សមាជិកសភាស្ដាំនិយមជ្រុលរបស់អ៊ីស្រាអែលបានរិះគន់ខ្លាំងៗលើអនុប្រធានាធិបតីអាមេរិកអ្នកស្រី Kamala Harris កាលពីថ្ងៃសុក្រចំពោះការអំពាវនាវរបស់អ្នកស្រីឱ្យមានបទឈប់បាញ់គ្នានិងក្ដីបារម្ភរបស់អ្នកស្រីចំពោះការឈឺចាប់របស់មនុស្សនៅក្នុងតំបន់ហ្កាហ្សា។
នៅក្នុងការថ្លែងទៅកាន់អ្នកកាសែតកាលពីថ្ងៃព្រហស្បតិ៍ អ្នកស្រី Harris បានបង្ហាញដល់នាយករដ្ឋមន្ត្រីអ៊ីស្រាអែលលោក Benjamin Netanyahu ថាអ្នកស្រីព្រួយបារម្ភយ៉ាងខ្លាំងអំពីការឈឺចាប់របស់មនុស្សនៅក្នុងតំបន់ហ្កាហ្សា រួមទាំងការស្លាប់របស់ «ជនស៊ីវិលស្លូតត្រង់ជាច្រើនអនេក» ផងដែរ។ អ្នកស្រីបានជំរុញឱ្យក្រុមអ្នកចរចាសម្រេចឱ្យបានបទឈប់បាញ់គ្នាដើម្បីបញ្ចប់សង្គ្រាមនេះ។
រដ្ឋមន្ត្រីហិរញ្ញវត្ថុស្ដាំនិយមជ្រុលរបស់អ៊ីស្រាអែលលោក Bezalel Smotrich បានព្រលះដាក់អ្នកស្រី Harris នៅលើបណ្ដាញសង្គមអនឡាញ X ថា ការអំពាវនាវរបស់អ្នកស្រី Harris ឱ្យមានបទឈប់បាញ់គ្នានៅក្នុងតំបន់ហ្កាហ្សាគឺស្មើនឹងការអំពាវនាវឱ្យអ៊ីស្រាអែលចុះចាញ់ដូច្នេះដែរ។
លោកសរសេរដូច្នេះថា៖ «អ្នកស្រី Kamala Harris បង្ហាញទៅកាន់ពិភពលោកនូវអ្វីដែលខ្ញុំបាននិយាយអស់រាប់សប្ដាហ៍មកហើយ គឺអ្វីដែលស្ថិតនៅពីក្រោយបទឈប់បាញ់គ្នានេះ។ ការចុះចាញ់ [មេដឹកនាំក្រុមហាម៉ាស់] លោក Sinwar គឺជាការបញ្ចប់សង្គ្រាមនៅក្នុងវិធីមួយដែលនឹងអនុញ្ញាតឱ្យក្រុមហាម៉ាស់វិលមកដូចដើមវិញនិងដោះលែងចំណាប់ខ្មាំងភាគច្រើនដែលក្រុមហាម៉ាស់ចាប់ឃុំ។ កុំធ្លាក់ចូលទៅក្នុងអន្ទាក់នេះ!»។
រីឯរដ្ឋមន្ត្រីសន្តិសុខជាតិអ៊ីស្រាអែលលោក Itamar Ben-Gvir ដែលជាអ្នកនយោបាយស្ដាំនិយមជ្រុលម្នាក់ទៀត ក៏បានសរសេរនៅលើបណ្ដាញសង្គមអនឡាញ X ផងដែរថា៖ «កិច្ចឈប់បាញ់គ្នានេះនឹងមិនមាននោះទេ អ្នកស្រីបេក្ខជនប្រធានាធិបតី»។
ការលើកឡើងរបស់អ្នកនយោបាយស្ដាំនិយមជ្រុលរបស់អ៊ីស្រាអែលនេះបានធ្វើឡើងនៅពេលដែលមេដឹកនាំនៃប្រទេសអូស្ត្រាលី កាណាដា និងនូវែលសេឡង់ចេញការអំពាវនាវឱ្យមានបទឈប់បាញ់គ្នានៅហ្កាហ្សា៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
អ្នកនយោបាយស្ដាំនិយមជ្រុលអ៊ីស្រាអែលព្រលះដាក់អ្នកស្រី Harris ចំពោះការអំពាវនាវឱ្យមានបទឈប់បាញ់នៅហ្កាហ្សា
អនុប្រធានាធិបតីអាមេរិកអ្នកស្រី Kamala Harris បានថ្លែងអំឡុងកិច្ចប្រជុំមួយជាមួយនាយករដ្ឋមន្ត្រីអ៊ីស្រាអែល fលោក Benjamin Netanyahu នៅសេតវិមានកាលពីថ្ងៃទី២៥ កក្កដា ឆ្នាំ២០២៤។