កម្រងរូបភាព VOA៖ កីឡាករបាល់ទាត់ដែលរកប្រាក់ចំណូលបានខ្ពស់ជាងគេក្នុងលំដាប់ថ្នាក់កំពូលទាំង ១០ សម្រាប់ឆ្នាំ ២០១៦
Lionel Messi
ប្រាក់ចំណូលសម្រាប់កីឡាករបាល់ទាត់ដែលឈ្នះពានរង្វាន់បាល់មាស (Ballon d'Or) រូបនេះ ត្រូវបានប៉ាន់ប្រមាណថា មាន ៧៤ លានអឺរ៉ូក្នុងមួយឆ្នាំ ដែលក្នុងនោះ ៣៦ លានអឺរ៉ូជាប្រាក់បៀវត្សរ៍ផ្សេងៗ ០៣លានអឺរ៉ូជាប្រាក់រង្វាន់បន្ថែម និង ៣៥លានអឺរ៉ូជាប្រាក់ចំណូលបានមកពីការផ្សព្វផ្សាយពាណិជ្ជកម្មនានា។
Cristiano Ronaldo
កីឡាករបាល់ទាត់ក្លឹប Real Madrid រូបនេះមានប្រាក់ចំណូល ៦៧,៤ លានអឺរ៉ូ។ ប្រាក់បៀវត្សរ៍សម្រាប់កីឡាករសញ្ជាតិប៉រទុយហ្គាល់មួយនេះមានត្រឹមតែពាក់កណ្តាលនៃប្រាក់ចំណូលសរុបប៉ុណ្ណោះ។
Neymar da Silva Santos Júnior
កីឡាករសញ្ជាតិប៊្រេស៊ីលរូបនេះជាប់ចំណាត់ថ្នាក់លេខបីជាកីឡាករដែលទទួលបានប្រាក់ចំណូលខ្ពស់ជាងគេ។ កីឡាករ Neymar រកប្រាក់ចំណូលបាន ៤៣,៥ លានអឺរ៉ូក្នុងមួយឆ្នាំ ដែលក្នុងនោះរួមមានប្រាក់បៀវត្សរ៍ ២០ លានអឺរ៉ូ ប្រាក់រង្វាន់បន្ថែម ២,៥ លានអឺរ៉ូ និងប្រាក់ចំណូលដទៃទៀត ២១ លានអឺរ៉ូ។
Zlatan Ibrahimovic
កីឡាករនេះជាកីឡាកររកប្រាក់ចំណូលបានខ្ពស់ជាងគេពីលីកបាល់ទាត់បារាំងដែលបានជាប់នៅក្នុងតារាងចំណាត់ថ្នាក់នេះ។ កីឡាករ Zlatan Ibrahimovic រកប្រាក់ចំណូលបាន ២៨,៥ លានអឺរ៉ូក្នុងមួយឆ្នាំ ដែលក្នុងនោះរួមមានប្រាក់បៀវត្សរ៍ ២០ លានអឺរ៉ូ។ ហើយនេះគឺជាកីឡាករមួយនៅក្នុងចំណោមកីឡាករបីនាក់មកពីក្លឺបបាល់ទាត់ PSG ដែលបានជាប់នៅក្នុងចំណាត់ថ្នាក់កំពូលទាំង ១០ នេះ។
Thiago Silva
ប្រធានក្រុមបាល់ទាត់ PSG រូបនេះរកប្រាក់ចំណូលបាន ២៦,៥ លានអឺរ៉ូបក្នុងមួយឆ្នាំ។ ប្រាក់បៀវត្សរ៍របស់កីឡាកររូបនេះមាន ២៣ លានអឺរ៉ូដែលមានខ្ពស់ជាងប្រាក់បៀវត្សន៍របស់កីឡាករ Ibrahimovic។ ប៉ុន្តែប្រាក់ចំនូលដទៃទៀត ដែលរួមមានប្រាក់ចំណូលពីការផ្សាយពាណិជ្ជកម្ម មានតិចជាង។
Angel Di Maria
កីឡាករសញ្ជាតិអាហ្សង់ទីនរូបនេះ ដែលមកពីក្លឹបបាល់ទាត់ PSG គឺជា កីឡាកររកប្រាក់ចំណូលបានខ្ពស់ជាងគេទី ០៦ នៅលើពិភពលោកជាមួយនឹងប្រាក់ចំណូលប្រមាណ ២៦ លានអឺរ៉ូ។ ក្លឺប PSG ផ្តល់ប្រាក់បៀវត្សរ៍ឲ្យកីឡាកររូបនេះចំនួន ២៤លានអឺរ៉ូ។
Gareth Bale
នាឆ្នាំនេះ កីឡាករសញ្ជាតិវ៉ែល ដែលលេងឲ្យក្លឹប Real Madrid នៅតែជាកីឡាករបាល់ទាត់រកប្រាក់ចំណូលបានខ្ពស់ជាងគេនៅក្នុងក្រុមបន្ទាប់ពីកីឡាករ Cristiano Ronaldo។ កីឡាកររូបនេះរកប្រាក់ចំណូលបាន ២៤,៥ លានដុល្លារ ដែលក្នុងនោះរួមមាន ១៤ លានអឺរ៉ូ ជាប្រាក់បៀវត្សរ៍។
Thomas Müller
កីឡាករខ្សែបម្រើរបស់ក្លឹប Bayern Munich មួយនេះ គឺជា កីឡាករតែម្នាក់គត់មកពីលីកបាល់ទាត់អាល្លឺម៉ង់ ដែលជាប់នៅក្នុងចំណាត់ថ្នាក់កីឡាកររកប្រាក់ចំណូលខ្ពស់ជាងគេទាំង ១០ នៅលើពិភពលោក។ កីឡាកររូបនេះរកប្រាក់ចំណូលបាន ២៣,៦ លានអឺរ៉ូក្នុងមួយឆ្នាំ។
Wayne Rooney
កីឡាកររូបនេះគឺជា កីឡាករតែម្នាក់គត់មកពីលីកបាល់ទាត់អង់គ្លេសដែលស្ថិតនៅក្នុងតារាងចំណាត់ថ្នាក់កីឡាកររកប្រាក់ចំណូលខ្ពស់ជាងគេទាំង ១០ នៅលើពិភពលោក។ Rooney រកប្រាក់ចំណូលបាន ២២លានអឺរ៉ូ។
Andrés Iniesta
កីឡាករខ្សែបម្រើសញ្ជាតិអេស្ប៉ាញស្ថិតនៅក្នុងចំណាត់ថ្នាក់ទី ១០ ជាមួយនឹងប្រាក់ចំណូល ២១,៥ លានអឺរ៉ូនៅក្នុងសណ្ឋានជាប្រាក់ចំណូលប្រចាំឆ្នាំ។ កីឡាករនេះក៏ជាកីឡាករដែលបានស៊ុតបញ្ចូលទីនូវគ្រាប់បាល់ឈ្នះសម្រាប់ប្រទេសអេស្ប៉ាញនៅក្នុងការប្រកួតពាន់រង្វាន់បាល់ទាត់ពិភពលោកឆ្នាំ ២០១០ ផងដែរ។