ខណៈដែលអាជ្ញាធរខេត្តសៀមរាបបញ្ជាឱ្យរំសាយការជួបជុំ គណបក្សសម្ព័ន្ធដើម្បីប្រជាធិបតេយ្យ(LDP)នៅក្នុងខេត្តសៀមរាប បានការពារខ្លួនថា ការជួបជុំនេះមិនខុសច្បាប់ឡើយ។
ប្រជាពលរដ្ឋរាប់ពាន់នាក់បានទៅស្នាក់នៅ បោះតង់នៅដីចម្ការម្រេចរបស់ប្រធានគណបក្សសម្ព័ន្ធដើម្បីប្រជាធិបតេយ្យគឺ លោក ខឹម វាសនា នៅក្បែរជើងភ្នំគូលែន ដោយសារភ័យខ្លាចរឿងទឹកជំនន់លិចពិភពលោក តាមការថ្លែងរបស់លោក។ ការសម្រុកទៅខេត្តសៀមរាបនេះក៏នាំឱ្យមានការរិះគន់ផងដែរថា ហេតុអ្វីបានជាប្រជាពលរដ្ឋជឿលើពាក្យសម្តីរបស់លោក ខឹម វាសនា។
នៅក្នុងសេចក្តីថ្លែងការណ៍មួយរបស់គណបក្សសម្ព័ន្ធដើម្បីប្រជាធិបតេយ្យប្រចាំខេត្តសៀមរាប ចុះថ្ងៃទី៣០ ខែសីហា គណបក្សបានការពារខ្លួនថា ការជួបជុំនេះគឺមិនខុសច្បាប់នោះទេ ហើយគណបក្សបានធ្វើលិខិតជូនដំណឹងទៅអាជ្ញាធរឃុំរួចហើយ។
ចាប់តាំងពីថ្ងៃទី២៦ ខែសីហា ប្រជាពលរដ្ឋជាង១ម៉ឺន៥ពាន់នាក់បាននាំគ្នាជិះឡាន ម៉ូតូយ៉ាងច្រើនកុះករ ដោយបាននាំយកកូនចៅ និងរបស់របរប្រើប្រាស់មួយចំនួនទៅជាមួយ ដូចជាចាន ឆ្នាំងជាដើមដើម្បីភៀសខ្លួន និងស្នាក់នៅរួមគ្នាក្នុងចម្ការម្រេចមួយកន្លែងរបស់ប្រធានគណបក្សសម្ព័ន្ធប្រជាធិបតេយ្យ គឺលោក ខឹម វាសនា ដែលស្ថិតនៅខាងជើងភ្នំគូលែន ក្នុងឃុំត្បែង ស្រុកបន្ទាយស្រី ខេត្តសៀមរាប។ ការសម្រុកទៅនេះកើតមានឡើងក្រោយការថ្លែងរបស់លោក ខឹម វាសនា ដែលបានទស្សន៍ទាយពីទឹកជំនន់ជន់លិចពិភពលោកទាំងមូល លើកលែងតែទឹកដីភ្នំគូលែន ក្នុងសៀមរាបតែមួយគត់ដែលមិនជន់លិចនោះ។
សមាជិកគណបក្សសម្ព័ន្ធដើម្បីប្រជាធិបតេយ្យ និងអ្នកគាំទ្ររបស់លោក ខឹម វាសនា បានស្នាក់នៅក្រោមតង់រួមគ្នាយ៉ាងកុះករ និងខ្លះស្នាក់នៅក្នុងរោងឈើជាដើម ដោយមានទាំងក្មេងចាស់ ចម្រុះវ័យ ដែលមកពីគ្រប់ខេត្ត។ អាជ្ញាធរខេត្តសៀមរាបអះអាងថា ការណ៍នេះធ្វើឱ្យប៉ះពាល់ដល់សន្តិសុខសង្គម និងសុវត្ថិភាព ព្រមទាំងប្រឈមការឆ្លងរាលដាលជំងឺកូវីដ១៩ជាដើម។
