ក្រុមប្រឹក្សាភិបាលក្រុមហ៊ុន Meta នៅថ្ងៃព្រហស្បតិ៍នេះ បានអំពាវនាវឲ្យព្យួរគណនីហ្វេសប៊ុករបស់នាយករដ្ឋមន្ត្រីកម្ពុជា លោក ហ៊ុន សែន រយៈពេល៦ខែ ដោយនិយាយថា វីដេអូមួយដែលបានបង្ហោះតាមទំព័រហ្វេសប៊ុករបស់លោក បានរំលោភវិធានរបស់ក្រុមហ៊ុន Meta ស្តីពីការគំរាមកំហែងហិង្សា។ នេះបើយោងតាមទីភ្នាក់ងារសារព័ត៌មាន Reuters។
ក្រុមប្រឹក្សាភិបាលនេះ ដែលផ្តល់មូលនិធិដោយក្រុមហ៊ុន Meta តែប្រតិបត្តិការងារដោយ ឯករាជ្យ និយាយថា ក្រុមហ៊ុន Meta មានកំហុសក្នុងការទុកឲ្យវីដេអូនោះបន្តនៅមាន ហើយក៏បានបញ្ហាឲ្យដកវីដេអូនោះចេញពីហ្វេសប៊ុក។
ក្នុងសេចក្តីថ្លែងការណ៍មួយ ក្រុមហ៊ុន Meta បានយល់ព្រមដកវីដេអូនោះចេញ តែនិយាយថាខ្លួននឹងឆ្លើយតបចំពោះអនុសាសន៍ឲ្យព្យួរគណនីលោក ហ៊ុន សែន ក្រោយពីពិនិត្យពិច័យរួចសិន។
ការព្យួរគណនីនេះ នឹងបិទទំព័រហ្វេសប៊ុករបស់លោកនាយករដ្ឋមន្ត្រី ក្នុងពេលមិនដល់១ខែមុនការបោះឆ្នោតជាតិនៅកម្ពុជា ទោះបីជាក្រុមអ្នករិះគន់និយាយថា ការបោះឆ្នោតនោះគឺជាការបោះឆ្នោតក្លែងក្លាយដោយការគ្រប់គ្រងផ្តាច់ការរបស់លោក ហ៊ុន សែន។
លោក ហ៊ុន សែន បានថ្លែងថា លោកនឹងលែងបង្ហោះនៅលើហ្វេសប៊ុកទៀតហើយ ហើយនឹងពឹងផ្អែកលើកម្មវិធី Telegram វិញ ដើម្បីឲ្យអ្នកគាំទ្រទទួលសាររបស់លោក។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ការសម្រេចព្យួរគណនីហ្វេសប៊ុកនេះ គឺជាវិធានការថ្មីបំផុតរបស់ក្រុមប្រឹក្សាភិបាល ស្តីពីរបៀបដែលក្រុមហ៊ុនប្រព័ន្ធផ្សព្វផ្សាយសង្គមធំជាងគេលើពិភពលោក ឆ្លើយតបចំពោះមេដឹកនាំនយោបាយដែលរំលោភវិធានក្រុមហ៊ុន និងញុះញង់ឲ្យមានហិង្សាជុំវិញការបោះឆ្នោត។
លោក Phil Robertson នាយករងប្រចាំតំបន់អាស៊ីនៃអង្គការ Human Rights Watch បាននិយាយ
ក្នុងសេចក្តីថ្លែងការណ៍មួយស្តីពីការចាកចេញពីគណនីហ្វេសប៊ុករបស់លោកនាយករដ្ឋមន្ត្រី ហ៊ុន សែនថា៖ «នាយករដ្ឋមន្ត្រីកម្ពុជា លោក ហ៊ុន សែន ទីបំផុតត្រូវគេដកចេញ ដោយសារប្រើប្រព័ន្ធផ្សព្វផ្សាយសង្គម ដើម្បីញុះញង់ឲ្យមានអំពើហិង្សាលើក្រុមប្រឆាំង ហើយច្បាស់ណាស់ គាត់មិនចូលចិត្តការសម្រេចចិត្តនេះទេ។ … ការប្រឈមទល់មុខគ្នារវាងក្រុមហ៊ុនបច្ចេកវិទ្យាយក្សនិងជនផ្តាច់ការ ដោយសារបញ្ហាសិទ្ធិមនុស្ស គួរតែធ្វើយូរយារមកហើយ ព្រោះមានហានិភ័យធំធេងដោយសារតែគ្រោះថ្នាក់ពិតប្រាកដជាច្រើន បណ្តាលមកពីជនផ្តាច់ការប្រើប្រព័ន្ធផ្សព្វផ្សាយសង្គម ដើម្បីញុះញង់ឲ្យមានហិង្សា ដូចយើងឃើញកើតឡើងច្រើនដងពេកហើយក្នុងប្រទេសកម្ពុជា»៕