សមាគមមីក្រូហិរញ្ញវត្ថុ ដែលតំណាងឲ្យគ្រឹះស្ថានមីក្រូហិរញ្ញវត្ថុនៅកម្ពុជា នៅថ្ងៃសុក្រនេះ បានអះអាងថា ខ្លួនបានរកឃើញ«ភាពមិនប្រក្រតីជាច្រើន»ក្នុងរបាយការណ៍របស់អង្គការលីកាដូ ដែលទើបចេញផ្សាយនៅដើមសប្តាហ៍នេះ។
សេចក្តីប្រកាសព័ត៌មានរបស់សមាគមនេះ ចុះថ្ងៃទី៣ ខែកក្កដា បានបញ្ជាក់ថា ខ្លួនបានសម្ភាសអ្នកភូមិ២នាក់ ក្នុងចំណោម៤នាក់ ដែលបានផ្តល់បទសម្ភាសន៍ជាវីដេអូដល់ក្រុមស្រាវជ្រាវរបស់អង្គការលីកាដូ ហើយរកឃើញថា ម្នាក់ក្នុងចំណោមពីរនាក់នោះ មិនធ្លាប់បានខ្ចីប្រាក់ពីគ្រឹះស្ថានមីក្រូហិរញ្ញវត្ថុណាមួយឡើយ។
ការលើកឡើងនេះ កើតឡើងក្រោយពីអង្គការសង្គមស៊ីវិលចំនួន៣ គឺអង្គការលីកាដូ អង្គការសង់ត្រាល់ និងសម្ព័ន្ធសហជីពកម្ពុជា កាលពីថ្ងៃអង្គារ បានចេញផ្សាយរបាយការណ៍ថ្មីចុងក្រោយបំផុតមួយដែលបង្ហាញថា កម្មកររោងចក្រមួយចំនួនត្រូវបង្ខំចិត្តលក់ដី ផ្ទះនិងទ្រព្យសម្បត្តិរបស់ខ្លួន ដើម្បីសងបំណុលមីក្រូហិរញ្ញវត្ថុនិងធនាគារ។
ប្រតិកម្មរបស់សមាគមមីក្រូហិរញ្ញវត្ថុនេះ ធ្វើឡើងមួយថ្ងៃក្រោយពីធនាគារអេស៊ីលីដាដែលជាធនាគារធំជាងគេមួយនៅកម្ពុជា បានចេញសេចក្តីថ្លែងការណ៍មួយដោយហៅរបាយការណ៍របស់អង្គការក្រៅរដ្ឋាភិបាលទាំងនេះថា «មានចរិតញុះញង់និងមានចេតនាបំផ្លាញបង្ខូចកេរ្តិ៍ឈ្មោះគ្រឹះស្ថានធនាគារនិងហិរញ្ញវត្ថុ»។
របាយការណ៍ដែលមានចំណងជើងថា «ធ្វើការងាររហូតជំពាក់បំណុលវ័ណ្ឌក» ដែលចងក្រងដោយអង្គការសង្គមស៊ីវិលទាំងនេះ បានសម្ភាសកម្មករកាត់ដេរចំនួន១៦២នាក់ ដែលភាគច្រើនជាស្ត្រី នៅចន្លោះខែមីនាដល់ខែឧសភា ឆ្នាំ២០២០។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ ថ្លែងប្រាប់វីអូអេតាមបណ្តាញសង្គមនៅថ្ងៃសុក្រនេះថា ការរកឃើញអាចខុសគ្នារវាងអ្វីដែលអង្គការរបស់លោករកឃើញ និងអ្វីដែលសមាគមមីក្រូហិរញ្ញវត្ថុរកឃើញ ពេលចុះទៅជួបសម្ភាសកម្មករ។
«ការដែលជួបវាខុសគ្នា ព្រោះបើទាក់ទងមីក្រូហិរញ្ញវត្ថុទៅជួបតែម្តង ប្រហែលជាគាត់មិនហ៊ាននិយាយពីផលប៉ះពាល់ជាមួយមីក្រូហិរញ្ញវត្ថុទេ»៕