មិនមែនមានតែពលរដ្ឋក្នុងប្រទេសកម្ពុជាទេ ដែលសម្រុកនាំគ្នាទៅចម្ការម្រេចខាងជើងភ្នំគូលែននេះ។ ពលរដ្ឋមួយចំនួនដែលកំពុងធ្វើការនៅកូរ៉េខាងត្បូងក៏បាននាំគ្នាបោះបង់ការងារ និងទ្រព្យសម្បត្តិរបស់ខ្លួន ដោយបានវិលត្រឡប់មកកម្ពុជាយ៉ាងតក់ក្រហល់ដោយភ័យខ្លាចនូវអ្វីដែលប្រធានគណបក្សសម្ព័ន្ធដើម្បីប្រជាធិបតេយ្យបានលើកឡើងអំពី Black Holeឬហៅថា រន្ធខ្មៅដែលថា នឹងមានទឹកជំនន់ជន់លិចពិភពលោកទាំងមូលនេះ។ នេះបើតាមសេចក្តីប្រកាសណែនាំចុះថ្ងៃទី២៦ ខែសីហារបស់ស្ថានឯកអគ្គរាជទូតកម្ពុជាប្រចាំសាធារណៈរដ្ឋកូរ៉េ។ ប៉ុន្តែអាជ្ញាធរមិនទាន់អាចបញ្ជាក់នៅឡើយថា តើពលរដ្ឋខ្មែរ ប៉ុន្មាននាក់ដែលធ្វើការនៅប្រទេសកូរ៉េ ហើយត្រឡប់មកកម្ពុជាវិញនោះទេ ក្រោយពីមានជំនឿលើការថ្លែងរបស់លោក ខឹម វាសនា។
នៅពេលមានការជួបជុំយ៉ាងច្រើនបែបនេះ អាជ្ញាធរខេត្តសៀមរាបបានបញ្ជាឱ្យរំសាយ និងបញ្ឈប់សកម្មភាពជួបជុំទាំងនោះ ត្រឹមម៉ោង១២ យប់ ថ្ងៃទី៣០ ខែសីហានេះ និងព្រមានចាត់វិធានការច្បាប់ បើនៅបន្តជួបជុំ។ អាជ្ញាធរខេត្តចាត់ទុកសកម្មភាពនេះថាជា«ការឃោសនាប្រជាភិថុតិបែបអបិយជំនឿ» និងប្រាសចាកការណ៍ពិត។ នេះបើតាមសេចក្តីជូនដំណឹងរបស់រដ្ឋបាលខេត្តសៀមរាប ចុះថ្ងៃទី២៩ ខែសីហា។
លោក ឃឹម ហ្វីណង់ អភិបាលស្រុកបន្ទាយស្រី ប្រាប់វីអូអេនៅថ្ងៃអង្គារនេះថា ប្រជាពលរដ្ឋដែលមកជួបជុំបោះតង់ស្នាក់នៅក្នុងព្រៃជិតជើងភ្នំគូលែន គឺបានចាប់ផ្តើមរុះរើ និងត្រឡប់ទៅផ្ទះរបស់ពួកគេវិញហើយ តាំងពីថ្ងៃចន្ទ។ លោកបន្តថា ឱសានវាទគឺត្រឹមយប់ថ្ងៃទី៣០ ខែសីហានេះ ដូច្នេះអាជ្ញាធរនឹងពិនិត្យតាមដានបន្តទៀតថា តើនៅមានពលរដ្ឋបន្តជួបជុំទៀតនៅក្នុងចម្ការម្រេច ឬយ៉ាងណា។ លោកបញ្ជាក់ថា ប្រសិនបើការជួបជុំនៅតែមាន នោះអាជ្ញាធរនឹងចាត់វិធានការតាមផ្លូវច្បាប់។
លោកអភិបាលស្រុកបន្ថែមថា សកម្មភាពឃោសនា និងការជួបជុំដែលមិនមានមូលដ្ឋានច្បាស់លាស់បែបនេះគឺមិនបានធ្វើឱ្យល្អប្រសើរដល់សង្គមជាតិទេ ប៉ុន្តែលោកថា វាបានបង្កចលាចលសង្គម និងធ្វើឱ្យប្រជាពលរដ្ឋខាតបង់ទ្រព្យសម្បត្តិ និងបោះបង់ការងារចោលជាដើម។ លោកសង្ឃឹមថា ប្រជាពលរដ្ឋនឹងមានការវិនិច្ឆ័យច្បាស់លាស់ ដោយខ្លួនឯងថា អ្វីត្រឹមត្រូវ និងអ្វីមិនត្រឹមត្រូវនោះ។
