ព័ត៌មានចុងក្រោយបំផុត៖
ប៉ាឡេស្ទីន៖ លោកប្រធានាធិបតីប៉ាឡេស្ទីន Mahmoud Abbas នឹងត្រូវដាក់ពាក្យសុំជាផ្លូវការឲ្យអង្គការសហប្រជាជាតិទទួលស្គាល់រដ្ឋប៉ាឡេស្ទីនមួយជាសមាជិកពេញអង្គមួយរបស់អង្គការពិភពលោក ទោះបីជាមានការប្រឆាំងពីសហរដ្ឋអាមេរិកនិងប្រទេសអ៊ីស្រាអែលក៏ដោយ។
យេម៉ែន៖ លោក Ali Abdullah Saleh នៃប្រទេស យេម៉ែន (Yemen) បានត្រឡប់ទៅប្រទេសលោកវិញ បន្ទាប់ពីបានចំណាយពេលបីខែនៅប្រទេសអារ៉ាប៊ី សាអ៊ូឌីត (Saudi Arabia) ដើម្បីសម្រាកឲ្យបានស្រួលឡើងវិញពីការប៉ុនប៉ងធ្វើឃាតលើរូបលោក។
ប៉ាគីស្ថាន៖ ប្រទេសប៉ាគីស្ថានបានព្រមានសហរដ្ឋអាមេរិកថា ប្រទេសអាមេរិកអាចមានគ្រោះថ្នាក់បាត់បង់សម្ព័ន្ធមិត្តមួយ បើសិនជាស.រ.អ.នៅតែបន្តធ្វើការចោទប្រកាន់ថា ទីភ្នាក់ស៊ើបការណ៍សម្ងាត់របស់ប៉ាគីស្ថានបានជួយគាំទ្រការវាយប្រហាររបស់ក្រុមជ្រុលនិយម ប្រឆាំងនឹងកងទ័ពស.រ.អ.នៅក្នុងប្រទេសអាហ្វហ្គានីស្ថានតទៅទៀត។
អាហ្វហ្គានីស្ថាន៖ ប្រជាពលរដ្ឋអាហ្វហ្គានីស្ថានជាច្រើនពាន់នាក់បានជួបជុំគ្នានៅទីក្រុងកាប៊ុល នៅថ្ងៃសុក្រនេះ ដើម្បីចូលរួមក្នុងពិធីបុណ្យសពរបស់លោកអតីតប្រធានាធិបតី Burhanuddin Rabbani ដែលត្រូវប្រហារជីវិតដោយអ្នកបំផ្ទុះគ្រាប់បែកអត្ថឃាតម្នាក់នៅគេហដ្ឋានរបស់លោក។
សេដ្ឋកិច្ចសកល៖ មន្រ្តីក្រសួងហិរញ្ញវត្ថុពីប្រទេសមានសេដ្ឋកិច្ចកំពុងរីកចម្រើននិងប្រទេសអ្នកមានចំនួន២០ បានសន្យាថានឹងធ្វើការឆ្លើយតបរួមគ្នាមួយ ដើម្បីជួយតំឡើងសេដ្ឋកិច្ចសាកលលោកដែលកំពុងមានភាពចុះដុនដាប។
អ៊ីរ៉ង់៖ លោក Mahmoud Ahmadinejad ប្រធានាធិបតីនៃប្រទេសអ៊ីរ៉ង់បានថ្លែងថា ពេលវេលាមិនទាន់យឺតពេកទេសម្រាប់ឲ្យសហរដ្ឋអាមេរិកចាត់វិធានការធ្វើឲ្យទំនាក់ទំនងដែលមានភាពរកាំរកូសរបស់ខ្លួនជាមួយប្រទេសអ៊ីរ៉ង់មានភាពប្រសើរឡើងវិញ។
ព័ត៌មាននៅពេលមុននេះ៖
លោក ឧត្តមនាវីឯក Michael Mullen ផ្តល់សក្ខីកម្មក្នុងព្រឹទ្ធសភាសហរដ្ឋអាមេរិក ក្នុងរដ្ឋធានីវ៉ាស៊ីនតោនកាលពីថ្ងៃទី២២ខែកញ្ញាឆ្នាំ២០១១។
