ចិន៖ ប្រទេសចិននិងសហរដ្ឋអាមេរិកបានធ្វើការប្តេជ្ញាចិត្តឡើងវិញក្នុងកិច្ចសហការទ្វេភាគី ដោយរដ្ឋបាលក្រុងប៉េកាំងសម្តែងការជឿជាក់លើសេដ្ឋកិច្ចអាមេរិកថាវានឹងងើបឡើងវិញ។
ឥណ្ឌា៖ អាជ្ញាធរប៉ូលីសនិយាយថា ពួកអ្នកបះបោរដែលគេសង្ស័យថាជាក្រុមម៉ៅនិយមបានសម្លាប់មន្រ្តីប៉ូលីស១១នាក់នៅ ខេត្តភាគខាងកើតប្រទេសឥណ្ឌា។
ស៊ីរី៖ យ៉ាងហោចណាស់មានមនុស្ស១៩នាក់បានស្លាប់នៅប្រទេសស៊ីរី នៅពេលដែលកងកម្លាំងសន្តិសុខបាញ់រះលើក្រុមបាតុករប្រឆាំងនឹងរដ្ឋាភិបាល។
សេដ្ឋកិច្ចសកលលោក៖ ទីផ្សារភាគហ៊ុនអាស៊ី និងអឺរ៉ុបបានធ្លាក់ចុះនៅថ្ងៃសុក្រនេះ ខណៈ ដែលក្រុមអ្នកវិនិយោគទុនបង្ហាញក្តីកង្វល់ជាថ្មីលើសេដ្ឋកិច្ចរបស់សហរដ្ឋអាមេរិកដែលកំពុងប្រឹងតស៊ូនិងស្ថិរភាពនៃប្រព័ន្ធធនាគារអឺរ៉ុប។
ប៉ាគីស្ថាន៖ មន្រ្តីនានាបានឱ្យដឹងថា អ្នកដាក់គ្រាប់បែកអត្តឃាតម្នាក់បានវាយប្រហារវិហារសាសនាអ៊ីស្លាមមួយនៅភាគពាយ័ព្យប្រទេសប៉ាគីស្ថាន ដោយសម្លាប់មនុស្សអស់យ៉ាងហោចណាស់៤៧នាក់។
លីប៊ី៖ កងកម្លាំងបះបោរនៅប្រទេសលីប៊ីបានវាយយកបានគ្រប់គ្រងទីក្រុង Zlitan ភាគខាងលិចប្រទេស បន្ទាប់ពីមានការវាយប្រយុទ្ធគ្នាដ៏តឹងតែងជាមួយកងកម្លាំងស្មោះត្រង់នឹងមេដឹកនាំមូអាម៉ា ហ្កាដាហ្វី។
លីបង់៖ តុលាការគាំទ្រដោយអង្គការសហប្រជាជាតិដើម្បីស៊ើបអង្កេតការធ្វើឃាតក្នុងឆ្នាំ២០០៥លើរូបលោកអតីតនាយករដ្ឋមន្រ្តីលីបង់ Rafik Hariri បានពង្រីកការស៊ើបអង្កេតក្នុងករណីវាយប្រហារអ្នកនយោបាយបីនាក់ផ្សេងទៀតដែលគេជឿថាមានការជាប់ទាក់ទងគ្នា។
អ៊ីស្រាអែល៖ អ៊ីស្រាអែលនិយាយថា កងជីវពលក្នុងទីក្រុងហ្កាហ្សាស្រ្ទីបបានបាញ់គ្រាប់រ៉ុក្កែតយ៉ាងហោចណាស់ចំនួន២០ចូលប្រទេសអ៊ីស្រាអែល គឺមួយថ្ងៃក្រោយពីយន្តហោះចម្បាំងអ៊ីស្រាអែលបានបាញ់លើដែនដីប៉ាឡេស្ទីនជាការសងសឹកនឹងការវាយប្រហារសម្លាប់ជាបន្តបន្ទាប់កាលពីថ្ងៃព្រហស្បតិ៍។
សូម៉ាលី៖ មន្រ្តីសន្តិសុខនៅប្រទេសសូម៉ាលីនិយាយថា យន្តហោះប្រភេទគ្មានមនុស្សបើកបរបានធ្លាក់ចុះក្នុងរដ្ឋធានីមូហ្កាឌីស៊ូ កាលពីថ្ងៃសុក្រ តែពួកគេមិនបានផ្តល់ព័ត៌មានលម្អិតថាអ្នកណាជាអ្នកបញ្ជាយន្តហោះគ្មានមនុស្សបើកបរនោះទេ។
ជប៉ុន៖ លោកនាយករដ្ឋមន្រ្តីជប៉ុនដែលកំពុងមានបញ្ហានឹងមិនមកទស្សនកិច្ចសហរដ្ឋអាមេរិកតាមការអញ្ជើញរបស់លោកប្រធានាធិបតីបារ៉ាក់ អូបាម៉ាទេនៅ ខែក្រោយនេះ។
គុយបា៖ បណ្តាញព័ត៌មានផ្លូវរដ្ឋរបស់ប្រទេសគុយបាបានរិះគន់ការសម្រេចចិត្តរបស់សហរដ្ឋអាមេរិកក្នុងការទុកប្រទេសគុយបាក្នុងបញ្ជីប្រទេសដែលគាំទ្រភេរវកម្ម។
រុស្ស៊ី៖ ប្រទេសរុស្ស៊ីកំពុងប្រារព្ធខួបលើកទី២០ឆ្នាំនៃការប៉ុនប៉ងធ្វើរដ្ឋប្រហារដោយមិនជោគជ័យដែលបាននាំទៅដល់ការដួលរលំនៃសហភាពសូវៀត។