លោកថ្លែងថា៖ «យើងមិនលើកទឹកចិត្តឱ្យមានជំនឿបែបនេះទេ។ ឥឡូវពេលវេលាកំណត់ថា ថ្ងៃ២៥ ក្រោយមកថ្ងៃ២៩ ទឹកនឹងជន់លិចពិភពលោក គឺបានហួសផុតទៅហើយ។ ហើយយើងក៏ដឹងដែរថាការលើកឡើងបែបនេះជារឿងមិនត្រឹមត្រូវនោះទេ។ ហើយអ្វីដែលជះឥទ្ធិពលជាអវិជ្ជមានដល់សង្គម វាបង្កឱ្យមានភាពចលាចល មានបងប្អូនប្រជាពលរដ្ឋបាត់បង់ការងារធ្វើ បោះបង់ចោលការងារពីក្រៅប្រទេសដើម្បីមកចូលរួមតាមការផ្សព្វផ្សាយអំពាវនាវដែលគ្មានមូលដ្ឋានច្បាស់លាស់បែបនេះ។ ដូច្នេះខ្ញុំសង្ឃឹមថា បងប្អូនប្រជាពលរដ្ឋ ដែលកំពុងនៅស្ទាក់ស្ទើរ សង្ស័យ ធ្វើការវិនិច្ឆ័យដោយខ្លួនឯង អ្វីដែលត្រឹមត្រូវ និងអ្វីដែលខុស»។
លោកបន្ថែមថា បើសិនជាមានការស្នើសុំការជួបជុំធ្វើវិបស្សនាធម្មតា ដោយអ្នករៀបចំកម្មវិធីអាចគ្រប់គ្រងបាន នោះអាជ្ញាធរនឹងអនុញ្ញាត។ ប៉ុន្តែបើការជួបជុំក្នុងហេតុផលជំនឿដោយគ្មានហេតុផលសមរម្យ គឺអាជ្ញាធរមិនអនុញ្ញាតឡើយ។
លោក នី ចាន់ពិនិត្យ សមាជិកគាំទ្រគណបក្សសម្ព័ន្ធប្រជាធិបតេយ្យ ដែលបានចុះហត្ថលេខាលើលិខិតរបស់រដ្ឋបាលខេត្តដែលស្នើសុំឱ្យបញ្ឈប់សកម្មភាពជួបជុំនោះ ប្រាប់វីអូអេថា គណបក្សមិនបានប្រកាសឱ្យប្រជាពលរដ្ឋដែលគាំទ្រមកជួបជុំនោះទេ។ លោកបន្ថែមថា តាំងពីថ្ងៃ២៦ ខែសីហា នៅពេលដែលអាជ្ញាធរខេត្តចុះមកជួបជាមួយប្រធានគណបក្ស គឺពលរដ្ឋបានចាប់ផ្តើមរំសាយទៅផ្ទះបណ្តើរៗ ហើយមកដល់ថ្ងៃអង្គារនេះ គឺនៅសល់ប្រជាពលរដ្ឋមួយចំនួនតែប៉ុណ្ណោះ។
លោកថ្លែងថា៖ «កាលពីថ្ងៃទី២៦ [ខែសីហា ] អភិបាលខេត្ត និងឯកឧត្តម ហ៊ុន ម៉ានិត គាត់បានមក[ជួប] ពួកយើង បានបញ្ឈប់សកម្មភាពរបស់យើង គឺយើងមិនបានផ្សាយផ្ទាល់អីបន្ថែមទៀតទេ។ សកម្មភាពរបស់យើងបានបញ្ឈប់តាំងពីថ្ងៃនោះ។ ចំពោះការ រំសាយវិញ បងប្អូនដែលគាត់បានមកចូលរួមស្តាប់ គាត់ក៏បានត្រឡប់ទៅវិញអស់មួយចំនួនដែរហើយ»។
វីអូអេមិនទាន់អាចសុំការឆ្លើយតបពីលោក ខឹម វាសនា ប្រធានគណបក្សសម្ព័ន្ធដើម្បីប្រជាធិតេយ្យ បាននៅឡើយទេ។
លោក ខឹម វាសនា បានបង្ហោះសារនៅលើគណនីហ្វេសប៊ុករបស់លោក នៅថ្ងៃទី២៥ ខែសីហា ថា«បាងកករលំ ភ្នំពេញរលាយ ព្រៃនគរខ្ចាត់ខ្ចាយ សប្បាយអង្គរវត្ត» និងបានចាត់ទុកថា លោកជា «ព្រហ្មរក្សាលោក» ដែលមើលឃើញពីបាតុភូត Black Hole និងបាននិយាយថា នឹងមានទឹកជំនន់ជន់លិចពិភពលោកក្នុងពេលឆាប់ៗខាងមុខ។