ប៉ាគីស្ថាន៖ មន្ដ្រីយោធាជាន់ខ្ពស់ស.រ.អ.ម្នាក់បានចោទប្រទេសប៉ាគីស្ថានថាបានគាំទ្រការវាយប្រហារទៅលើមុខសញ្ញារបស់ស.រ.អ. នៅក្នុងប្រទេសអាហ្វហ្គានីស្ថាន រួមមានការវាយប្រហាររបស់ពួកសកម្មប្រយុទ្ធកាលពីសប្តាហ៍មុនទៅលើស្ថានទូតស.រ.អ.នៅទីក្រុងកាប៊ុល។
អ៊ីរ៉ង់៖ លោក Mahmoud Ahmadinejad ប្រធានាធិបតីនៃប្រទេសអ៊ីរ៉ង់ នៅពេលថ្លែងសុន្ទរកថាទៅកាន់មហាសន្និបាទអ.ស.ប.នៅថ្ងៃព្រហស្បតិ៍ បានរិះគន់យ៉ាងខ្លាំងចំពោះស.រ.អ. ប្រទេសអ៊ីស្រាអែល និងបស្ចិមប្រទេស ហើយចោទប្រទេសទាំងនោះថាបានញុះញង់ឲ្យមានសង្គ្រាម ធ្វើឲ្យមានការមិនចុះសម្រុងគ្នានិងផ្សព្វផ្សាយលទ្ធិផ្ដាច់ការ។
អ៊ីស្រាអែល/ប៉ាឡេស្ទីន៖ មន្ដ្រីថ្នាក់ខ្ពស់ប៉ាឡេស្ទីនម្នាក់និយាយថា លោកប្រធានាធិបតី Mahmoud Abbas នឹងសុំឲ្យក្រុមប្រឹក្សាសន្ដិសុខអ.ស.ប.ជាផ្លូវការ ឲ្យទទួលស្គាល់ប៉ាឡេស្ទីនថាជាសមាជិកពេញលេញនៃអ.ស.ប. នៅថ្ងៃសុក្រ ទោះបីលោកប្រធានាធិបតីស.រ.អ. Barack Obama គំរាមថានឹងប្រើសិទ្ធិវេតូជំទាស់នឹងសេចក្ដីសម្រេចនេះក៏ដោយ។
សេដ្ឋកិច្ចសកល៖ ផ្សារហ៊ុននៅក្នុងសាកលលោកធ្លាក់ចុះយ៉ាងខ្លាំងនៅថ្ងៃព្រហស្បតិ៍ ដែលជាប្រតិកម្មចំពោះសេចក្ដីសង្ឃឹមយ៉ាងតិចតួចបំផុតរបស់ធនាគារកណ្ដាលស.រ.អ.អំពីសេដ្ឋកិច្ចប្រទេសនេះដែលធំជាងគេក្នុងពិភពលោក ថានឹងត្រូវបានស្ដារនិងសេចក្ដីភ័យខ្លាចថាសេចក្ដីសម្រេចថ្មីៗបំផុតរបស់ស.រ.អ.ដើម្បីស្ដារសេដ្ឋកិច្ចនឹងមិនមានប្រសិទ្ធភាព។
លីប៊ី៖ យុទ្ធជននៃក្រុមប្រឹក្សាអន្ដរកាលជាតិនៃប្រទេសលីប៊ីកំពុងតែអះអាងថាបានត្រួតត្រាស្រុក Sabha ហើយដែលជាស្រុកមួយមានការការពាររឹងមាំរបស់ពួគស្មោះត្រង់ចំពោះមេដឹកនាំ Moammar Gadhafi។
អូស្ត្រាលី៖ រដ្ឋសភានៃប្រទេសអូស្ត្រាលីបានពន្យារពេលរហូតទៅដល់ខែក្រោយនូវការបោះឆ្នោតស្ដីអំពីការប្ដូរច្បាប់អន្ដោប្រវេសន៍យ៉ាងចម្រូងចម្រាស់មួយ ដែលអនុញ្ញាត ឲ្យអនុវត្ដតាមសំណើដូរជនភៀសខ្លួនគ្នាជាមួយប្រទេសម៉ាឡេស៊ី។
បារាំង៖ តុលាការបារាំងជាលើកទីមួយហើយ បានពិន័យស្ដ្រីអ៊ីស្លាម២នាក់ដែលពាក់ស្បៃមុខឃ្លុបនៅសាធារណៈ នៅក្នុងរឿងមួយដែលអាចនាំឲ្យមានបញ្ហាផ្នែកខាងច្បាប់នៅទូទាំងអឺរ៉ុប។