាវនាវឲ្យប្រជាពលរដ្ឋរស់នៅតាមបណ្ដោយនិងដៃព្រែកទេរក្នុងខេត្តក្រចេះ ឲ្យឈប់ពិសាទឹកព្រែក និងស្រាស ក្រោយពីក្រសួងពិសោធន៍ឃើញមានសារធាតុពុលហួសកម្រិតក្នុងស្រាស និងទឹកព្រែកនោះ ដែលក្រសួងនិយាយថា ជាមូលហេតុបង្កឲ្យពលរដ្ឋ១៣នាក់ស្លាប់ កាលពីដើមសប្ដាហ៍នេះ។ នេះបើសេចក្ដីប្រកាសព័ត៌មានស្ដីពីករណីពុលស្រាស និងទឹកតាមបណ្ដោយដងព្រែកទេរ នៅខេត្តក្រចេះ ដែលចេញដោយក្រសួងឧស្សាហកម្ម និងសិប្បកម្មនៅថ្ងៃអង្គារនេះ។
សេចក្ដីប្រកាសព័ត៌មានដដែល បានសរសេរក្នុងន័យដើមថា៖
«ដើម្បីធានាសុវត្ថិភាពនិងបង្ការគ្រោះថ្នាក់បន្ថែមទៀត ក្រសួងសូមអំពាវនាវដល់បងប្អូនប្រជាពលរដ្ឋដែលរស់នៅតាមបណ្ដោយដងព្រែក និងដៃព្រែកទេរ បញ្ឈប់ការពិសាស្រាស និងអនុវត្តតាមការណែនាំរបស់រដ្ឋបាលខេត្តក្រចេះ ដោយបញ្ឈប់ប្រើប្រាស់ទឹកព្រែកទេរ និងទឹកតាមដៃព្រែកទេ ជាបណ្ដោះអាសន្នសិន ហើយរង់ចាំក្រុមមន្ត្រីជំនាញសហការជាមួយអាជ្ញាធរមូលដ្ឋាន ពិនិត្យ ស្រាវជ្រាវ និងដកហូតស្រាដែលមានជាតិពុល និងពិនិត្យឃើញថា ទឹកក្នុងព្រែកទេរត្រូវបានសាបអស់ជាតិពុលសិន បន្ទាប់មកក្រសួង និងអាជ្ញាធរមូលដ្ឋាននឹងជូនដំណឹងតាមក្រោយ»។
សេចក្ដីប្រកាសព័ត៌មានដដែលនោះបញ្ជាក់ថាក្រោយពីពិនិត្យសំណាកស្រាស និងទឹកព្រែកទេរនោះ អ្នកជំនាញរកឃើញមានសារធាតុមេតាណុល សារធាតុក្រូម និងសារធាតុនីទ្រីត ខ្ពស់ខ្លាំង ដែលជាហេតុបណ្ដាលឲ្យប្រជាជនដែលបរិភោគទឹក និងស្រាសនោះ បានបាត់បង់ជីវិត និងរងផលប៉ះពាល់ដល់សុខភាព។ ទោះយ៉ាងណាក្រសួង មិនបានបានបញ្ជាក់ថាតើសារធាតុពុលក្នុងទឹកទាំងនោះ កើតឡើងបណ្ដាលមកពីមូលហេតុអ្វីនោះទេ។
ចាប់តាំងពីថ្ងៃទី៣ ខែឧសភា ឆ្នាំ២០១៨ ប្រជាពលរដ្ឋរាប់សិបនាក់ស្ថិតក្នុងភូមិស្រែនន ឃុំកន្ទួត ស្រុកចិត្របុរី ខេត្តក្រចេះ មានរោគសញ្ញា ឈឺពោះ ក្អួត ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើម រហូតបណ្ដាលឲ្យស្លាប់ និងជាច្រើននាក់ផ្សេងទៀត ត្រូវបានដឹកបញ្ជូនទៅកាន់មន្ទីរពេទ្យបង្អែកខេត្ត និងមន្ទីរពេទ្យកាល់់ម៉ែតក្នុងរាជធានីភ្នំពេញ។
លោក ឈ្នាង សុវត្ថា ប្រធានមន្ទីរសុខាភិបាលខេត្តក្រចេះ ប្រាប់ VOA នារសៀលថ្ងៃអង្គារនេះថា រហូតមកដល់ពេលនេះ លទ្ធផលចុងក្រោយបង្ហាញថា ប្រជាជនរងគ្រោះដែលបានបរិភោគស្រាស និងទឹកព្រែកទេរ មានចំនួន១៣នាក់ បានស្លាប់ និងប្រជាជនក្មេងចាស់ប្រុសស្រីសរុបចំនួន២៩៣នាក់ទៀត មានបញ្ហាសុខភាព និងត្រូវបានបញ្ជូនទៅមន្ទីរពេទ្យ។ លោកបន្ថែមថា រហូតមកដល់ពេលនេះ ការស្រាវជ្រាវត្រូវបានបញ្ចប់ ហើយប្រជាពលរដ្ឋរងគ្រោះមួយចំនួន ក៏បានត្រឡប់ទៅផ្ទះវិញដែរ។
លោកបញ្ជាក់ថា៖