គណបក្សសម្ព័ន្ធប្រជាធិបតេយ្យនៅថ្ងៃអង្គារនេះបានចេញសេចក្តីជូនដំណឹងមួយ ដោយបានបញ្ជាក់ថា ការជួបជុំនេះ គឺគណបក្សបានដាក់លិខិតជូនដំណឹងទៅរដ្ឋបាលឃុំត្បែងរួចហើយ កាលពីថ្ងៃទី ២៧ ខែសីហា ឆ្នាំ២០២២ ហើយការជួបជុំនឹងត្រូវបញ្ចប់នៅដំណាច់ខែកញ្ញា។
លោក ហ៊ាប ថា មេឃុំត្បែង ក្នុងស្រុកបន្ទាយស្រី ខេត្តសៀមរាប បានឱ្យដឹងថា ការដាក់លិខិតស្នើជួបជុំរបស់គណបក្សបក្សសម្ព័ន្ធដើម្បីប្រជាធិបតេយ្យ គឺមួយថ្ងៃក្រោយពីអភិបាលខេត្តចុះជួបជាមួយប្រធានគណបក្សរួចរាល់។ លោកថា ប៉ុន្មានថ្ងៃនេះ ការងារឃុំមមាញឹក ហើយឃុំទើបមានពេលវេលាឆ្លើយតបទៅគណបក្សវិញនៅថ្ងៃនេះ ដោយឱ្យមានការរំសាយ ដូចអ្វីដែលរដ្ឋបាលខេត្តបានសម្រេច។
លោកបញ្ជាក់ថា៖ «លិខិតជូនដំណឹងរបស់ឃុំ គឺថា មិនអាចនៅធ្វើពិធី ឬការជួបជុំអ្វីបន្តទៀតបានទេ ដោយសារការងារដែលត្រូវជួបជុំច្រើនណាស់ ហើយប្រជាពលរដ្ឋដែលមកនោះមានចាស់ មានក្មេង ហើយនៅតាមផ្លូវ តាមព្រៃ តាមតង់អី [ដូច្នេះ]សុវត្ថិភាព ឈឺថ្កាត់ផ្សេងៗ យើងបារម្ភសុខភាពរបស់បងប្អូនដែរ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បានចាត់ទុកថានេះជា«ការឃោសនាបែបអបិយជំនឿ» ដែលការណ៍នេះប៉ះពាល់យ៉ាងខ្លាំងដល់សេដ្ឋកិច្ច និងជីវភាពរបស់ប្រជាពលរដ្ឋទាំងនោះ។
លោកថ្លែងថា៖ «នៅក្នុងការដែលភូតកុហក ទៅបំបះបំបោរគាត់ ធ្វើឱ្យគាត់បាត់បង់ទាំងទ្រព្យសម្បត្តិ បាត់បង់ទាំងឱកាសការងារ។ អាហ្នឹងគឺមែនទែន បើសិនជាការខូចខាតធ្ងន់ធ្ងរ អាហ្នឹងគាត់ត្រូវតែមានការប្រឈមចំពោះមុខច្បាប់។ អាហ្នឹងគាត់អំពាវនាវ។ បើសិនគាត់គ្រាន់តែលើកឡើងនិយាយថា អាហ្នឹងវាអាចមានអ៊ីចឹង ជាលក្ខណៈទស្សន៍ទាយ វាមិនអីទេ។ ប៉ុន្តែគាត់ទស្សន៍ទាយ គាត់អំពាវនាវឱ្យគេចូលរួម អាហ្នឹងវាជារឿងខុសធំណាស់»។
លោកបន្តថា ប្រជាពលរដ្ឋគួរតែពិចារណា មុនជឿលើអ្វីមួយ ពីព្រោះដូចករណីនេះ អ្នកដែលខាត់បង់គឺប្រជាពលរដ្ឋខ្លួនឯង ជាពិសេសពលរដ្ឋក្រីក្រដែលអាចធ្លាក់ចូលក្នុងបញ្ហាសេដ្ឋកិច្ច និងបំណុលមួយកម្រិតទៀត៕