«យើងរកឃើញវត្ថុវិភាគថាមានជាតិពុលហ្នឹង ហើយយើងចប់ការស្រាវជ្រាវហ្នឹងហើយ ហើយលទ្ធផលយើងបានចេញហើយ ហើយឥលូវហ្នឹងអ្នកជំងឺ ក៏បានធូរស្រាលវិលត្រឡប់ទៅផ្ទះជាបណ្ដើរៗហើយ»។
សារព័ត៌មានក្នុងស្រុកមួយចំនួនបានផ្សាយថា ប្រជាពលរដ្ឋមួយចំនួនដែលរស់នៅក្នុងតំបន់កើតហេតុ បានចាកចោលលំនៅឋាន ដោយសារបារម្ភពីបញ្ហាពុលស្រា និងទឹកព្រែកនៅទីនោះ។
VOA មិនអាចទាក់ទងសុំការអធិប្បាយពីលោក លន់ សុផាត ស្នងការនគរបាលខេត្តក្រចេះបានទេ រហូតដល់ល្ងាចថ្ងៃអង្គារនេះ។ ចំណែកលោក វ៉ា ថន អភិបាលខេត្តក្រចេះ បដិសេធមិនធ្វើអត្ថាធិប្បាយ។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លើកឡើងថា ការបញ្ជាក់របស់ក្រសួងពីលទ្ធផលនៃការពុលស្រាស និងទឹកព្រែកដែលបណ្ដាលមកពីសារធាតុពុលដោយមិនមានការស្រាវជ្រាវបញ្ជាក់ឲ្យបានហ្មត់ចត់ នឹងធ្វើឲ្យប្រជាពលរដ្ឋទីនោះរស់នៅដោយការភ័យខ្លាច។
លោកបន្ថែមថា អាជ្ញាធរមានសមត្ថកិច្ចត្រូវរកឲ្យឃើញពីមូលហេតុដែលបណ្ដាលឲ្យទឹកនៅទីនោះមានសាធាតុពុល និងស្វែងរកដំណោះស្រាយដើម្បីបង្ការ ធ្វើយ៉ាងណាធានាថា ករណីនេះ នឹងមិនកើតមាននៅពេលក្រោយទៀត។
លោក សន ជ័យ មានប្រសាសន៍ក្នុងន័យដើមថា៖
«ឥឡូវនេះ នៅពេលដែលមានការទម្លាក់សំណុំរឿងនេះទៅលើការផឹកស្រា ប្រជាពលរដ្ឋ នៅតែមានការភ័យខ្លាចដដែល។ ហើយរឿងប្រភពទឹក ក៏មិនទាន់ត្រូវបានគេបង្ហាញឲ្យបានច្បាស់ ហើយនិងបរិស្ថានពាក់ព័ន្ធផ្សេងៗទៀតហ្នឹង ដែលជាចំណុចបារម្ភ ហើយក៏ជាអ្វីដែលគេដាក់ការសង្ស័យទៅលើដែរ។ បានន័យថាប្រជាពលរដ្ឋខ្លះគាត់សង្ស័យទៅលើទឹក។ អញ្ចឹងបើសិនជាគ្មានការស៊ើបអង្កេតឲ្យបានស៊ីជម្រៅទេ យើងបារម្ភថា ពួកគេនឹងរស់នៅដោយការភ័យខ្លាចហ្នឹងរយៈពេលវែង ហើយហេតុផលដែលបង្កឲ្យមានមនុស្សស្លាប់ហ្នឹងវាអាចនឹងកើតមានម្ដងទៀត»។
ដោយឡែក កាលពីថ្ងៃទី៦ ខែឧសភានេះ ក៏មានពលរដ្ឋក្មេងចាស់ ប្រុសស្រី ចំនួន៤៤នាក់ ស្ថិតនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ ត្រូវបានសង្ស័យថាពុលនំអន្សមអាំង។
ក្នុងនោះ ពលរដ្ឋរងគ្រោះធ្ងន់ធ្ងរមានចំនួន២៨នាក់ ដោយសារតែនំអន្សមអាំងនោះខ្វះអនាម័យ និងត្រូវបានទុកដាក់មិនត្រឹមត្រូវ។ នេះបើតាមការបញ្ជាក់របស់លោក លី សូវ៉ាន់ អ្នកនាំពាក្យក្រសួងសុខាភិបាល។
ករណីពុលអាហារ និងស្រា តែងកើតមានជារឿយៗ នៅតាមបណ្ដាខេត្តមួយចំនួនក្នុងប្រទេសកម្ពុជា។ របាយការណ៍របស់ក្រសួងសុខាភិបាល បញ្ជាក់ថា ករណីពុលចំណីអាហារក្នុងឆ្នាំ២០១៧ កើតមានលើមនុស្សចំនួន៩៤៧នាក់ ក្នុងនោះមានមនុស្សចំនួន៤នាក់ បានស្លាប់ដោយសារពុលស្រា ដែលចំនួននេះ បានធ្លាក់ចុះជិត២០ភាគរយ បើធៀបទៅនឹងតួលេខឆ្នាំ២០១៦៕